WILLEMSTAD – For di mañan Dolfijn FM i Rotaract Club of Curaçao ta organisá pa di 16 biaha e tan konosí Tur Mucha un Regalo di Pasku, durante kua ta hasi un yamamentu na un i tur pa regalá ún òf mas regalo ku lo yega serka e muchanan ménos priviligiá riba nos isla. E aktividat akí ta e aña akí di 14 te i ku 20 di Desèmber.
Entretantu e aktividat akí ta imborabel i ta ainda ún di e aktividatnan mas grandi di nos isla. E petishonnan hopi biaha ta drenta promé ku verano tantu serka Rotaract komo serka Dolfijn FM. Esei ta indiká kon grandi e aktividat akí ta i ku e kampaña di kolekta ainda ta sumamente relevante. Aña pasá e konteo tabata 5147 regalo.

E reglanan di wega di e aktividat no a kambia; e regalo mester ta nobo i empaketá, e balor mester ta entre diessinku i bintisinku florin, i si e ta pa un mucha hòmber (H) òf pa un mucha muhé (M) i pa kua edat e ta apto.

E organisashon pa hopi aña kaba ta traha konhuntamente ku diferente tienda di huguete, ku tin bon koordinashon ku e aktividat di kolekta. Tantu Top1Toys na Zuikertuin Mall, COS+ na Promenade, Children’s Museum i Mensing’s Caminada na Rooi Catootje, Toy Box Curacao na Santa Rosaweg i Building Depot ta hasi un donashon pa kada dies regalo ku nan bende, di ún regalo ekstra.

For di Djarason 14 te i ku Djamars 20 di Desèmber tur hende ta bonbiní pa pasa laga un regalo na Studio di Dolfijn FM na Mambo Beach.
E organisashonnan ku ke duna un kontribushon (finansiero) na benefisio di e proyekto akí, por tuma kontakto via telefon number 523-6722 òf via email òf iederkind eenkerstcadeau@gmail.com.

Durante e periodo di kolek -ta lo tin un programa adaptá na Dolfijn FM, pa asina alkansá un públiko mas grandi posibel i tambe pa pone na altura di e kantidat di regalo kolektá. Studio ta abrí pa públiko for di Djarason 14 te i ku 20 de Desèmber te 19.00 or riba dianan laboral i den fin di siman di 09.00 te 18.00 or. Pone atenshon durante e siman di aktividat na e kanalnan di media sosial pa Tur Mucha un Regalo di Pasku i nan partnernan pa mas notisia!

E organisashon di Tur Mucha un Regalo di Pasku ta hasi un yamamentu na un i tur pa duna un regalo mas rápido posibel. Mester surti i repartí tur regalo ku nos ta spera di ta miles i ku ta un trabou basta pisá.
Mas informashon di Tur Mucha un Regalo di Pasku por haña riba www.dolfijngo.com i riba e kanalnan di media sosial di Dolfijn FM. Por skucha Dolfijn FM riba 97.3 FM i via e wèpsait anteriormente menshoná.