Johannes no sa unda e nòmber “Didi” a sali, pero di tur manera asta su ñietu nan ta yama “Didi” awor.
…M’a Yega komo
Tersera/Base…
“Dia m’a kuminsá ku baseball den doble A serka Taffy m’a yega komo tersera/base, pero tabatin hopi hungadó na tersera/base manera Cyrill Nicia, “Nato”, i m’a disidí ku p’ami hunga mi ta bai picha”, Johannes, “Didi” Tata a konta. El a bisa ku el a hunga ku 13 aña serka Freddy Isidora (dfm) i tabata tersera/base. Den Senior League el a picha i hunga tersera/base, den hubenil, tersera/base i picher. Johannes ta splika ku komo batidó e no tabatin tantu, pero si e tabata hasi bon kontakto.
…Mariekson i Johnny
tin mas poder…
Su yunan Johnny i Mariekson tin mas poder kuné. “M’a subi den Blue Hawks huntu ku Taffy ku 18 aña, i hasi e trabou komo picher. Blue Hawks e tempu ei no tabata gana muchu, pero djadumingu mainta tur tim tabatin rèspèt pa Blue Hawks. E no ta lubidá kon Blue Hawks a kibra invikto di Sta. Rosa Indians un djadumingu mainta.”Didi” Tata no ta lubidá su promé wega den doble A. El a picha i gana di e tim di Kwartier Stars ku skor di 4-1. Didi tabata un picher ku semper tabata bai distansia kompleto ora e picha. E ta bisa ku te awor esei ta e kaso. “Si bo tin di gana mi, bo tin di hasie den e promé tres inningnan”, e yu di “Chikitín” ta konta.
…Semper m’a
gusta Kore”…
‘Didi’ ta splika ku semper el a gusta kore, i nunka ta kana. E ta kore pasó e tin poko problema ku lomba i ta sintiele muchu mas mihó ora e kore. E ta kòrda kon nan tabata sali kas, kore bai Seru Pretu, subi i baha na kareda. Ora nos subi Nijlweg nos tabata habri afó te kas. Nos tabata kore kasi tur atardi. Tambe “Didi” ta kòrda ku ántes tabatin picher ku ta bon batidó. E ta rekòrdá Antonio Keller ku tabata picher i kuarto/bate. Gerald Dunlop. Hopi mucha no ke bira picher mas pasó nan no ta haña chèns di bati.
…Na Hulanda pa
Amsterdam Pirates..
“Didi” despues di hunga baseball na Kòrsou a bai Hulanda na aña 1984 kaminda el a hunga pa Amsterdam Pirates. El a hunga di 1984 te 1996. Na Hulanda e no por a hunga ku selekshon pasó el a representá Antia Hulandes. Tambe e ta kòrda ku na Hulanda el a sinta 1 aña afó debí na dòler di lomba. Na Hulanda tambe el a fungi komo “coach”. Gregorius Tata ta konta ku dia el a regresá Kòrsou el a disidí bolbe hunga baseball, ya ku asina e lo por a haña un trabou.
…Gibi Doran a hasi
kos di Kabayero…
E ta kòrda ku el a firma ku Wild Cats, pero Sr. Gibi Doran a hasi kos di kabayero kuné i lag’é bai pasó el a haña trabou. “Didi” Sr. Ta bisa ku semper el a gusta tira bala tur dia. Den mundial na Suecia e tabata picha kasi den tur wega. Johannes a tira hopi ku e tim di Sta. Maria Pirates i logra vários título ku nan.
…Kampeon di Kòrsou
ku Mariekson i Johnny.
E kos di mas grandi pa “Didi” Sr. Tabata di bira kampeon di Kòrsou den Sta. Maria Pirates hungando ku su dos yu hòmbernan. Na 2007 Mariekson a catchá su Tata i Johnny tabata na tersera/base. E ta kòrda ku e ta bisa Mariekson ku tabata tras di plato pa e pidi lansamentu. Mariekson a catcha pasó Jolly a leshoná. “Tabata algu grandi p’ami, kampeonisá huntu ku mi dos yunan. “Didi” ta bisa ku semper el a kere den disiplina. El a hunga ku su yunan den tim i e trato ta manera di amigu, pero semper ku rèspèt. “No hasi kos di ònbeskòp”, e ta añadí.
…”Didi” komo
“coach” di Mucha…
Tambe Johannes tabatin éksito komo “coach” di mucha, na 2008 el a kampeonisá ku Junior League. E ta kòrda ku e tabata bisa tur mucha pa bin train ku oloshi pa nan ta konsiente di yega na tempu. E ta konvensí ku e echo ku Mariekson a hunga doble A promé ku el a bai Merka a yud’é masha hopi mes.
…Johnny ta “Big
Leaguer” den otro kos.
Tantu Mariekson, komo Johnny a firma, Mariekson a bira Big Leaguer, i Johnny ta “Big Leaguer” den otro kos, e Tata orguyoso ta añadí. Pa straño ku por parse Johannes ta bisa ku e no ta gran amante di baseball. Masha poko e ta sinta wak un wega di baseball kompleto. E ta rekonosé di ta stima “coach” mucha. Tambe e no ta skonde su desapunto di a train mucha 5 aña i no a mira avanse. E ta bisa ku pa e mucha bai dilanti den baseball e tin di hasi algu na kas. El a stòp ku baseball veterano pasó e ke picha tur siman, i no kada dos o tres siman. Johannes ta yuda Ramiro ainda ku su proyekto, “Ami Mes i Mi Logronan”. E ta rekonosé ku e ta poko eksigente. “Ora mi ta traha ku Mompy tin biaha e ta hala mi atenshon, bisa mi,”Yo, Yo”…”Didi” a konta ku e tin 5 yu, 1 yu di Kriansa. E tin un yu ta hunga kiper pa selekshon di futbòl di Kòrsou ku ta Bodak, i ta pensa ku e talento mester ta serka “Tata”.