Connect with us

Lokal

Sentensia den kaso inex….. Robo di 600 kilo di kokaina for di warda di polis un frakaso total

Published

on

WILLEMSTAD. Ayera korte di promé instansia a dikta sentensia den e kaso di ladronisia di 600 kilo di kokaina for di warda di polis na Rio Canario, loke a sosodé na òktober 2018.

Ta un kaso ku a sakudí e komunidat di Kòrsou kompletu, a haña atenshon den eksterior i a pone kuerpo polisial internamente ariba abou pasobra no ta nada normal ku ta logra hòrta for di prizon.

Polisnan mes na sierto momento tabatin miedu, tabata deskonfiá otro, no kier a papia i no tabata sa kon anda, mirando e suseso teribel ku a surgi di e ladronisia di droga for di warda di polis. Pa kolmo a resultá ku a uza ekiponan sumamente pisá i sofistiká ku tabata hòrtá for di Brantwer, anto e idea ku aki ta trata di trabounan hasí pa e gèng ARMY a trese ainda mas sustu den tur hende su kurpa, pasobra ta keda demostrá ku e grupo aki klaramente no ta baha kabes pa apsolutamente nada, ningun hende ni instansia.

Awor pa kolmo tur 3 e sospechosonan den e kaso aki, inkluso e agente polisial Mariens Mariano di 33 aña di edat, a sali liber di e akusashon ku nan tabata metí den e kiebro aki den warda di polis na Rio Canario. Korte únikamente por a sentensiá Mariens Mariano na 6 aña kastigu di prizon pa su envolvimentu den importashon di 340 kilo di kokaina, trafikashon i malversashon kometé ku su arma di kandela reglamentario.

Na opinion di korte deklarashonnan di testigunan anónimo no ta pruebanan sufisiente.

Kantidat di testigunan anónimo tabatin, anto pa kolmo ku deklarashonnan ku ta kontradesí otro.

Por ehèmpel tabata papia di testigunan ku a keda identifiká komo A17, A18, A19, A20, A21, A22, pero al final nada kontundente no a bini afó. 5 otro siudadano a keda kondená, pasobra nan tabata metí den e otro trafikashon di droga ariba menshoná.

Un sospechoso a risibí kastigu di trabou di 100 ora i 4 otro sospechoso a haña kastigunan di prizon ku ta varia di 6 pa 24 luna.

Mas aleu den e komunikado ku Ministerio Públiko mes a emití ta bisa ku 2 ruman di 27 i 21 aña a keda kondená na kastigunan di prizon di 3 i 7 aña pa e rason ku nan tabata envolví den menasanan serio ku arma di kandela i poseshon di arma di kandela. E ruman mas hóben (esun di 21 aña di edat) a keda kondená pa preparashonnan hasí pa kometé asesinato, trafikashon di droga i estafa di un empresa di seguro. E siguiente kastigunan a keda diktá pa e personanan menshoná:
– Julio Cesar Sanchez Pretel, kolombiano di 62 aña di edat, 2 siman di prizon, mas un kastigu di trabou di 100 ora i un periodo di prueba di 2 aña.

– Niolan Anthony Lopez Penha di 38 aña di edat, kastigu di prizon di 24 luna.

– Judrick Gregoria Urbano di 27 aña di edat, kastigu di prizon di 36 luna.

– Curtis Ginneton Jones di 38 aña di edat, kastigu di 6 luna.

– Rachid Urbano di 22 aña di edat, kondená na e suma di daño i perwisio di Nafl. 6.243.90

– Alberto Paula Toribio nasé na Repúblika Dominikana di 32 ana di edat, 6 luna di prizon.

– Mariens Migelangelo Mariano (eks agente polisial) di 33 aña di edat, 6 aña kastigu di prizon.

– Ingemar Timothy Tromp di 28 aña di edat 12 luna kastigu di prizon.

Lokal

Biahenan pa eksterior sin resultado pa Kòrsou ta kontinuá!

Published

on

By

Anthony Godett

WILLEMSTAD – – Frakshon partido KEM a tuma nota ku turno a toka e biaha aki na 2 minister(señornan Javier Silvania i Ruisandro Cijntje) di gabinete Pisas 2, pa biaha pa Repúblika Dominikana.
Segun informashon suministrá pa e sekretario di Konseho di Ministernan(karta 25 di novèmber 2022 i ku a drenta parlamento ayera djaluna dia 28 di novèmber, 12.03 mèrdia), e 2(dos) ministernan ta biaha di dia 27 di novèmber te ku 4 di desèmber 2022 pa partisipá na e “XXV Conferencia de Zonas Francas Iberoamerica” di The Free Trade Zones Associations of the Americas (AZFA).
Frakshon KEM tin informashon ku e konferensha ta tuma lugá dianan 1 i 2 di desèmber na Punta Cana, Repúblika Dominikana, den e Hotèl Westin. Djarason dia 30 di novèmber tin programá un bishita na Parques Industriales de Zona Francas. Akinan a parti e gruponan den 2, unu pa shet’or di mainta i e otro pa och’or di mainta. Tarifa di entrada na e parke aki ta $ 300 pa kada miembro di AZFA.
Serka frakshon KEM e pregunta ta surgi mesora, pakiko mester a biaha tantu dia adelantá asina, pa asistí na e konferensha?
Frakshon KEM a bin komprendé, ku un delegashon amplio a realisá e biahe aki. Esaki ta nifiká atrobe gastamentu di plaka di pueblo, kaminda kantidat di hende ta pasando den temporada difísil, pa loke ta trata nan entrada!
4 tema lo ser diskutí durante e konferensha aki: 1.Teknologia/Inovashon, 2. Integrashon, 3. Sostenibilidat i 4. Resistensia.
Esakinan ta keda presentá pa señornan Mohamed al Muallem (visepresidente ehekutivo di DP World), James X Zhan(direktor divishon di invershon i empresanan di e konferensha di Nashonnan Uni tokante Komersio i Desaroyo), David Greenstein(fundadó/CEO di Wonder Brands), Antonio Novas Garcia(partner ehekutivo den kompania Mc Kinsey & Company).
Frakshon KEM ta di opinion, ku niun di e temanan ku lo wòrdu trata próksimamente, ta bai tin resultado pa pueblo di Kòrsou. Esaki , pa siguiente motibunan: 1. VISA pa bishita i kumpra den Zona Franka di Kòrsou. No tin determinashon pa realisá esaki. Tantu bal tin konektividat(aéreo) pero no tin posibilidat di/pa hasi negoshi. 2. No tin e faktornan kritiko di inovashon i teknologia nobo den Zona Franka di Kòrsou esaki ta nifiká ku no tin oumento di produktividat. 3. No tin integrashon i koperashon regional entre Zonanan Franka. Esaki ta stroba invershonnan i benta di tuma lugá. 4. E medio ambiente i e kambio klimatológiko. Mester tene kuenta, ku e kresiente prekupashon pa esakinan i pa Esaki pa e demanda kresiente pa produktonan mas sostenibel.
Frakshon KEM ta konkluí, ku partisipashon na e konferensha ariba menshoná ta di importansia. Esaki pa motibu, ku e invitashon a bini di e minister di Ekonomia i Komersio señor Victor Orlando (Ito) Bisonó, ku e 25 paisnan, ku ta forma e asosashon iberoamerika tei presente. Esakinan ta representá 700 Zona Franka, sòru pa 1 mion di trabou direkto i tin 10.200 empresa instalá den e 25 paisnan indiká. Simultáneamente mester atendé e 4 puntonan mas ariba indiká.
Frakshon KEM ta di opinion, ku NO por sigui hasi biahenan kostoso sin resultado.
Si riba tèrmino hopi kòrtiku NO eliminá e VISA, drecha e produkto pa ofresé invershonistanan i turistanan, Kòrsou ta keda dueila ku kranchi habrí.
Kòrsou su Zona Franka, si NO presentá un kambio den aserkamentu, maneho i tuma desishon, NO por kompetí ku otro Zonanan Franka den region.

Continue Reading

Lokal

Kolegio Erasmo ta selebrá luna di buki a la Bi-ba-bèrdè

Published

on

By

WILLEMSTAD- En konekshon ku Siman di Ban Lesa i luna di buki, Kolegio Erasmo a organisá diferente aktividat pa su alumnonan. E meta di e aktividatnan aki tabata pa animá e muchanan pa lesa i tambe alsa nan interes den buki. A habri e temporada ku Siman di Ban Lesa ku tabata mará na e tema di Bi-Ba-Bèrdè (Gi-Ga-Groen). Durante di e siman aki, diferente persona i outornan di buki, manera Richena Maduro, Denise De Jong-Rekwest i Ronny Lobo, a lesa buki pa e muchanan.
Despues di e siman di apertura, klasnan for di Yogatina (pre-eskolar) te ku grupo 8 a pone èkstra atenshon na tur loke tin di haber ku buki i kuenta. E muchanan a siña tokante di e diferente géneronan di kuenta, eskritornan i ilustradónan. Tambe nan a lesa kuenta pa otro i duna forma na e tema Bi-Ba-Bèrdè bishitando Curaçao Rif Mangrove Park pa siña tokante di e diferente sorto di pal’i mangel ku tin na Kòrsou, funshon di pal’i mangel, historia di e besindario di Ref i tokante di e flora i founa di e parke.
Pa sera e temporado, Kolegio Erasmo a invitá diferente persona konosí den nos komunidat pa bin lesa buki pa e muchanan. Entre e personanan aki tabatin nos minister president, Señor Pisas, Diannitsa Genaro, Glenda Sluis, Kate Ronald Martina Thielman, Judith Heldewier, Nihayra Leona, Bryan Goilo i Miriela Kwidama. Un tiki tokante di Kolegio Erasmo: Kolegio Erasmo un skol di fundeshi ku ta forma parti di Fundashon pa Skol Humanista na Papiamentu. Su fundeshi ta basá riba e filosofia Humanista i e ta e úniko skol na Kòrsou ku su idioma di instrukshon ta kompletamente na papiamentu. E aña aki Kolegio Erasmo ta selebrando su di 35 aña di eksistensia.

Continue Reading

Lokal

Señora divorsiá a bai reklamá pero….. Ya Inspektor a laga paga restitushon na èks esposo

Published

on

By

WILLEMSTAD Un korto sirkuito entrega di e aanslag definitivo riba balor di un kas di un pareha ku a divorsia a pone ku maske titulo di propiedat dje kas tabata riba nòmber dje muhé, Inspektor a duna òrdu pa paga e èks esposo e restitushon ku a paga di más na OZB tempu e pareha tabata kasá ainda.
E aanslagnan preliminar no tabata riba

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login