Connect with us

Lokal

Desaroyadónan di proyekto no por saka habitantenan foi nan kas !

Published

on

WILLEMSTAD – Bou di ningun kondishon habitantenan di Rif i besindario no ta bandoná nan kas, pa realisá un proyekto di Resort den nan bario. Ayera noch tabatin un reunion Rif, ku a konta ku asistensia grandi habitante i representa di organisashonnan di bario pa trata e asuntu aki.
Marusca Manuel di Fundashon Rif, a bisa NOBO ku Fundashon Rif a yama e habitantenan pa informa i tambe interkambiá ku e habitantenan enkuanto loke ta pasando. E intenshon dje enkuentro tabata tambe pa e habitantenan na final, indika kiko na ke pa Fundashon Rif por nifika pa nan den e trayekto aki.Marusca Manuel: ‘’E habitantenan a presenta masalmente, mas ku 140 habitante , mas ku sèis representante di bario di otro banda i tambe otro’’.

KIKO TA
PASANDO
Fundashon Rif, na November 2021 a risibi informashon di habitantenan ku tin un grupo, di kua despues ela a haña sa su nòmber. Ta trata di Urban Village Property BV, ku ta ligá ku entre otro Gerrit Schotte, señor Gamers i aparente konsehero Ruthsel Martha.
E grupo aki lo ta kana den bario ku informashon di e habitantenan, akompañá pa e direktor di Fundashon Kas Popular.Na promé instante ora ku Fundashon Rif a puntra kiko ta pasando, a bise ku nada no ta tumando luga. Despues e organisashon di Rif a haña un informashon di un karta firmá ku fecha di 13 di desember 2021, ku lo bende e kasnan den Rif. E proposito ta, pa konstrui un resort, un village turistiko. Esaki tin komo konsekuensia ku e habitantenan mester sali.
Fundashon Rif a haña den su man, un MOU, sin firma ariba kaminda e dokumento ta spesifika kon tur kos mester bai. E MOU ta kontene entre otro un klousula ku ta indika ku e partidonan FKP i e Grupo desaroyadó, ta bai di akuerdo ku oto, ku apsolutamente nada dje proyekto no mag di lèk. Den kaso ku esaki tuma luga tòg, esun ku saka e informashon, mester paga un suma. Manuel ta bisa NOBO, ku esaki ta indikativo ku tin algu ku no ta korekto.
Durante dje reunion ayera nochi e habitantenan a konta tambe, Manuel ta splika, kon nan ta risibi yamada di FKP, ku e pregunta di entre otro kon grandi nan kas ta i si e ta un monumento. Esei ta prueba, segun Manuel ku e patidonan no ta dispone di hopi informashon tokante dje kasnan.
E anochi informativo a konklui ku shete habitante a inskribi pa forma un komishon, ku ta bai formula e strategia pa e sigiente punto di akshon den e kaso aki.
E sigiente paso dje organisashonnan di bario na Rif den e kaso aki ta. Denter di 1 siman, e komishon ta divulga informashon di su plan.

Continue Reading

Lokal

Alumnonan di Skol Sint Antonius a traha modelo di lanthùisnan

Published

on

By

WILLEMSTAD – Loke a kuminsá komo un simpel proyekto pa traha un modelo di e lanthùisnan di Kòrsou pa sera aña eskolar di e grupo 7 di Skol Sint Antonius, a bira un mega proyekto kaminda nan a kombiná varios abilidat pa no únikamente krea e edifisionan monumental, pero tambe kombertí den orador tokante di e pasado riku i e uso aktual di e lanthùisnan.
Tabata un reto i alabes un oportunidat pa koperá ku e muchanan i tambe nan mayornan, pa asina nan por a krea e artenan aki ku a impreshoná hopi ku a mira nan.
CIBC FirstCaribbean a sostené e proyekto, ku no únikamente a saka lo mihó di e alumnonan di Skol Sint Antonius, pero alabes a enkurashá e partisipashon aktivo di nan mayor i a stimulá nan interes den a pasado riku di Kòrsou. Bo por a mira e orguyo den a hobennan ora ku nan a kaba ku nan proyekto i tabata presentá esaki.
Skol Sint Antonius tin komo tradishon pa laga e alumnonan di grupo 7 na fin di aña eskolar hasi un proyekto kaminda ta reta e alumnonan pa demonstrá nan kreatividat. E proyekto di e aña aki a saka mas ku e kreatividat di e studiantenan. E studiantenan, den nan gran mayoria for di e barionan di Santa Maria i Seru Fortuna, a kombiná nan kreatividat riku, nan konosementu di historia, kalkulashon di midí i abilidat di presentá, pa krea i presentá nan proyekto. E proyekto di e studiantenan a bira punto di interes di henter famia kaminda mama i tatanan tabata kontribuí nan parti pa kombertí e modelo den un piesa di arte. E proyekto a logra ku e studiantenan mester a buska informashon, tantu tokante e pasado di e lanthùisnan pero tambe presente.
Tur e studiantenan a kombertí den orador ku bon konosementu di e lanthùis ku nan a traha i presentá.
Un di e maestronan di e klasnan di grupo 7 di Skol Sint Anonius a bisa ku e proyekto aki a saka e mihó for di e studiantenan.
E studiantenan a haña un oportunidat ekselente ku e proyekto aki pa demonstrá nan konosementu i abilidatnan riba varios tereno.
E koperashon den famia a krea un eksperensha úniko ku e hobennan aki lo keda kòrda pa hopi tempu. E maestronan a apresiá e sosten i koperashon di CIBC FirstCaribbean pa kompletá e proyekto ku tabatin un gran impakto riba e hobennan.

Continue Reading

Lokal

Donashon di 50 mil Euro pa Fundashon ku ta kombati problematika di AIDS

Published

on

By

Riba e foto por mira algun miembro di e direktiva di links pa rèks G.Roach, T.Winklaar, H.Offerman i S. Felomina.

Willemstad – Fundashon Plòns Kòrsou (FPK) a risibí un donashon di 50.000 euro durante e findishi ku a tuma lugá na Amsterdam Diner 2022.
Amsterdam Diner tur aña ta organisá e evento aki pa rekouda fondo pa yuda ku diferente proyektonan ku ta yuda pa kombatí e problemátika di HIV/Aids rònt mundu.
Durante di e diner presidente di FPK Harley Offerman a dirigi algun palabra na e publiko presente tokante e importansia pa tin sufisiente fondo pa por sigui yuda e pashèntnan ku ta HIV positivo.
E aña aki Fundashon Plòns Kòrsou a haña e oportunidat pa por forma parti di e findishi ku a tuma lugá durante e diner i rekouda un kantidat di 50 mil euro.
FPK tin 3 proyekto importante pa kuminsá kuné pa por yuda ku e problematika di HIV/Aids na Kòrsou. FPK a skohe e proyektonan basá riba e nesesidat ku ta biba bou di e organisashonnan Cura+, Salú pa tur i Famia Plania.
1. Konsientisá muchanan riba e topikó di HI/Aids
2. Minimalisá/ Eliminá e tabu di HIV/Aids na Kòrsou dor di konsientisá e komunidat i pone mas tantu informashon posibel disponibel
3. Tratamentu i remedi pa indokumentadonan
Esakinan ta 3 di hopi proyektonan ku FPK mester a skohé pa kuminsá kuné.
Lamentablemente ahinda e tópiko di HIV/Aids ta algu ku mayornan, famianan, amigunan i konosinan no ta papia over di dje ni buska informashon konkreto pa informá nan mes di e desaroyonan ku tin riba e tópiko super importante aki. P’esei FPK kier invitá bu pa bishitá e website fundashonplons.com ku nan a desaroyá den 4 idioma. Espesialmente den papiamentu pa tur persona por kompronde i informá nan mes bon.
FPK ta sumamente kontentu ku e donashon ku nan a risibí pa por kontribui na un mihó bida i eksperensia pa e pashèntnan ku ta HIV positivo.

Continue Reading

Lokal

Eugene Middelhof ta bandoná Wardakosta di Karibe Hulandes

Published

on

By

Eugene Middelhof

WILLEMSTAD – Eugene Middelhof ta tuma despedida di Wardakosta di Karibe Hulandes den e Region Karibe. Esaki ta tuma luga 8 di yüli awor.
For di yüli 2017 Eugene Middelhof ta okupá e kargo di Direktor Suplente na Wardakosta. Den su puesto e tabata duna direkshon na diferente proseso dentro di e organisashon, manera entre otro e ‘bedrijfsvoeringsoverleg i e ‘Gemeenschappelijke Medezeggenschapsraad’ (GMR).
Siendo Direktor Suplente e tabata tambe Presidente di e konsulta ku GMR den e organisashon. E la sòru ku e órgano aki ta bon sigurá dentro di Wardakosta. Banda di esei el a esforsá su mes pa otro fasetanan importante den e organisashon, manera integridat, siguridat i medio ambiente, pero tambe el a sòru pa vários funshon den e staf di Wardakosta a ser okupá. Durante e último 5 añanan Eugene a desplegá su mes ku hopi energia i pashon pa Wardakosta i e la duna realse na e kredo ‘Samen Sterk’. E personal di Wardakosta ta gradisí Eugene pa su esfuerso i ta dese’é hopi éksito den su futuro karera.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login