Djasabra 9 di aprel tabatin e Final di Arte di Palabra Kòrsou, kompetensia literario pa alumno di enseñansa avansá. Durante di e kompetensia akí, 43 alumno di diferente skol avansá di Kòrsou a partisipá ku sea un kuenta kòrtiku òf un poema di nan mes òf di un otro outor.
Bo por mira tur e partisipantenan riba YouTube (kanal 80 Total Hermanito ) i Djasabra awó 2 or na Telecuraçao.
Na inisio di e kompetensia Elvira Bonafacio, koordinadó general di Arte di Palabra Kòrsou a elogiá tur partisipante tantu di preselekshon komo final pa nan kurashi i a para ketu na e echo ku nan ta un ganadó lòs for di e resultado di e hurado. Tambe el a gradisí tur dosente, guiadó, kolaboradó, boluntario i spònser ku ta hasi e kompetensia posibel. Minister di Enseñansa, Siensia, Kultura i Deporte señor Sithree van Heydoorn tabata presente pa disfrutá di talento di e hóbennan i pa mustra su sosten na e aktividat. El a dirigí palabra na e públiko elogiando e hóbennan i enfatisando e importansia di kultivá nan talento i nos kultura.
Durante e evento a duna homenage na diferente persona i instansia ku a kontribuí na papiamentu. E aña akí e baluartenan di papiamentu ku a risibí e Tapushi Literario ta: Bianca Neman i Bernadette Heiligers
Tur dos baluarte a gradisí pa e honor di forma parti di e gran kantidat di persona ku a risibí e Tapushi Literario durante tur 23 aña. Bianca Neman a presentá un poema i Bernadette Heiligers a dediká e Tapushi Literario na Komishon Arte di Palabra.
Durante di final di Arte di Palabra ABC lo entregá e Tapushi Literario na e baluartenan di Aruba, Ruthy Vrieswijk-Bergen i Boneiru, Emma J. Sint Jago

Tambe e 30 ganadónan di e di 15 kompetensia di haiku Elis Juliana. Gilltaly Doran a puntra kada outor pa lesa nan haiku i pa splika kiko a inspirá nan pa skirbi esaki. Gilltaly a mustra riba e resultado den e kategoria di adulto, den kua promé, di dos i di tres lugá a bai pa respektivamente Boneiru, Kòrsou i Aruba.

Despues di esaki a revelá e ganadónan di e kategoria di rèp ku ta tuma luga pa di dos aña. E duo ganadó di Juan Pablo Duarte a bolbe presentá nan rèp ku a a pone tur esnan presente move.
Na final, a premia e finalistanan di e seis kategorianan di e kompetensia Arte di Palabra. Kada skol a animá su representantenan di un manera masha spesial. Ganadónan di promé, di dos i di tres lugá di tur seis kategoria lo representá Kòrsou 28 di mei na e Kompetensia Arte di Palabra ABC ku lo tuma lugá na K-Center Kòrsou.

Fundashon Arte di Palabra ta gradisí tur ku a hasi e fiesta literario akí posibel ku nan aporte material i/òf inmaterial. Nos ta gradisí nos spònsernan prinsipal: Maduro & Curiel’s Bank, Prins Bernhard Cultuurfonds Caribisch Gebied i Fundashon pa Planifikashon di Idioma. Tambe nos nos ta yama danki na QB Multi Productions ku a bolbe hasi e transmishon bibu posibel di manera ku un i tur, por a disfrutá di e eksposishon di talento di nos hóbennan i selebrashon di nos idioma papiamentu.
Por wak grabashon di e kompetensia riba e página di Facebook i Youtube: artedipalabra, i e página di youtube: Kanal80Total Hermanito.
Un danki ta bai tambe na Hermanito pa e grabashon durante 22 aña, Rock88 pa transmishon, Inspiracion pa e bunita dekòr, Massive Productions pa e zonido nítido i K-Center pa nan hospitalidat di 17 aña.
E portrètnan ta di sr. David Homoet