Willemstad, pronto Elisa Academy lo habri su portanan pa tur esnan ku ta interesa den e mundu di teater aki na Kòrsou.
E ta un akademia di teater pa mucha i hende grandi, kaminda lo duna diferente aspekto teatral manera aktuashon, proyekshon di stem, postura di kurpa riba esenario, skibi tekstonan teatral, naturalmente presenta dilanti di publiko i hopi mas.

E proyekto piloto tin un durashon di 6 luna di kurso, pa despues ekspande pa henter un aña. Na final di kada trimester e kursistanan lo duna un presentashon pa mustra nan desaroyo durante di e luna nan.

Elisa Academy ta krea pa Richailine Elisa ku a bin na e idea pa duna Kòrsou bek loke ku e la siña durante di su añanan di estudio na Hulanda.
Richailine a krese komo un di e mihó aktrisnan hóben aki na Kòrsou. Ganando “Miho Aktris-Premio Karabela” na 2007.
Despues di 4 aña komo aktris, produktor i regisor na Teatro Luna Blou i La Tentashon e la disidí di studia na “De Acteerschool Rotterdam”.

Na Hulanda Richailine a sera konosí ku e mundu di arte Oropeo, diferente téknika di teater,estilo di aktuashon i tambe tour rònt Hulanda ku diferente produkshon. Durante su estudio i karera e la haña oportunidat di forma parti den produkshonnan grandi i rekonosé na Hulanda. E la traha ku regisornan grandi manera Gerardjan Rijnders, Erik Vos.
Den e luna di fin di november i kuminsamentu di dezember 2020 Richailine Elisa e presenta su elsitoso obra teatral “Wachten op Mijn Papa” skibi i dirigi pa su mes persona. E la presenta e obra pa algun skol i publiko general aki na Kòrsou.

Richailine Elisa huntu ku Greysha Niebe lo ta dosentenan enkarga na Elisa Academy.

Greysha Niebe tambe ta un profeshonal den e mundu di teater. E ta un eks- studiante di La Tentashon ku a bai studia teater na “Friesland College D’Drive” na Leeuwarden. Durante di su estudio na Hulanda e la forma parti di Muzt Musical Opleiding, un di e opleiding nan mas konosí na Friesland.
Pa finalisa su estudio di teater Greysha a bin Kòrsou na 2014 pa traha riba su mes obra titula “ Amigu Imaginario”, un obra spesialmente pa mucha chiki ku a keda presenta den La Tentashon pa diferene skolnan basiko.
Despues ku Greysha a kaba su estudio i haña mas eksperiensia na Hulanda e la bin Kòrsou pa sigui duna les i tayer di teater na nos muchanan.

Elisa Academy lo habri su portanan ofisilamente dia 28 di augustus 2021.
E kurso lo tuma luga tur djasabra i unbes den siman na e aula di Habaai, e teater nobo di Kòrsou. E lesnan lo ta dividi den e sigiente gruponan: mucha di 5 pa 11 aña, 12 pa 17 aña i 18 pa 30 aña di edat. E ta pa un i tur ku ta papia papiamentu, hulandes, inles i spaño. Inskripshon ta kosta ANG 25,- i por iskribi for dia awe mes te dia 14 di augustus. Aparte di ta e lastu dia di inskripshon e lo ta un dia habri pa será konosi ku e akademia di teater.
Pa mas informashon tokante di e lesnan i pago mensual por tuma kontakto ku Richailine Elisa na +5999 520 8338 of via info@elisa academy.com
Por haña nan tambe via e pagina website www.elisa academy.com i riba instragram @elisa.academy i Facebook Elisa Academy