WILLEMSTAD. A yega na nos atenshon ku e kambio di gobiernu ku a tuma lugá resientemente no a produsí muchu diferensia den e forma di praktiká polítika ku e aparato gubernamental manera e koalishon anterior a bin ta hasi i esnan promé ku esei tambe tabata hasi.
Esta keda sin yena puestonan ku ta vakante te ora nan haña e kandidato ku ta kana na kadena di e tendensia polítiko dje partido(nan) na mando. Simplemente revisá e resultadonan di evaluashon ku SBTNO hasi henter aña i ta haña konfirmashon di loke nos ta señalá.
Esta, e tendensia pa na lugá di nombra un direktor di kompania di gobiernu of direktor di un ministerio, ta nombra e persona komo interino i laga e situashon aki perdura largamente.

Un ehempel klasiko dje situashon menshoná ta por ehempel loke a pasando den Buskabaai N.V. un kompania di gobiernu ku pa 99% di pueblo no ta bisa nada pero sinembargo ta un kompania ku personal i gerensia i kaminda plaka ta lora pero ku ta funshonando den un ambiente di neblina.
E kompania mester di un direktor despues ku durante 10 aña un komisario a funshoná komo direktor interino i komisario alabes i de fakto e mes tabata kontrolá su mes na lugá di vise versa.
Dokumentonan ku a surgi ultimamente a pinta un kuadro kaminda a Sali na kla ku ta manipulashon i chanchuyo tabatin pa no nombra un direktor dje kompania i pa ora no por keda sin nombra e direktor, nan ku nan mes disidi ken ta keda interino of laga.
Dos biaha a start un proseso pa selektá un direktor pero ningun biaha no a terminá e proseso.
E prosedura aki ta algu ku e instansia ku tin ku evalua si e kandidato ta kompetente,, no por sigi.
E instansia di evaluashon, SBTNO, sa ku e selekshon ku a start na 2020 a kompletá i e hunta di komisario a sugeri dos kandidato kompetente pa minister nombra den un reunion di akshonista.
Ningun kaminda ta pará ta dikon no a nombra un direktor of si ta pasobra e dos kandidatonan no ta interesá mas den e funshon.
Nunka e konsehero di SBTNO tabatin e honor di a haña un desishon di Konseho di Minister.
(Mester remarka aki ku ta trata dje gobiernu anterior, no esun aki ounke e sugerensia di e aktual gobiernu ta pa sigi ku e situashon di direktor interino).
I awor ta sigi algu ku hamas nos a yega di topa kune den e proseso pa selekta un direktor of nombra un ehekutivo: e minister ta haña ku no ta deseabel pa drenta den konsulta ku e hunta di komisario di Buskabaai!
Sinembargo… Kódigo Sivil di nos pais ta instruí pa e personanan ku ta envolvi den e organisashon tin ku komporta nan mes di un forma hustu i sivilisá lokual no te kaso si e Minister ta duna orden ku prefereibelmente no konsulta ku e hunta di komisario.
Pa ta rasonabel, akshonista of e minister ku tin e kartera di Buskabaai mekser a tende e hunga di komisario su opinion pa sa dikon no a nombra ningun dje dos kandidatonan pa direktor di Buskabaai.
Por lo tantu mr. de Palm a konseho gobiernu komo akshonista pa drenta den konsulta ku hunta di komisario pa regla nombramentu di un direktor di Buskabaai N.V.
Di un forma masha sivilisá mr. de Palm ta mustra e Minister konserni ku pa garantisá e outonomia di tantu gerensia komo hunta di komisario pa nombra un direktor temporal ku no ta forma parti di hunta di komisario pasobra no por sigi ku e sistema kaminda e komisarionan mes ta nombra un kolega komo direktor manera a sosode ku sr.Tujeehut.
Pero mester tene kuenta sí ku ora un komisario okupá e puesto di direktor pa tempu largu, e no por retorná komo komisario den e hunta.
Pero tambe ta posibel ku un komisario por fungi komo direktor basta ta pa tempu limitá te dia haña un direktor.
E solushon aki ta temporal i ta pa kubri un situashon agudo te ora nombra e direktor.
I ora e komisario ta fungi komo direktor, e no por eherse komo komisario.
Ta p’esei mester perkura ku tin sufisiente komisario pa por mantene e distansia entre komisario i direktor pero den e kaso aki di Buskabaai a dura demasiado pa nombra un direktor.
Di otro banda no por kulpa e tres komisarianan di a faya pasobra nan a sòru pa haña dos kandidato pa direktor.
Esun k a faya ta e minister ku no a nombra ningun di dos.
Nan a sòru pa un supervishon transparente i kompleto den selekshon di kandidato pa direktor.
Dia 14 di yuli ultimo e koalishon aktual a nombra señor R.M. Martina komo direktor interino di Buskabaai pa un aña.
SBTNO no tin problema ku esaki pero pa minister president drenta den konsulta ku hunta di komisario pa nombra un direktor definitivo.