Sosial
Ride for the Roses ta reanudá su aktividatnan
WILLEMSTAD – Despues ku obligatoriamente durante dos aña tras di otro mester a pone tur kos ‘on hold’ pa motibu di e restrikshonnan a konsekuensia di e pandemia di corona, awor fundashon Ride for the Roses (RFTR) a start e mashin di nobo pa fin di e aña aki i mesora den e aña nobo 2023 organisá atrobe e aktividatnan di Ride, Walk & Swim for the Roses. Durante un konferensia di prensa den presensia di gerensia di e patrosinador prinsipal ORCO Bank a duna un relato kiko tin den tapara pa e próksimo periodo. Pa tradishon ta rekoudá huntu ku komunidat fondo pa por sigui sostené Prinses Wilhelminafonds (PWF) tur luna den e lucha kontra kanser i pa por duna guia na pashènt di kanser i nan famia. Ultimo dos aña RFTR tabata den e posishon pa kontinuá ku e sosten na PWF, pero a bira tempu pa suplementá e reserva na fondo. Durante e anunsio di e temporada nobo di RFTR a hasi uso di e oportunidat pa lansa e website nobis di e fundashon.
Despues di palabranan di bonbiní, presidente di RFTR Robbin Martina a kuminsá anunsiá mesora e programa di aktividat ku tin planiá pa e lunanan ku a sobra pa e aña aki i kuminsamentu di 2023. Ku doló na kurason e organisashon a opservá ku kada bes mester a wanta ku tur plan, ya ku tabata imposibel pa organisá evento, muy en espasial Walk for the Roses ku pa hopi tempu kaba ta konsiderá un di e eventonan mas popular, pero tambe deportivo i ku partisipashon masal na Kòrsou. E fondonan ku RFTR a generá den e añanan anterior ku kua ta sostené PWF mensualmente, no ta inagotabel. Señora Frida Geller, presidente di PWF, a gradisí Ride pa e sosten mensual ku a keda bini tambe den e periodo ketu di COVID. Pa por kompensá e redukshon di kapital ta konta un biaha mas riba koperashon di e komunidat na e aktividatnan ku a plania pa rekoudá fondo.
Art for the Roses
En koperashon ku Landhuis Bloemhof, Number Ten i e Katedral di Sumpiña ta trahando na e proyekto multidisiplinario Art for the Roses ku ta tuma lugá for di meimei di òktober un luna largu ku diferente aktividat i ku ta kulminá na e findishi di arte dia 19 di novèmber. Resientemente a dediká publisidat kaba na e proyekto partikular aki. Na su debido tempu lo sigui duna informashon adishonal pa nan tur resultá eksitoso.
Website
Den e periodo tras di lomba a traha bou di guia profeshonal di Profound i Socialutions Caribbean na un website nobo di RFTR. Aparte ku e profeshonalisá esaki mas, awor ku e website di RFTR estilo nobo por hasi donashon on-line, entre otro for di eksterior. Esaki ta habri e posibilidat pa persona i instansia pafó di Kòrsou tambe hasi donashon pa e bon kousa ku RFTR ta para p’e. Durante e enkuentro ku prensa simbólikamente a lansa e website aki: www.ridefortheroses.net.
Pelíkula
Atrobe, den koperashon estrecho ku The Movies, ta bai organisá un anochi spesial di pelíkula di kua loke e ta generá na entrada ta bai pa e meta di RFTR. Djaweps dia 3 di novèmber The Movies ta pone un sala disponibel pa presentá e pelíkula ‘Amsterdam’, ku e luna ei mes lo konosé su estreno mundial. Nan ta deskribí e pelíkula komo un komedia misterioso di direktor David O. Russell. E protagonistanan ta entre otro Robert de Niro, Chris Rock, Taylor Swift, Christian Bale, John David Washington i Margot Robbie. Storia di e sine ta ku tres amigu ta haña nan envolví den un kaso misterioso di asesinato den historia di Amsterdam kaminda a apuntá nan mes komo sospechoso, pero nan ta logra resolvé e kaso. Parsialmente loke ta tuma lugá den e pelíkula a sosdé den añanan 30 di siglo pasá na e kapital Hulandes.
Ride for the Roses 2023
Riba un djadumingu den kareda di di dos mitar di yanüari òf na kuminsamentu di febrüari 2023 lo konosé e regreso di Ride, Walk en Swim for the Roses. A saka e esenarionan di e último edishon di febrüari 2020 pa monta tur kos manera a hasi den pasado – i pa bolbe hasi’é un éksito. Durante e último dos añanan hopi hende a anhelá na esaki.
Direktiva di RFTR ta brota di entusiasmo pa reanudá e aktividatnan. Pa algun tempu kaba tin dos miembro nobo di direktiva, esta Harry Huijzers (tesorero) i Sayenne Dennert-Dick. E otro miembronan di direktiva ta Robbin Martina (presidente), Benno van Leeuwen (sekretario), Raoul Hooftman, Arthur Rosaria, Maria-Helena Seferina-Rojas, Jessica Russel-Lucasius, Frans Heiligers i ku respaldo di e trenu Justin Pries.
Orco Bank komo spònser prinsipal, representá pa su Managing Director señora Désirée Alberto, a yama bonbiní na e organisashon Ride for the Roses pa huntu divulgá e programa pa 2022 i 2023 na e públiko grandi. Ya mas mas ku 15 aña e evento “Ride, Walk and Swim for the Roses” ta e evento mayó di aña di Orco Bank. Mas ku 10 mil partisipante riba pia na kuminsamentu di aña, durante diferente aktividat ku tin un efekto positivo riba salú físiko pero tambe mental, esta kana, landa i kore baiskel. Dos aña largu lamentablemente no por a organisá e evento aki pa motibu di COVID-19, pero Orco Bank ta persistí den su kompromiso pa krea konsiensia i proklamá ku por kura di kanser!
Ku orguyo grandi nos a mantené nos sosten na Fondo Prinsesa Wilhelmina durante e pandemia di dos aña pa loke ta ehekutá e tareanan karitativo i sostenedó pa pashènt di kanser i nan famia. Huntu ku nos partnernan, Ride for the Roses i PWF, nos por indiká ku entusiasmo ku nos ta kontinuá ku e proyekto “Ride, Walk and Swim for the Roses” i otro proyekto, pasobra nos ta realisá e balor di esaki pa nos komunidat, pero spesialmente pa nos pashèntnan di kanser i nan famia ku tur dia ta lucha pa nan salú i bienestar. Orco Bank ta keda hasi esfuerso i sigui ku su kontribushon na komunidat di Kòrsou ku entusiasmo.
