Connect with us

Lokal

Kòrsou falta basta rekurso di maneho pa sigui konstrui nos nashon

Published

on

Dimitri Cloose

WILLEMSTAD – Na e seminario un dia despues, inaugurá pa e dekano di Fakultat General, drs. A. Fernandes i ku Mario Kleinmoedig (publisista i presentadó) komo moderadó, a partisipá invitadonan ku ekpertisia distinto i trasfondo profeshonal variá.
E seminario di dia 6 di mei a kuminsá ku un parti introduktorio pa e antropólogo profesor dr. Rose Mary Allen, ku ta okupá un kátedra na Fakultat General, i pa profesor dr. Alex van Stipriaan. Nan dos a duna un definishon di formashon di nashon (natievorming) i nationbranding.
Esaki a tuma lugá despues di un prefasio mas general tokante e tema akí di profesor dr. Gert Oostindie.
Seguidamente e ekspertonan lokal a duna un presentashon ku konklushon importante.
Historiadó i antropólogo Dimitri Cloose, direktor di NAAM, a indiká ku Kòrsou falta ainda basta rekurso di maneho pa sigui konstruí nashon (Nation Building) i pa promové e marka Kòrsou i su herensia kultural (Nation Branding).
Richenel Ansano, antropólogo, a trese dilanti ku Kòrsou no por forma nashon a base di eksklushon di segmentonan kultural, i sigur no e grupo mas grandi afrokurasoleño i su herensia, den merkadeo dje marka Kòrsou i su kultura.
Ansano (meskos ku Van Stipriaan) a indiká den su charla e tenshon entre nation branding pa motibo ekonómiko, manera den turismo, i e nesesidat pa no presentá un marka ku no ta korespondé totalmente ku e realidat di e nashon.
Profesor dr. Ronald Severing di Fakultat General di UoC, a papia di papiamentu, herensia, nation building i nation branding. El a referí na e desishon di UNESCO pa kuminsá na 1972 ku protekshon di herensia tangibel.
E hecho ku sentro di Willemstad tin e státus di herensia kultural mundial, ta un di e konsekuensianan di esei. E momentu na aña 2003 ku UNESCO a kuminsá ku e programanan pa protehá i sigurá patrimonio intangibel, a resultá ku di e sinku áreanan ku a distinguí, ku idioma ta pertenesé na e formanan mas importante di patrimonio. Ademas, idioma a resultá di ta un nesesario pa garantisá herensia kultural intangibel.
Importansia di nos idioma mayoritario na Kòrsou a haña rekonosimentu internashonalmente, ora ku na aña 2009 a inkorporá e Catecismo Cortico di 1837 den Memory of the World-Register di UNESCO.
Ku papiamentu ta di importansia komo elemento pa formashon di nashon, no tin duda, pa Severing. Asta e ta mira posibilidat pa usa papiamentu pa enrikesé promoshon di Kòrsou den eksterior; papiamentu na benefisio di nation branding.
E hóben Bachelor di teatro i trabou sosial, Richailine Elisa, a konkluí ku mayoria di informashon riba formashon di nashon i merkadeo di nashon lo ta en bano, tanten ku hubentut di awendia keda mira e tópiko di herensia komo antikuá i laf.
Despues di un diskushon interesante, a base di pregunta for di sala dirigí na e oradornan, tabatin oportunidat pa sigui interkambiá di idea riba patio di UoC.

Continue Reading

Lokal

Alumnonan di Skol Sint Antonius a traha modelo di lanthùisnan

Published

on

By

WILLEMSTAD – Loke a kuminsá komo un simpel proyekto pa traha un modelo di e lanthùisnan di Kòrsou pa sera aña eskolar di e grupo 7 di Skol Sint Antonius, a bira un mega proyekto kaminda nan a kombiná varios abilidat pa no únikamente krea e edifisionan monumental, pero tambe kombertí den orador tokante di e pasado riku i e uso aktual di e lanthùisnan.
Tabata un reto i alabes un oportunidat pa koperá ku e muchanan i tambe nan mayornan, pa asina nan por a krea e artenan aki ku a impreshoná hopi ku a mira nan.
CIBC FirstCaribbean a sostené e proyekto, ku no únikamente a saka lo mihó di e alumnonan di Skol Sint Antonius, pero alabes a enkurashá e partisipashon aktivo di nan mayor i a stimulá nan interes den a pasado riku di Kòrsou. Bo por a mira e orguyo den a hobennan ora ku nan a kaba ku nan proyekto i tabata presentá esaki.
Skol Sint Antonius tin komo tradishon pa laga e alumnonan di grupo 7 na fin di aña eskolar hasi un proyekto kaminda ta reta e alumnonan pa demonstrá nan kreatividat. E proyekto di e aña aki a saka mas ku e kreatividat di e studiantenan. E studiantenan, den nan gran mayoria for di e barionan di Santa Maria i Seru Fortuna, a kombiná nan kreatividat riku, nan konosementu di historia, kalkulashon di midí i abilidat di presentá, pa krea i presentá nan proyekto. E proyekto di e studiantenan a bira punto di interes di henter famia kaminda mama i tatanan tabata kontribuí nan parti pa kombertí e modelo den un piesa di arte. E proyekto a logra ku e studiantenan mester a buska informashon, tantu tokante e pasado di e lanthùisnan pero tambe presente.
Tur e studiantenan a kombertí den orador ku bon konosementu di e lanthùis ku nan a traha i presentá.
Un di e maestronan di e klasnan di grupo 7 di Skol Sint Anonius a bisa ku e proyekto aki a saka e mihó for di e studiantenan.
E studiantenan a haña un oportunidat ekselente ku e proyekto aki pa demonstrá nan konosementu i abilidatnan riba varios tereno.
E koperashon den famia a krea un eksperensha úniko ku e hobennan aki lo keda kòrda pa hopi tempu. E maestronan a apresiá e sosten i koperashon di CIBC FirstCaribbean pa kompletá e proyekto ku tabatin un gran impakto riba e hobennan.

Continue Reading

Lokal

Donashon di 50 mil Euro pa Fundashon ku ta kombati problematika di AIDS

Published

on

By

Riba e foto por mira algun miembro di e direktiva di links pa rèks G.Roach, T.Winklaar, H.Offerman i S. Felomina.

Willemstad – Fundashon Plòns Kòrsou (FPK) a risibí un donashon di 50.000 euro durante e findishi ku a tuma lugá na Amsterdam Diner 2022.
Amsterdam Diner tur aña ta organisá e evento aki pa rekouda fondo pa yuda ku diferente proyektonan ku ta yuda pa kombatí e problemátika di HIV/Aids rònt mundu.
Durante di e diner presidente di FPK Harley Offerman a dirigi algun palabra na e publiko presente tokante e importansia pa tin sufisiente fondo pa por sigui yuda e pashèntnan ku ta HIV positivo.
E aña aki Fundashon Plòns Kòrsou a haña e oportunidat pa por forma parti di e findishi ku a tuma lugá durante e diner i rekouda un kantidat di 50 mil euro.
FPK tin 3 proyekto importante pa kuminsá kuné pa por yuda ku e problematika di HIV/Aids na Kòrsou. FPK a skohe e proyektonan basá riba e nesesidat ku ta biba bou di e organisashonnan Cura+, Salú pa tur i Famia Plania.
1. Konsientisá muchanan riba e topikó di HI/Aids
2. Minimalisá/ Eliminá e tabu di HIV/Aids na Kòrsou dor di konsientisá e komunidat i pone mas tantu informashon posibel disponibel
3. Tratamentu i remedi pa indokumentadonan
Esakinan ta 3 di hopi proyektonan ku FPK mester a skohé pa kuminsá kuné.
Lamentablemente ahinda e tópiko di HIV/Aids ta algu ku mayornan, famianan, amigunan i konosinan no ta papia over di dje ni buska informashon konkreto pa informá nan mes di e desaroyonan ku tin riba e tópiko super importante aki. P’esei FPK kier invitá bu pa bishitá e website fundashonplons.com ku nan a desaroyá den 4 idioma. Espesialmente den papiamentu pa tur persona por kompronde i informá nan mes bon.
FPK ta sumamente kontentu ku e donashon ku nan a risibí pa por kontribui na un mihó bida i eksperensia pa e pashèntnan ku ta HIV positivo.

Continue Reading

Lokal

Eugene Middelhof ta bandoná Wardakosta di Karibe Hulandes

Published

on

By

Eugene Middelhof

WILLEMSTAD – Eugene Middelhof ta tuma despedida di Wardakosta di Karibe Hulandes den e Region Karibe. Esaki ta tuma luga 8 di yüli awor.
For di yüli 2017 Eugene Middelhof ta okupá e kargo di Direktor Suplente na Wardakosta. Den su puesto e tabata duna direkshon na diferente proseso dentro di e organisashon, manera entre otro e ‘bedrijfsvoeringsoverleg i e ‘Gemeenschappelijke Medezeggenschapsraad’ (GMR).
Siendo Direktor Suplente e tabata tambe Presidente di e konsulta ku GMR den e organisashon. E la sòru ku e órgano aki ta bon sigurá dentro di Wardakosta. Banda di esei el a esforsá su mes pa otro fasetanan importante den e organisashon, manera integridat, siguridat i medio ambiente, pero tambe el a sòru pa vários funshon den e staf di Wardakosta a ser okupá. Durante e último 5 añanan Eugene a desplegá su mes ku hopi energia i pashon pa Wardakosta i e la duna realse na e kredo ‘Samen Sterk’. E personal di Wardakosta ta gradisí Eugene pa su esfuerso i ta dese’é hopi éksito den su futuro karera.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login