Connect with us

Katoliko

Ta keda bo algu pa pordoná p’asina biba mas liber?

Published

on

Tantu bia mi no ke pordoná esnan ku a hasi mi daño. “Nos tambe, tin bia,ta gusta kastigá otronan, kondená otronan”. Nan piká òf nan limitashon a laga herida den mi alma i mi no ke pordoná nan. Mi ta karga e marka di renkor òf di rabia na ora di kòrda loke nan a hasi ku mi, loke nan a bisa di mi. I mi no ke pordoná.
Kiko ta kousa mi doló den mi bida? Si mi keda ketu, si mi para ketu, mi ta sinti e doló manera un hinká.
Tin be ta pasobra nan no a tene kuenta ku mi. Nan no a balorá mi manera mi tabata spera. Nan a papia malu di mi tras di mi lomba. Mi no a ser tratá manera mi a meresé. Òf kisas mi a tuma un komentario ku nan a hasi ku mi komo algu personal i a salí heridá.
Talbes tabata pa un traishon den amor, den fieldat. Òf tabata e promesanan ku no a ser kumplí, e espektativanan ku ami tabatin i ku no a bira realidat. Por ta pa algu ku nan a kita di mi, algu ku mi a kere ku e tabata pertenesé na ami, algu riba kua mi tabatin derechi.
Por ta tambe pasobra un hende a probechá di mi, òf a abusá di su poder i a hasi mi daño ku su komentario i gestonan.
Tin hopi rais di mi doló. Hopi kousa ku a lagami heridá. I mi sa ku ta únikamente pordonando mi por bolbe kuminsá. Pero mi ta sinti komo na ora di pordoná lo mi mester lubidá tur kos. I ami no tin kapasidat.
Mi ke tira e promé piedra pa sigui rekordá. Mi no ke pa nan pensa i sinti ku ya no ta importámi tur e malu ku nan a hasimi. Ku tur kos a keda meskos, i ta lubidá. Mi sa ku lubidamentu nunka ta sosodé pasobra e ta forma parti di mi historia sagrado.
Tin be mi ta pensa ku pordoná esun ku a hasi mi daño ku su gestonan, ku su palabranan, ku su bida, ta manera duna nan un toke riba lomba, un brasa definitivo. Komosifuera no tabatin ofensa i tur kos ya a ser lubidá. Pero no ta bèrdat.
Talbes mi ta gusta tin e personanan ku mi no a kaba di pordoná di kurason mará. Mi ta retené nan den mi husgamentu, den mi kondena. Mi tin nan mará i mi ta mira nan ku menospresio, ku renkor.
Pero mi sa ku e falta akí di pordon ta hasi ami daño, no nan. E ta aislá mi i ta venená mi, kisas nan no sa nada. Esnan ku a heridá mi. Si mi no pordoná, mi no ta kura.
Loke ta sosodé ta ku tin bia ni sikiera mi sa ku mi no a pordoná tur kos. Mi ta pensa sí, ku mi no ta warda ofensa, ku tur kos ya ta lubidá. Pero despues sierto reakshonnan ta mustra mi ku no ta asina.
Kua ta e síntomanan ku ta indiká na ami ku algu no ta na pas den mi alma? Ora mi ta reakshoná den forma eksagerá dilanti un komentario, dilanti un krítika òf un husgamentu. Ora mi ta yena mi mes di amargura i mi ta mira tur kos negativo òf mi ta enfatisá loke ta malu promé ku loke ta bon. Ora mi ta kai den envidia i den yalusí . Ora mi ta sinti mi mes ménos ku otronan i mi ta sera mi mes i ta aislá mi mes.
Tur esaki por ta manifestashon di mi falta di pordon. Den e parti skondí di e alma mi herida ta. I talbes mi tabata pensa ku ya tur kos ta pordoná, pero no ta asina. Den rekuerdo ta sigui e mesun rabia, e mesun odio, e mesun renkor. E ora ei ta kla ku mi no a logra pordoná tur kos.
I e falta aki di pordon ta hasi ami daño, no esun ku a ofendé mi. No esun ku a bisa tal òf kual kos. No esnan ku a heridá mi ku nan aktonan òf ku nan omishonnan.
Es ta real. Falta di pordon ta un venenu ku por yega na kambia hasta mi forma di ser i di mira. Mi por bira asosial i deskonfiá, tristu i ta keda ketu. Mi por sera mi mes entre murayanan pa miedu di bolbe ser heridá.
I hopi bia nos no ta duna e paso pa pordoná pasobra nos ta pensa ku nos mester bisa esaki na e persona kua nos ta pordoná. Pero no ta asina. Ora mi pordoná un persona, no nesesariamente mi mester bis’é. Talbes a pasa hopi tempu. Òf simplemente mi no ke bis’é. Nada ta pasa.
Tin be esnan ku a hasi mi daño ni sikiera ta konsiente. I si mi pordoná nan, no ta pa nan, e ta pa mi mes. Ta ami ta esun ku pordon ta salba. Ta ami ta esun ku ta kura asta te den mas profundo. I e ta librami.
Tin be mi no ta pordoná pasobra mi ta spera ku e otro ta kambia su aktitut, ta mehor’é, ta tratami di otro forma. I esaki no ta sosodé. I su falta di amor òf sensibilidat ta hasi e herida mas hundu.
Otro bia mi ta spera ku e ta pidi mi pordon, ku e ta humiá su mes, ku e ta hinka rudia dilanti mi i sa na duna kuenta di su erornan, di e malu ku el a kousa mi. I komo ku esaki no ta pasa, tampoko mi ta pordon’é.
Tin be mi ta eksigí ku e otro ta duna su mes kuenta di e malu ku su palabranan, su gestonan, su omishonnan ta hasimi. Pero por ta ku e no ta duna su mes kuenta, i ami no ta pordoná.
Loke ta importante di pordon ta ku e ta sana mi alma. Mi ta pordoná pa mi bon, no pa e bon di e otro. Mi no ta buska pa mi pordon ta sana alma di esun ku a hasimi daño. Mi no ta pretendé di kambi’é. No ta esaki. Nos lo por bisa ku ta un pordon egoista. Maske nunka ta egoismo pensa riba e salú di mi alma.
Mi ta pordoná pasobra mi sa ku na ora di hasié mi heridanan lo ser kurá. Mi lo no lubidá kiko a pasa, esaki ta imposibel. Pero ora mi kòrda, sintimentu di rabia, di odio, inkluso deseonan di vengansa lo no brota. Tur lo kontrali.
Mi pordon ta habri p’ami e miserikòrdia di Dios. E ta yena mi di e lus ku ta bini for di altura. E ta duna mi un bida nobo.
Mi sa ku pordon no ta fruta di mi esfuerso, di mi lucha titániko pa suavisá e herida. Mi ta purba di e forma aki i mi no ta logra. Mi ke pordoná i mi no ta pordoná. Pordon ta un don. Mi mester implorá pordon riba kada dia.
Hesus ta esun ku ta yuda mi pordoná, esun ku ta bini ku su miserikòrdia i ta libra mi alma heridá. E ta hinka su mes den mi alma i ta sana mi. E ta dunami loke mi no tin. Un mirada nobo.

 

Continue Reading

Katoliko

Papa Francisco: Futuro saserdotenan mester ser evaluá integralmente

Published

on

By

Papa Francisco a bisa djabièrnè ku ora un persona ta konsiderá e vokashon saserdotal, ta nesesario evalu’é integralmente pa por tin saserdotenan ku ta kapas pa komuniká e bondat di Dios.
Asina e Tata Santu a indiká dn e Palasio Apostóliko di Vatikano, den e oudiensia konsedé na e formadornan di e Seminario Arzobispado de Milán (Italia), na okashon di e di 150 aniversario di e revista “La Scuola Cattolica” (E Skol Katóliko).
“Ora ta diserní si un persona por inisiá òf konsiderá un rekorido vokashonal, ta nesesario investig’é i evalu’é di moda integral”, Papa Francisco a splika den su diskurso djabièrnè 17 di yüni.
Den e sentido akí, el a kontinuá, “mester tene kuenta ku nan moda di biba afektonan, relashonnan, espasionan, ròlnan, responsabilidatnan, asina manera debilidatnan, temornan i desekilibrionan”.
“Henter e trayekto mester aktivá prosesonan ku ta buska na forma saserdotenan i esnan konsagrá madurá, ekspertonan den humanidat i serkania, i no funshonarionan di lo santu”, Papa Francisco a enfatisá.
Pa esaki, e Tata Santu a resaltá, “superiornan i formadornan di e seminario, esnan ku ta kompañá nan i e personanan den formashon ta yamá na krese diariamente na e plenitut di Kristu p’asina ku, atraves di e testimonio di kada un, e karidat di Kristu ta manifestá su mes mas klaramente”.
Papa Francisco tambe a bisa e formadornan ku “e seminaristanan i hóbennan den formashon mester por siña mas di boso bida ku di boso palabranan, nan mester por siña e bondat di boso obedensia, e trabou di boso dedikashon, e generosidat ku esnan pober di boso sobriedat i disponibilidat, paternidat di boso afekto kasto i no posesivo”.
“Nos ta konsagrá pa sirbi e Pueblo di Dios, pa atendé ku e heridanan di tur hende, kuminsando ku esnan mas pober”, Papa a enfatisá.
Mundu, Papa Francisco a kontinuá, “mester di saserdotenan kapas pa komuniká e bondat di Señor na esun ku ta eksperimentá piká i frakaso, saserdotenan eksperto den humanidat, pastornan dispuesto na kompartí alegria i sufrimentu di e rumannan, hòmbernan ku sa na skucha e gritu di esnan ku ta sufri”.
Renobashon i kuido di vokashonnan
E Tata Santu tambe a dediká un momento di su reflekshon na renobashon di vokashonnan saserdotal.
“Renobashon i futuro di vokashonnan ta posibel únikamente si tin saserdotenan, diákononan, esnan konsagrá i laikonan bon formá”, Papa Francisco a enfatisá.
“Kada vokashon partikular ta nase, krese i ta desaroyá su mes den kurason di Iglesia, i esnan ‘yamá’ no ta manera padestul ku ta aparesé diripiente. E mannan di Señor, ku ta duna forma na e ‘barinan di klei’, ta operá atraves di e kuido ku pasenshi di formadornan i kompañantenan.
Na nan, Papa Francisco a sigurá, “ta konfia e servisio delikado, eksperto i kompetente pa kuida e nasementu, e kompañamentu i disernimentu di vokashonnan, den un proseso ku ta rekerí hopi bondat i konfiansa”.
Servisio di teologia
E Tata Santu tambe a papia di e importansia di teologia i di e nesesidat pa por tin personanan kapas pa splika esaki na e mundu di awe.
E komunidat “mester di trabou di esnan ku ta buska na interpretá fe, tradusié i bolbe tradusié, pa hasié komprensibel, pa eksponé ku palabranan nobo: un trabou ku lo mester bolbe hasié di nobo ku kada generashon”.
Ta pesei, “Iglesia ta enkurashá i ta sostené e esfuerso aki, e difikultat pa bolbe definí kontenido di e fe den kada époka, den e dinamismo di e tradishon”.
Den e sentido akí, Papa Francisco a kontinuá, “e lenguahe teológiko semper mester ta bibu, dinámiko, e no por hasi otro ku evolushoná i preokupá su mes pa hasi su mes komprendibel”.
Papa ademas a mustra riba e papel iluminador di teologia den e mundu aktual kaminda a pèrdè sentido di kosnan.
“Un di e problemanan mas grandi di nos tempu ta en efekto e pèrdida di sentido. Teologia, awe mas ku nunka, tin e gran responsabilidat pa stimulá i orientá e búskeda, pa iluminá e kaminda”.

Continue Reading

Katoliko

Historia di dia di Tata

Published

on

By

Irónikamente, kreashon di dia di Tata, finalmente, a keda inspirá de un predikashi riba dia di mama. Na 1909, Sonora Smart Dodd de Spokane, Washington, a skucha un predikashi i a duna kuenta di ku su tata a meresé homenahe similar. E tabata Henry Jackson Smart, kunukero i veterano di guera sivil, kende a kria Sonora i su sinku yunan chikí despues di ku su esposa lo a muri dor di komplikashonnan durante nasementu di su di seis yu.
Sonora tabata ke un dia spesial pa su tata lo a sa kantu e tabata apresiá su amor i apnegashon, asina manera e sakrifisionan ku el a realisá komo tata soltero. Dia 19 di yüni 1910, riba dia di kumpleaño di Henry, Sonora a festehá e dia di Tata pa di promé bia na Spokane. Na 1924, Presidente Calvin Coolidge a apoyá públikamente e dia Nashonal di Tata. Finalmente, na 1966, Presidente Lyndon Johnson a firma un resolushon pa kombertí Dia di Tata den dia festivo nashonal. Seis aña mas lat, presidente Richard Nixon ta kombertié den lei permanente pa festehá dia di Tata riba e di tres djadumingu di yüni.
Sin embargo, e selebrashon akí ta varia di fecha den diferente pais di mundu. Algun ta konservá e di tres djadumingu di yüni, manera ta mayoria di e paisnan latinoamerikano, miéntras ku otronan ta preferá hasié dia 19 di mart, dia di San Hosé, manera ta e ehèmpel di Bolivia, Spaña i Honduras

Continue Reading

Katoliko

Di Shete Djadumingu di Pasku di Resurekshon

Published

on

By

Promé Lektura : Hechonan di apòstelnan 7, 55-60
Salmo : Salmo 97, 1-2. 6-7. 9
Di dos Lektura : Revelashon 22, 12-14. 16-17. 20
Evangelio : Huan 17, 20-26

E evangelio di awe ta ofresé nos un bunita okashon pa meditá den unidat. E ta bin ta ripití den e último añanan akí ku mundu ke logra integrashon kada be mas grandi entre pueblo i individuonan.Pa medio di FE nos sa ku moveshon di historia ta bai kondusiendo nos na realisashon di e soño asina largu sperá, e union den un solo famia. Nos tur ta anhelá un edat den kua no tin divishon i ku riba tera ta kuminsá un era di pas i di hermandat. Kristu den e ora mas solèm di su bida a resa pa unidat di hende: “Pa tur hende sea un.”
Uni hende ku otro i ku Dios ta e ideal i trabou di Iglesia. Pa e ideal akí si ta bal la pena inbertí tur nos energia. Pero promé laga nos mes un pregunta: Kiko ta unidat? Biba den unidat no ta nifiká pensa igual, sinti mesun kos, ku ta uni tur ser humano den un uniformidat laf i steril. Dos esposo sa ku ta uní no ta nifiká ku kada un mester pèrdè su personalidat. Unidat no ke men renunsiá na nos manera di pensa. Tampoko e ta nifiká semper keda ketu o keda sin defendé konvikshonnan propio.. Kiko e ora ei ta unidat ? Lo splik’é ku un frase hopi ripití, pero berdadero. Unidat ta e armonia kreá di diversidatnan. San Pablo ta splika e konsepto akí ku e imágen di e kurpa humano. “Ta un hecho ku e kurpa, siendo un, tin hopi parti , pero e partinan maske ku nan ta hopi, ta forma entre tur un solo kurpa”. Nos kurpa ta papiando ku nos di un maravioso unidat konstruí a base di diversidat. Ta logra e armonia akí pasobra tur parti di e kurpa ta traha, ta move, ta aktua den funshon di e konhunto.
Sosiedat ta konsistí di un variedat riku di hende. Tin múltiple rasa, lenga i kultura. Kada un ta poseé su propio rikesa.
Pa biba den unidat laga nos kuminsá na aseptá e diversidat ku ta eksistí den mundu. Nos no ta pretendé di biba den un paraiso irealístiko kaminda tur hende ta pensa igual i ta kana riba e mesun kaminda. Laga nos aseptá e desafio pa biba e unidat den e diversidat, pa logra armonia atraves di rèspèt pa variedat. Laga nos ta outéntiko den nos manera di pensa i di aktua i laga nos respetá e forma personal di pensa i di aktua di kada persona, semper i kuando esaki no afektá e bon komun.
Ta logra armonia ora kada hende kontribuí na e bon komun. E dos palabranan aki: bon komun, ta esnan ku mester inspirá nos akshonnan. Ora e interes personal i egoista ta pone su mes dilanti di e bon komun, e ora ei unidat i konkordansha ta kibra.
Kristu, ora e ta resa pa unidat, no ta pensando únikamente den un unidat horizontal, ke men di hende entre un ku otro. “Ku nan tambe ta ku nos”, Hesus a pidi den su orashon na Tata. En bèrdat, no por tin union duradero entre hende si Dios no ta e laso ku ta uni nos.

Sinembargo, kon difísil ainda ta e unidat entre kristiannan. No ta nesesario mira pafó i haña un mundu den guera konstante pa konkluí kon difísil ta di biba den unidat. Ta sufisiente pa nos mira un poko paden di nos mes pa deskubrí den nos propio sentimentu e rais di un divishon profundo. E rais akí ta nos egoismo.
Nos sa ku egoismo ta un forsa ku nos tur ta dirigí t’e na nos propio satisfakshon. Nos por bisa ku komo ser humano nos ta lèn den direkshon di egoismo, pero komo kristian nos mester obra ku amor. Stima ta nifiká sali di nos mes pa proyektá nos mes den direkshon di otro. Ora nos logra konvensé nos mes di e forsa konstruktivo ku amor ta enserá, únikamente e ora ei nos lo kuminsá traha riba e bon komun.
Den eukaristia kada djadumingu, nos ta selebrá e unidat di e famia kristian. Un solo Señor, un solo fe, un solo boutismo, un solo Dios I Tata. Tur loke tin den misa ta papia ku nos di unidat: altá ta e mesa di famia, kaminda komo ruman nos ta sinta pa kome di e mesun pan i pa bebe di e mesun biña. Ku ora nos sali di e tèmpel akí nos bai na praktiká e unidat i komunion ku nos a bin pa selebrá bibando den rèspèt mutuo i den amor, promoviendo e bon komun.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login