WILLEMSTAD – Remses Rafaela ta bèk ku un otro produkshon kreativo titulá TOPA, un serie di tres enkuentro di baile i músika, unda e inspirashon fundamental ta e interkambio i konekshon pa medio di kultura. Aki Rafaela, fundadó di Stichting Passion & Skillz, a invitá perkushonista Vernon Chatlein i bailarinnan POM Arnold, Sarada ‘Sarita’ Keilman i Dalton Jansen pa partisipá den un diálogo entre músika i baile. TOPA lo tuma lugá dia 7, 14 i 21 ougùstùs próksimo, di 8’or pa 9’or di anochi (ora hulandes) na het Klooster den Afrikaanderwijk, na Rotterdam.
E propósito di TOPA ta pa eksplora e profundidat di lenguahe i identidat di baile pa siña mas di e raisnan di otro i e núkleo kultural. Aki, Rafaela ta utilisá su raisnan i herensia afro karibense komo un medio di konekshon i inspirashon, basá riba su konvikshon ku mundu mester esaki mas ku nunka. Segun Rafaela, e kultura afro karibense tin estilonan speshal di baile i músika tradishonal, ku ta un parti importante di nos patrimonio kultural. Durante TOPA, e artistanan ta trata pa konosé otro, buskando similaridatnan, i na mes momentu, selebrá nan diferensianan. “Mi idioma ta e vehíkulo unda mi ta ekspresá e diversidat di mi raisnan, kultura i mi diferente orígennan den un fushon úniko. Mi herensia kultural ta mi núkleo i ta guía tur mi trabou. Esaki tambe ta e kaso ku TOPA “, segun Rafaela. E seshonnan durante TOPA, ta un biahe interaktivo, unda ta diskubrí diferente forma nobo di ekspreshon, inspirá pa desafíonan musikal, konekshon personal i asignashonnan kreativo di rais i identidat. TOPA ta trata di konosé, buska similaridat i alabes selebrá nos diferensianan.

REMEKS ‘FANGU NAN’
Komo rapper MuisjeMuis, Rafaela a lansa diferente proyekto memorabel, pero su delaster produkshon titula ‘FANGU NAN’ ta un ‘summer banger’ garantisá. E remeks di e piesa akí lo keda lansá otro siman i a keda produsí pa e talentoso Slick huntu ku rapper Jaido i Farly SMC. Rafaela tambe ta konosí pa su pelíkulanan i produkshonnan multi disiplinario, fo’i un perspektiva afro karibense. Komo produktor teatral, Rafaela a sa di desaroyá bou di alanan di MAAS Theater en Dans, i e ultimo añanan, esaki a resultá den diferente produkshon. E mas resien ta ‘Wijzer’, un obra espesialmente pa mucha, i e investigashon artístiko ‘Mi Mama’.

KARCHI ‘EARLY BIRD’

TOPA ta e promé produkshon di Rafaela su propio fundashon Passion & Skillz. Si bo ta na Hulanda, bo por asistí en persona na Het Klooster, pero e produkshon tambe lo keda transmití via di ‘livestream’. Esnan ku no ke keda afo, por kumpra karchi ‘early bird’ na rason di 5 euro so via www.passion-and-skillz.com/topa. Bo por paga ku bo tarheta di krédito i lo bo risibí bo link di akseso via e-mail. TOPA a keda realisá huntu ku Stichting Droom en Daad i ta posibel danki na Stichting Humanitas.

Pa mas informashon en futuro, korda inskibi pa e ‘nieuwsbrief’ di Stichting Passion & Skillz riba nan wèpsait www.passion-and-skillz.com. Por siguí Remses Rafaela riba vários plataforma sosial manera Facebook.com/remses.rafaela i Instagram.com/muisjemuis