Sentensia den kaso inex….. Robo di 600 kilo di kokaina for di warda di polis un frakaso total

WILLEMSTAD. Ayera korte di promé instansia a dikta sentensia den e kaso di ladronisia di 600 kilo di kokaina for di warda di polis na Rio Canario, loke a sosodé na òktober 2018.

Ta un kaso ku a sakudí e komunidat di Kòrsou kompletu, a haña atenshon den eksterior i a pone kuerpo polisial internamente ariba abou pasobra no ta nada normal ku ta logra hòrta for di prizon.

Polisnan mes na sierto momento tabatin miedu, tabata deskonfiá otro, no kier a papia i no tabata sa kon anda, mirando e suseso teribel ku a surgi di e ladronisia di droga for di warda di polis. Pa kolmo a resultá ku a uza ekiponan sumamente pisá i sofistiká ku tabata hòrtá for di Brantwer, anto e idea ku aki ta trata di trabounan hasí pa e gèng ARMY a trese ainda mas sustu den tur hende su kurpa, pasobra ta keda demostrá ku e grupo aki klaramente no ta baha kabes pa apsolutamente nada, ningun hende ni instansia.

Awor pa kolmo tur 3 e sospechosonan den e kaso aki, inkluso e agente polisial Mariens Mariano di 33 aña di edat, a sali liber di e akusashon ku nan tabata metí den e kiebro aki den warda di polis na Rio Canario. Korte únikamente por a sentensiá Mariens Mariano na 6 aña kastigu di prizon pa su envolvimentu den importashon di 340 kilo di kokaina, trafikashon i malversashon kometé ku su arma di kandela reglamentario.

Na opinion di korte deklarashonnan di testigunan anónimo no ta pruebanan sufisiente.

Kantidat di testigunan anónimo tabatin, anto pa kolmo ku deklarashonnan ku ta kontradesí otro.

Por ehèmpel tabata papia di testigunan ku a keda identifiká komo A17, A18, A19, A20, A21, A22, pero al final nada kontundente no a bini afó. 5 otro siudadano a keda kondená, pasobra nan tabata metí den e otro trafikashon di droga ariba menshoná.

Un sospechoso a risibí kastigu di trabou di 100 ora i 4 otro sospechoso a haña kastigunan di prizon ku ta varia di 6 pa 24 luna.

Mas aleu den e komunikado ku Ministerio Públiko mes a emití ta bisa ku 2 ruman di 27 i 21 aña a keda kondená na kastigunan di prizon di 3 i 7 aña pa e rason ku nan tabata envolví den menasanan serio ku arma di kandela i poseshon di arma di kandela. E ruman mas hóben (esun di 21 aña di edat) a keda kondená pa preparashonnan hasí pa kometé asesinato, trafikashon di droga i estafa di un empresa di seguro. E siguiente kastigunan a keda diktá pa e personanan menshoná:
– Julio Cesar Sanchez Pretel, kolombiano di 62 aña di edat, 2 siman di prizon, mas un kastigu di trabou di 100 ora i un periodo di prueba di 2 aña.

– Niolan Anthony Lopez Penha di 38 aña di edat, kastigu di prizon di 24 luna.

– Judrick Gregoria Urbano di 27 aña di edat, kastigu di prizon di 36 luna.

– Curtis Ginneton Jones di 38 aña di edat, kastigu di 6 luna.

– Rachid Urbano di 22 aña di edat, kondená na e suma di daño i perwisio di Nafl. 6.243.90

– Alberto Paula Toribio nasé na Repúblika Dominikana di 32 ana di edat, 6 luna di prizon.

– Mariens Migelangelo Mariano (eks agente polisial) di 33 aña di edat, 6 aña kastigu di prizon.

– Ingemar Timothy Tromp di 28 aña di edat 12 luna kastigu di prizon.