Lokal
Pa paga debe di € 14.965,05……… Ansiano mester bende edifisio di NAf. 200.000 na Kòrsou
WILLEMSTAD. Antayera un tribunal na Den Haag a ordená un sosiedat di Kas di Retiro pa Hende Grandi na Ulanda pa bai di akuerdo ku e proposishon ku Curator di un ansiano Kurasoleño di 86 a hasi pa tuma nan parti di un debe di 14.965,50 Euro ku e ansiano tin na seis instansia ulandes.
Pero e no por paga e debe pasobra ta un penshun chikitu e ta haña di SVB na Kòrsou ademas di un kompensashon di Onderstant na Ulanda ku huntu no ta yega ne suma minimo ku gobiernu ta usa pa un persona ta haña pa por biba normal.
Atministrador dje bienes dje ansiano a demanda Metterwoon Vastgoed B.V., na Den Haag i a hasi e petishon na Korte pa obligá Metterwoon di aseptá e areglo di pago dje debe.
E ansiano no por tabata presente na tratamentu dje kaso pasobra su kondishon fisiko i mental ta demasiado frágil.
Wes mester a tuma un desishon riba e proposishon pa parti € 14.965,05 na 6 akreedor di kual Metterwoon suma ta reklamá un pago di € 7.133,36 ku ta 47,67% dje debe total.
E atministrador dje ansiano aña pasá a ofresé dos areglo di pago kaminda ta paga akreedor un porsentahe di 10,95% dje debe den 3 aña i resto dje debe nan a perdoná e ansiano.
Tur otro akreedor ku e ansiano debe a bai di akuerdo ku e proposishon, te korporashon di bibienda so ta ‘ligge dwars’.
E atministrador dje ansiano a splika wes ku e korporashon no por ninga e oferta pasobra tur e 5 otro instansianan a bai di akuerdo ku e areglo.
Tin un posibilidat rasonabel ku e plaka pa paga e debenan lo tei pasobra e ansiano tin un inmueble na Kòrsou ku nan tin ku chèk kuantu e ta bal.
Hecho ta ku SVB a laga balotá e propiedat pa si bendé por paga tur akreedor pero e korporashon di bibienda no ta kere den web’i gai pasobra nan no sa mes ki e propiedat bal.
For di aña pasá nan ta wardando riba benta dje propiedat i no tin otro fuente di entrada riba kual e korporashon tin preferensia pa haña su sèn.
Wes a splika e partidonan ku tur akreedor ta liber pa desea di haña pago kompleto di loke e homber debe nan i ta bou di sirkunstansianan masha eksepshonal por obligá un akreedor pa aseptá un areglo.
E areglo ku tin riba mesa ta enserá ku e akreedornan (schuldeisers) ta pèrdè parti di loke nan mester haña.
Awor ta na wes pa disidi si e proposishon di pago ta rasonabel of laga i si e negativa dje korporashon tambe ta hustifika.
Wes a repasá e kaso i a splika ku e ansiano ta biba den un residensia di korporashon kaminda e ta haña kuido pero su situashon finansiero ta kaotiko.
For di 2019 tin sierto orden den e desorden di debe i a stabilisá su patronchi di gastu i entrada.
E atministrador a splika ku for i aña pasá e ta aktivamente buskando moda pa bende e propiedat ku € 180.000,-.
Wes a duna pèrmit kaba pa bende e propiedat pero e Lockdown na Kòrsou a tira salu den e sòpi pero asina Lockdown pasa por sigi ku benta dje propiedat.
Tin tres kandidato pa kumpra e propiedat i wes tambe ta kere ku denter di poko por bende e propiedat pa kaba di paga e 6 akreedornan.
Por lo tantu e negativa dje korporashon pa keda sin koperá wes no ta honra i a ordená nan bai di akuerdo.
Unabes ku a regla e asuntu aki dje forma aki no tin motibu mas pa wes proklamá un areglo di sana debe i e kaso ta kla.
WILLEMSTAD – Tin hopi interes di bishitantenan di eksterior pa karnaval di Kòrsou.Tin hopi turista ta riba nos isla i representantenan turistiko i tambe prensa internashonal ta na kantidat grandi pa kubri nos karnaval. Muryad de Bruin, direktor di Ofisina di Turismo a bisa ku CTB ta hopi kontentu pa tin karnaval bèk den su gloria kompleto manera e tabata semper. Prinsipalmente for di den region, entre otro Surnam, tin hopi turista na Kòrsou pa gosa di karnaval.
Pa motibu di Covid-19, ultimo dos aña, no por a organisa karnaval na di Kòrsou,. fisina di Turismo a prepara hopi bon pa e regreso di e fiesta grandi aki. Henter e siman aki, media internashonal ta di bishita na Kòrsou pa kubri e paradanan di karnaval, prinsipalmente esun grandi ku tuma luga mañan. Di e manera aki i ta mustra mundu tambe kon bunita nos karnaval ta.
De Bruin a bisa ku di tur e merkadonan di Korsou, tin representante turistiko e siman akin a Korsou. Ta trata di entre otro Hulanda, Colombia, Ecuador, Surnam, Merka i Republika Dominikana, ‘Nan ta kubri nos karnaval i dun’e e atenshon den publisidat internashonalmente’.
Henter e siman aki personal di e departamentu di produkto di CTB i ‘destination services’ ta riba kaya, pa host huntu ku ‘influencersnan’, i medionan di komunikashon. CTB ta guia i perkura pa e miho parti di Korsou ta bisto riba nan publikashonnan.
KONSIENTISA
Tambe komo ofisina di Turismo ta dedika atenshon na konsientisashon lokal. E direktor di CTB a a menshona ku durante di temporada di karnaval, ta konsientisa pa tene nos isla limpi. Esaki ta ta un kampaña ku ta tuma luga hopi luna kaba. E konsientisashon ta ku mester tene Kòrsou dushi i limpi. Den temporada di Karnaval, Ofisina di Turismo ta keda pone atenshon riba e asuntu aki, pa logra ku nos komo País, ta un país limpi pa nos mes pero tambe pa e bishitantenan.
CHATA tambe ta hopi kontentu ku karnaval ta bek, pasobra esaki ta hopi positivo pa e okupashon di e hotelnan i otro negoshinan ku ta relata na turismo.
Hans Slier, presidente di CHATA a bisa ku e okupashon dje hotelnan den e temporada aki ta hopi bon. Ademas, asina Slier ta bisa, eventonan manera karnaval ta no solamente ta hopi bon pa turismo pero tambe pa Kòrsou mes. Karnaval i otro festivalnan manera Jazz i Blues Fesitval, ta pone Korsou riba mapa internashonal loke ta hopi bon.
WILLEMSTAD – Den e periodo di 23 yanüari 2023 pa 30 yanüari 2023, polis a registrá i a analisá e siguiente aktividatnan kriminal.
Atrako
Kantidat: 5
Orario: entre 02.51’or. – 06.51’or. / 11.26’or. – 23.13’or. Sitio: Jan Noorduynweg, Dein, Pietermaai, Kanga, Mahuma.
Ladronisia di
vehíkulo
Kantidat: 4
Orario: entre 23.00’or. – 05.00’or.
Sitio: Marie Pampoen (2x), Pietermaai, Otrobanda.
Kiebro den kas
Kantidat: 8
Orario: entre 11.00’or. – 15.00’or.
Sitio: Pannekoek, Hoendenberg, Mahuma (2x), Rooi Catootje, Koraal Partier, Suffisantdorp, Julianadorp.
Partikularidat: Dor di kibra porta dilanti (mayoria).
Kiebro den negoshi
Kantidat: 3
Orario: entre di 00.00’or. – 05.00’or.
Sitio: Fokkerweg, Caracasbaaiweg, Souax West. Partikularidat: Dor di kibra dak i kandal (mayoria).
Kiebro den /na outo
Kantidat: 11
Orario: alrededor di 11.00’or. – 14.00’or / 23.00’or. – 05.00’or
Sitio: Caracasbaai, Noordkust, Otrobanda, Sabana bij Wespunt (3x), St. Wilibrordus, Habaai, Vredenberg Bij Kenchan(2x), Wespunt.
Partikularidat: Dor di kibra glas patras i bai ku piesa di outo(mayoria).
Violensia relashonal
Kantidat: 15
Orario: entre 00.00’or. – 03.00’or
Sitio: Otrobanda, Sucasa, Bonam, Oude Water, Marie Pampoen, Koraal Specht, Buena Vista, Monchi, Vredeberg bij Sta. Maria, Punda, Sta. Cruz, Jonisberg, West Groot St. Joris, Zuid Abrahamsz, Noord Zapateer.
WILLEMSTAD – JCI Dutch Caribbean lo kier informa ku a elegí i instalá su direktiva nobo pa e aña 2023. Sigun e presidente nobo di JCI Dutch Caribbean durante di e aña 2023 e organisashon lo proveé oportunidatnan pa desaroyo di liderzgo i empodera miembronan pa krea impaktonan positive den nos komunidat. Pues, pa e motibu aki e lema prinsipal di 2023 ta ‘Step Up’.
Junior Chamber International (JCI) su filosofia di ‘one year to lead’ tin e enfoke pa duna hendenan entre 18 pa 40 aña oportunidat di haña eksperensia den posishonnan di liderazgo.
JCI Dutch Caribbean su direktiva pa aña 2023 ta konsistí di e di 62 Presidente Shakira Sedney – Albertoe, ku asistensha di Sekretaria Jacqueline Candelaria, Tesorero Alasha Tejeda, Vise Presidente Ehekutivo Aldimir Vrutaal, Vise Presidente Sulmahine Penza – Kwidama, Vise Presidente Richards Martina, Asesor Legal General Vanessa Overman i Presidente Saliente Sulin S.F. Passial.
JCI ta un organisashon global di lidernan entre 18 pa 40 aña ku ta transformá hóbennan pashoná den lidernan kapabel pa medio di training, proyektonan, eventonan i programanan. JCI Dutch Caribbean ta konsistí di 5 organisashon lokal. Na Kòrsou, JCI Creative Leaders in Curaçao (CLIC), JCI Involvement Of Banda Ariba Curaçao (IOBA Curaçao) i JCI Willemstad. Na Aruba: JCI Young Active Leaders Aruba (YALA). Na Sint Maarten: JCI SXM A.C.T.I.O.N (Aspiring Change To Impact Our Nation).
Si bo ta interesá di desaroyá bo abilidatnan di liderazgo miéntras bo ta krea impaktonan positivo den bo komunidat, tuma kontakto ku JCI Dutch Caribbean libramente na dutchcaribbean@jci.cc.
Pa mas informashon di JCI general bishita www.juniorchamber.international.
Sigui nos riba Facebook, Instagram, LinkedIn @jcidutchcaribbean pa e último informashonnan di JCI Dutch Caribbean su aktividatnan.
Daily Nobo
Covid-19 Statistics
Hamas a konfirmá ku nan lider a keda asesiná pa un misil na Iran
Antony Blinken a afirmá ku Merka no ta impliká den asesinato di Ismail Haniyeh
Maduro ta vinkulá: Lider di Tren de Aragua responsabel den e protesta kontra resultado ofisial elektoral
Gobiernu merikano a manda atvertensia: Serio den direkshon di Nicolas Maduro relashoná ku resultado di elekshon
