Connect with us

Sosial

Ride for the Roses ta reanudá su aktividatnan

Published

on

WILLEMSTAD – Despues ku obligatoriamente durante dos aña tras di otro mester a pone tur kos ‘on hold’ pa motibu di e restrikshonnan a konsekuensia di e pandemia di corona, awor fundashon Ride for the Roses (RFTR) a start e mashin di nobo pa fin di e aña aki i mesora den e aña nobo 2023 organisá atrobe e aktividatnan di Ride, Walk & Swim for the Roses. Durante un konferensia di prensa den presensia di gerensia di e patrosinador prinsipal ORCO Bank a duna un relato kiko tin den tapara pa e próksimo periodo. Pa tradishon ta rekoudá huntu ku komunidat fondo pa por sigui sostené Prinses Wilhelminafonds (PWF) tur luna den e lucha kontra kanser i pa por duna guia na pashènt di kanser i nan famia. Ultimo dos aña RFTR tabata den e posishon pa kontinuá ku e sosten na PWF, pero a bira tempu pa suplementá e reserva na fondo. Durante e anunsio di e temporada nobo di RFTR a hasi uso di e oportunidat pa lansa e website nobis di e fundashon.

Despues di palabranan di bonbiní, presidente di RFTR Robbin Martina a kuminsá anunsiá mesora e programa di aktividat ku tin planiá pa e lunanan ku a sobra pa e aña aki i kuminsamentu di 2023. Ku doló na kurason e organisashon a opservá ku kada bes mester a wanta ku tur plan, ya ku tabata imposibel pa organisá evento, muy en espasial Walk for the Roses ku pa hopi tempu kaba ta konsiderá un di e eventonan mas popular, pero tambe deportivo i ku partisipashon masal na Kòrsou. E fondonan ku RFTR a generá den e añanan anterior ku kua ta sostené PWF mensualmente, no ta inagotabel. Señora Frida Geller, presidente di PWF, a gradisí Ride pa e sosten mensual ku a keda bini tambe den e periodo ketu di COVID. Pa por kompensá e redukshon di kapital ta konta un biaha mas riba koperashon di e komunidat na e aktividatnan ku a plania pa rekoudá fondo.

Art for the Roses
En koperashon ku Landhuis Bloemhof, Number Ten i e Katedral di Sumpiña ta trahando na e proyekto multidisiplinario Art for the Roses ku ta tuma lugá for di meimei di òktober un luna largu ku diferente aktividat i ku ta kulminá na e findishi di arte dia 19 di novèmber. Resientemente a dediká publisidat kaba na e proyekto partikular aki. Na su debido tempu lo sigui duna informashon adishonal pa nan tur resultá eksitoso.

Website
Den e periodo tras di lomba a traha bou di guia profeshonal di Profound i Socialutions Caribbean na un website nobo di RFTR. Aparte ku e profeshonalisá esaki mas, awor ku e website di RFTR estilo nobo por hasi donashon on-line, entre otro for di eksterior. Esaki ta habri e posibilidat pa persona i instansia pafó di Kòrsou tambe hasi donashon pa e bon kousa ku RFTR ta para p’e. Durante e enkuentro ku prensa simbólikamente a lansa e website aki: www.ridefortheroses.net.

Pelíkula
Atrobe, den koperashon estrecho ku The Movies, ta bai organisá un anochi spesial di pelíkula di kua loke e ta generá na entrada ta bai pa e meta di RFTR. Djaweps dia 3 di novèmber The Movies ta pone un sala disponibel pa presentá e pelíkula ‘Amsterdam’, ku e luna ei mes lo konosé su estreno mundial. Nan ta deskribí e pelíkula komo un komedia misterioso di direktor David O. Russell. E protagonistanan ta entre otro Robert de Niro, Chris Rock, Taylor Swift, Christian Bale, John David Washington i Margot Robbie. Storia di e sine ta ku tres amigu ta haña nan envolví den un kaso misterioso di asesinato den historia di Amsterdam kaminda a apuntá nan mes komo sospechoso, pero nan ta logra resolvé e kaso. Parsialmente loke ta tuma lugá den e pelíkula a sosdé den añanan 30 di siglo pasá na e kapital Hulandes.

Ride for the Roses 2023
Riba un djadumingu den kareda di di dos mitar di yanüari òf na kuminsamentu di febrüari 2023 lo konosé e regreso di Ride, Walk en Swim for the Roses. A saka e esenarionan di e último edishon di febrüari 2020 pa monta tur kos manera a hasi den pasado – i pa bolbe hasi’é un éksito. Durante e último dos añanan hopi hende a anhelá na esaki.
Direktiva di RFTR ta brota di entusiasmo pa reanudá e aktividatnan. Pa algun tempu kaba tin dos miembro nobo di direktiva, esta Harry Huijzers (tesorero) i Sayenne Dennert-Dick. E otro miembronan di direktiva ta Robbin Martina (presidente), Benno van Leeuwen (sekretario), Raoul Hooftman, Arthur Rosaria, Maria-Helena Seferina-Rojas, Jessica Russel-Lucasius, Frans Heiligers i ku respaldo di e trenu Justin Pries.

Spònser prinsipal Orco
Orco Bank komo spònser prinsipal, representá pa su Managing Director señora Désirée Alberto, a yama bonbiní na e organisashon Ride for the Roses pa huntu divulgá e programa pa 2022 i 2023 na e públiko grandi. Ya mas mas ku 15 aña e evento “Ride, Walk and Swim for the Roses” ta e evento mayó di aña di Orco Bank. Mas ku 10 mil partisipante riba pia na kuminsamentu di aña, durante diferente aktividat ku tin un efekto positivo riba salú físiko pero tambe mental, esta kana, landa i kore baiskel. Dos aña largu lamentablemente no por a organisá e evento aki pa motibu di COVID-19, pero Orco Bank ta persistí den su kompromiso pa krea konsiensia i proklamá ku por kura di kanser!
Ku orguyo grandi nos a mantené nos sosten na Fondo Prinsesa Wilhelmina durante e pandemia di dos aña pa loke ta ehekutá e tareanan karitativo i sostenedó pa pashènt di kanser i nan famia. Huntu ku nos partnernan, Ride for the Roses i PWF, nos por indiká ku entusiasmo ku nos ta kontinuá ku e proyekto “Ride, Walk and Swim for the Roses” i otro proyekto, pasobra nos ta realisá e balor di esaki pa nos komunidat, pero spesialmente pa nos pashèntnan di kanser i nan famia ku tur dia ta lucha pa nan salú i bienestar. Orco Bank ta keda hasi esfuerso i sigui ku su kontribushon na komunidat di Kòrsou ku entusiasmo.

Continue Reading

Lokal

Kompetensia di skolnan ‘E skol di futuro’

Published

on

By

Willemstad – CORE N.V. ta kumpli su di 25 aniversario na luna di mart di 2022. Komo muestra di gratitut i kompromiso pa ku komunidat, CORE N.V. ta organisá un kompetensia pa Skolnan di Fundeshi. E kompetensia aki ta pa stimulá i inspirá alumnonan pa pensa riba e impakto ku teknologia tin riba futuro di enseñansa mirá for di nan perspektiva. E skolnan ku partisipá tin chèns pa gana 5000, 3000 i 2000 florin.

CORE N.V. ta brinda solushonnan di Teknologia di Informashon (IT) i “Cloud” na kompanianan den sektor públiko i sektor privá. CORE N.V. su mishon ta:

“To be the reliable IT and Cloud solutions provider, adding value to the business operations, through our professional and committed staff and secure infrastructure.”

Último añanan, teknologia a krese drástikamente i desaroyonan riba e área aki tin impakto riba kompanianan i nos komunidat. Esaki lo bai trese kambionan grandi riba nos manera di traha i hasi sierto kosnan. Nos sistema di enseñansa tambe lo bai eksperensiá esaki.

Den e kuadro aki CORE N.V. ke envolví skolnan, en partikular Skolnan di Fundeshi, na e selebrashon di su 25 aña di aniversario ku tin komo tema prinsipal “Empowering Tomorrow”.

Gustosamente CORE N.V. ta invitá tur skol di Fundeshi pa partisipá na e kompetensia di skol akí, ku tin komo meta pa duna alumnonan di Grupo 7 un bos i espasio pa kompartí nan vishon kon por integrá teknologia den nan ambiente di edukashon na un forma kreativo. Pa e kompetensia aki e alumnonan mester visualisá futuro di e tendensianan, asina yamá “trends”, di teknologia i presentá esaki pa medio di un modelo físiko (makèt, obra di arte, pintura) òf un modelo digital ku ta mustra kon nan skol di futuro lo ta i tur e posibilidatnan ku nan ta mira. E skolnan ku klasifiká pa e final lo mester presentá nan konsepto na un hurado ku lo skohe e 3 ganadónan final ku lo bai ku e gran premionan kas.

Skolnan ku ta deseá pa partisipá por registrá te ku 16 di desèmber próksimo via di [email protected] . E último fecha pa entregá e presentashon di kada skol ta 27 di yanüari di 2023. Pa 30 di yanüari lo anunsiá e finalistanan ku lo partisipá na e final di e kompetensia dia 2 di febrüari di 2023.

Continue Reading

Sosial

Rapper Jon Tarifa ta kolaborá ku kantante Darren Gardner den ‘When I was Younger’

Published

on

By

Rapper Jon Tarifa

WILLEMSTAD – Ku e kansion, ‘When I Was Younger,’ rapper Jon Tarifa, huntu ku kantante i eskritor Darren Gardner, ta ilustrá kon fasinante e mente di un mucha ta, unda nada ta strob’e pa perseverá i eksplora mundu.
E impulso pa eksplora teritorio deskonosí a hiba Darren, ku originalmente ta di Port Elizabeth, Suráfrika, te na Hulanda, unda na 2016 ela muda pa forma su bida ku su pareha Elsa. Na Hulanda ela haña e oportunidat di sigui desaroyá su talento musikal, unda ela traha ku diferente artista di tanda manera DJ Martin Garrix i ganadó di e premio Grammy Chris Henderson. Tambe Darren a skibí i areglá komposishonnan musikal pa, entre otro, Berget Lewis, i ZO Gospel Choir. Darren ta konsiderá e talentoso kantante i areglista kurasoleño, Stanley Clementina, komo su mentor, kende a introdusí’e na e industria musikal hulandes. Di e manera aki, Darren a keda eksponé na e diferente influensia musikal krioyo i a desaroyá un konekshon bunita ku nos islanan.
Ken ta Darren Gardner?
Darren Gardner a studia músika klásiko na Universidat di Pretoria na Suráfrika, unda ela spesialisá den Vokalisashon Klásiko i Ingeniera di Sonido, pero su amor pa músika ta bin di kas. Darren a lanta den un famia ku a eksponé na artistanan manera, the Beatles, Nat King Cole, Dionne Warwick, Mariah Carey, Lauryn Hill, i asta kompositornan klásiko manera Mozart i Beethoven. Konsekuentemente, Darren su músika ta saturá pa influensianan di pop, R&B i jazz. Komo estudiante, Darren a diskubrí su pashon pa arte ora ela forma parti di vários koro di skol i a presentá riba diferente tarima. Despues di a forma parti di algun banda, Darren a opta pa kontinuá komo solista i kontinuá traha riba su karera komo kantante i eskritor. Na 2020, Darren a partisipá na Holland Got Talent i duna un presentashon impreshonante ku ‘I Wish’ di Stevie Wonder, unda ela kanta i utilisá un diferente instrumento huntu ku un mashin di drùm pa konstruí e ritmo di e kantika.
Kolaborashon ku Jon Tarifa
Ku e proyekto aki, Darren a kolaborá ku e talentoso rapper albanes, Jon Tarifa, ku tambe ta basá na Hulanda, ken a pone su toke úniko riba e bunita konsepto musikal. E videoclip di ‘When I Was Younger’ a keda dirigí pa ItsmeKenny na Hulanda i Jon Tarifa a editá e produkto final. Darren a traha e konsepto i melodia di ‘When I Was Younger’ i a pone e base pa e areglo, pa despues laga produktor Wesley Nuis finalisá e kantika.
Jon Tarifa no ta un artista deskonosí pa nos aki na Kòrsou, despues ku ela skor un hit na 2011 ku su debut titulá “So Right’. Tambe ela keda invitá e aña ei pa presentá na Curaçao North Sea Jazz Festival ku kantante Levi Silvanie. Aktualmente, Jon ta biba na Bali, Indonesia, I e ta den e etapanan final di finalisá su album nobo, ku ta karga ku yen vibrashon isleño.
Plannan pa futuro
Aktualmente Darren ta trahando riba un EP ku e ta spera di lansa na 2023, pero ya ela duna nos un ñapa ku ‘When I Was Younger’. “Tempu nos tabata yòn, nos tur a soña i a aspirá pa un dia bira algu grandi,” Darren ta splika. E kantika ta papia netamente di e nostalgia ei i kon e mucha di paden ta biba den nos tur. Aktualmente Darren ta trahando riba su siguiente piesa ku guitarista i produktor Wesley Nuis, i ta spera di publiká esaki na kuminsamentu di 2023.
Bo por sigui Darren Gardner su músika via di su Instagram @darrengardnermusic pa keda na altura di su presentashonnan. Tambe por wak e clip di ‘When I Was Younger’ riba e página di You Tube di Jon Tarifa na https://youtu.be/rQt4qAr5LyA

Continue Reading

Sosial

“I’m Moving On” kansion di aña Premio Edgar Supriano 2022

Published

on

By

Axel Pikero

WILLEMSTAD – Ayera nochi tabata un dia grandi pa musikonan i Asosiashon di Músiko i Artista di Kòrsou. Na ‘The Stage’ den Sambil a tuma lugá entrega di “Premio Edgar Supriano 2022’, alabes AMAK a probecha presentá su logo nobo.
Ta asina ku durante algun dia, tur esnan ku tin relashon ku farándula di Kòrsou tabata tin e oportunidat pa postulá nan kandidatonan pa e 12 kategorianan di Premio Edgar Supriano 2022, mas 5 premiashon ku motivashon.
Despues ku e periodo pa vota a sera, un komishon independiente a repasá esakinan i a presentá e diferente nominadonan ku ta bini na remarke pa gana e tan kudisiá: Premio Edgar Supriano.
E nominadonan ta:
1. Artista Nobo di aña 2022
· Kirsten Mare
· B’Jay
· Ross
· Ganadó: B’Jay

2. Grupo Rítmiko di aña 2022
· Den chikí
· Grik
· Orirí
· Grupo Kompèr
· Ganadó: G.R.I.K.

3. Grupo di Tambú di aña 2022
· Limania
· Ruta
· Zojojo
· Ganadó: Grupo Ruta

4. Kansion Urbano di aña 2022
· Sekreto ( Nello)
· Balaclava ( B’Jay)
· Enemies ( Nello)
· Ganadó: Sekreto
5. Artista Urbano di aña 2022
· Nello
· B’Jay
· Lady Lava
· Ganadó: Nello

6. Entertaiment Band di aña 2022
· 501
· Dolce Band
· Highway Band
· Relax Band
· Ganadó: Dolce Band

7. Kantante di Kòmbèk di aña 2022
· Shurman Aniseta
· Ponche Martes
· Kenneth Hooi
· Ganadó: Kenneth Hooi

8. Agrupashon Musikal di Kòmbèk di aña 2022
· Classic XD
· Zudup Hopi Forsa
· Sabor Original
· Ganadó: Zudup Hopi Forsa

9. Kansion di Kòmbèk di aña 2022
· I’m moving on
· Orea pa’bo so
· Focus pa dilanti
· Ganadó: I’m moving on

10. Banda Ritmo Kombiná di aña 2022
· Icons
· ERA
· GIO
· One Flavaz
· Ganadó: One Flavaz

11. Kantante General di aña 2022
· Hunneley Felicia
· Gilbert “Dibo” Doran
· Djuric Virginie
· Ñaño Rosario
· Ganadó: Djuric Virginie

12. Kansion General di aña 2022
· For Real ( Hunneley Felicia)
· I’m moving on ( Djuric Virginie)
· Orea pa bo so ( Ñaño Rosario)
· Ganadó: I’m moving on (kantante Djuric Virginie, areglo i komposishon di Axel Pikero).

Banda di e 12 kategorianan di Premio Edgar Supriano pa esnan ku a destaká nan respektivo kategoria, AMAK e aña aki tambe ta presentá ku 5 premio èkstra ku ta kai bou di e kategoria di: Premiashon ku motivashon.
E premionan aki ta:
· Kantante Tambú Popular di aña 2022 a bai pa Tula
· Kantante Tambú Kultural di aña 2022 a bai pa Sherwin ‘Pincho’ Anita
· Kompositor General di aña 2022 pa Gilbert ‘Gibi’ Doran
· Premio Logro Eksepshonal pa Gibi Doran pa aktiva bèk e dos agrupashonnan musical, Gio Legends I Doble R Puru.
· Premio Prestigio pa Dibo Doran i Randal Corsen

Un pabien na tur esnan ku a keda nominá I speshalmente esnan ganadó Premio Edgar Supriano den nan kategorianan.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login