Connect with us

Lokal

Shantienne, di dos ruman Frans asesiná na Rotterdam….

Published

on

ROTTERDAM. Menos ku un siman a pasa na Ulanda, ku tabatin otro asesinato di hoben antiano di 34 aña di origen boneriano den Nassauhaven na Rotterdam durante un free-for-all den kual a Santienne tambe a partisipa pero a paga esaki ku su bida.
E pagina digital ‘Boevennieuws’ku ta spesialisa den notisia di krimen a konfirma identidat dje viktima ku ta Shantienne ta ruman di Merwin Junny Frans kende tambe a muri asesiná dos aña pasá.
E pistolero ku nan ta buskando te ainda ta fugitivo a bai tras dje viktima Santienne kende a kore bai pero den bógt di Persoonsstraat den e bario Feijenoord ela slep kai i su rivalnan ku tabata persiguié den outo a hole nan chèns i a basha bala riba nan viktima.
Sinembargo awendia den e barionan peligroso na Rotterdam kasi tur kas tin kámera i den e kaso aki e aparato a graba henter e episodio kaminda por mira praktikamente sintá den palko kon e pistolero ta lòs henter un kashi di bala riba Shantienne kende ta sak den otro i muri.
Seguidamente e matón a kore bai i a drenta den un outo koló di plata ku motor sendé kla pa start sali pa dies minut despues polis haña e outo kimá riba Feijenoordkade.
Awe mainta habitantenan dje bario ainda tabata tembla di miedu pasobra nan a sinta mira loke a pasa for di sala di kas kaminda nan tabata mira televishon.
Doño di e restorant turko Barbados a konta ku su klientenan tabata sinta wak futbòl na televishon ora ela tende un ráfaga di 4 tiru dilanti di su kas. E arma a zona „Taktaktaktak” i tur hende a kore bai bentana i e turko a sera porta na yabi mesora.
Ayera mainta mes polis a haña e outo den kual e pistolero a yega na Feijenoordkade.
E famianan di Shantienne a yega e sitio rapidamente igual ku ambulans pero no por a hasi nada mas. Merwin ‘Junny’ Frans
No ta promé biaha ku e famia ta pèrdè yu den forma violento ku arma di kandela. Shantienne Frans ta ruman Merwin ‘Junny’ Frans ku kriminalnan a likidá dia 19 di mei 2020.
Pe asesinato aki korte a kondena Michelangelo B. i Anderson B. na 18 i 17 aña respektivamente.
E duo maton a sinta warda Merwin (30) den un bùs banda di su kas den e bario Bramentuin na Rotterdam i ora Merwin a Sali for di kurá pa bai su outo nan a tir’é mata. E tirunan a lanta su mama i ruman muhé for di soño i nan a Sali mira nan yu i ruman sangra muri. Asina Shantienne Frans tambe a mira su ruman muri dos aña pasá.
Dia tabatin e kaso kontra e dos sospechosonan dje likidashon di Merwin ‘Junny’ Frans polis mester a detené Shantienne pasobra ela habri porta di sala pa buska moda di bati un dje matonnan. Nunka polis a haña sa pa ki motibu a likidá Merwin ‘Junny’ Frans i ta ken a duna òrdu pa likid’é.

Continue Reading

Lokal

Alumnonan di Skol Sint Antonius a traha modelo di lanthùisnan

Published

on

By

WILLEMSTAD – Loke a kuminsá komo un simpel proyekto pa traha un modelo di e lanthùisnan di Kòrsou pa sera aña eskolar di e grupo 7 di Skol Sint Antonius, a bira un mega proyekto kaminda nan a kombiná varios abilidat pa no únikamente krea e edifisionan monumental, pero tambe kombertí den orador tokante di e pasado riku i e uso aktual di e lanthùisnan.
Tabata un reto i alabes un oportunidat pa koperá ku e muchanan i tambe nan mayornan, pa asina nan por a krea e artenan aki ku a impreshoná hopi ku a mira nan.
CIBC FirstCaribbean a sostené e proyekto, ku no únikamente a saka lo mihó di e alumnonan di Skol Sint Antonius, pero alabes a enkurashá e partisipashon aktivo di nan mayor i a stimulá nan interes den a pasado riku di Kòrsou. Bo por a mira e orguyo den a hobennan ora ku nan a kaba ku nan proyekto i tabata presentá esaki.
Skol Sint Antonius tin komo tradishon pa laga e alumnonan di grupo 7 na fin di aña eskolar hasi un proyekto kaminda ta reta e alumnonan pa demonstrá nan kreatividat. E proyekto di e aña aki a saka mas ku e kreatividat di e studiantenan. E studiantenan, den nan gran mayoria for di e barionan di Santa Maria i Seru Fortuna, a kombiná nan kreatividat riku, nan konosementu di historia, kalkulashon di midí i abilidat di presentá, pa krea i presentá nan proyekto. E proyekto di e studiantenan a bira punto di interes di henter famia kaminda mama i tatanan tabata kontribuí nan parti pa kombertí e modelo den un piesa di arte. E proyekto a logra ku e studiantenan mester a buska informashon, tantu tokante e pasado di e lanthùisnan pero tambe presente.
Tur e studiantenan a kombertí den orador ku bon konosementu di e lanthùis ku nan a traha i presentá.
Un di e maestronan di e klasnan di grupo 7 di Skol Sint Anonius a bisa ku e proyekto aki a saka e mihó for di e studiantenan.
E studiantenan a haña un oportunidat ekselente ku e proyekto aki pa demonstrá nan konosementu i abilidatnan riba varios tereno.
E koperashon den famia a krea un eksperensha úniko ku e hobennan aki lo keda kòrda pa hopi tempu. E maestronan a apresiá e sosten i koperashon di CIBC FirstCaribbean pa kompletá e proyekto ku tabatin un gran impakto riba e hobennan.

Continue Reading

Lokal

Donashon di 50 mil Euro pa Fundashon ku ta kombati problematika di AIDS

Published

on

By

Riba e foto por mira algun miembro di e direktiva di links pa rèks G.Roach, T.Winklaar, H.Offerman i S. Felomina.

Willemstad – Fundashon Plòns Kòrsou (FPK) a risibí un donashon di 50.000 euro durante e findishi ku a tuma lugá na Amsterdam Diner 2022.
Amsterdam Diner tur aña ta organisá e evento aki pa rekouda fondo pa yuda ku diferente proyektonan ku ta yuda pa kombatí e problemátika di HIV/Aids rònt mundu.
Durante di e diner presidente di FPK Harley Offerman a dirigi algun palabra na e publiko presente tokante e importansia pa tin sufisiente fondo pa por sigui yuda e pashèntnan ku ta HIV positivo.
E aña aki Fundashon Plòns Kòrsou a haña e oportunidat pa por forma parti di e findishi ku a tuma lugá durante e diner i rekouda un kantidat di 50 mil euro.
FPK tin 3 proyekto importante pa kuminsá kuné pa por yuda ku e problematika di HIV/Aids na Kòrsou. FPK a skohe e proyektonan basá riba e nesesidat ku ta biba bou di e organisashonnan Cura+, Salú pa tur i Famia Plania.
1. Konsientisá muchanan riba e topikó di HI/Aids
2. Minimalisá/ Eliminá e tabu di HIV/Aids na Kòrsou dor di konsientisá e komunidat i pone mas tantu informashon posibel disponibel
3. Tratamentu i remedi pa indokumentadonan
Esakinan ta 3 di hopi proyektonan ku FPK mester a skohé pa kuminsá kuné.
Lamentablemente ahinda e tópiko di HIV/Aids ta algu ku mayornan, famianan, amigunan i konosinan no ta papia over di dje ni buska informashon konkreto pa informá nan mes di e desaroyonan ku tin riba e tópiko super importante aki. P’esei FPK kier invitá bu pa bishitá e website fundashonplons.com ku nan a desaroyá den 4 idioma. Espesialmente den papiamentu pa tur persona por kompronde i informá nan mes bon.
FPK ta sumamente kontentu ku e donashon ku nan a risibí pa por kontribui na un mihó bida i eksperensia pa e pashèntnan ku ta HIV positivo.

Continue Reading

Lokal

Eugene Middelhof ta bandoná Wardakosta di Karibe Hulandes

Published

on

By

Eugene Middelhof

WILLEMSTAD – Eugene Middelhof ta tuma despedida di Wardakosta di Karibe Hulandes den e Region Karibe. Esaki ta tuma luga 8 di yüli awor.
For di yüli 2017 Eugene Middelhof ta okupá e kargo di Direktor Suplente na Wardakosta. Den su puesto e tabata duna direkshon na diferente proseso dentro di e organisashon, manera entre otro e ‘bedrijfsvoeringsoverleg i e ‘Gemeenschappelijke Medezeggenschapsraad’ (GMR).
Siendo Direktor Suplente e tabata tambe Presidente di e konsulta ku GMR den e organisashon. E la sòru ku e órgano aki ta bon sigurá dentro di Wardakosta. Banda di esei el a esforsá su mes pa otro fasetanan importante den e organisashon, manera integridat, siguridat i medio ambiente, pero tambe el a sòru pa vários funshon den e staf di Wardakosta a ser okupá. Durante e último 5 añanan Eugene a desplegá su mes ku hopi energia i pashon pa Wardakosta i e la duna realse na e kredo ‘Samen Sterk’. E personal di Wardakosta ta gradisí Eugene pa su esfuerso i ta dese’é hopi éksito den su futuro karera.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login