Connect with us

Sosial

Dina Rina Keli a kumpli 90 aña !

Published

on

WILLEMSTAD – Rina Keli, (Dina) djasabra último a kumpli 90 aña. Riba e dia aki, e selebrá prinsipalmente ku su seis subrinanan, tur ruman di otro ku ela kria for di chikí. Rina Keli a traha 50 aña den kantor na La Confianza. Su eks koleganan, amiga i sobra famianan tambe a selebrá kuné su bunita aniversario.
Un dje subrinanan, esun di mas chikí ta Antonieta Wognum (Antonieta Dap), ku a bisa NOBO ku pa e okashon aki, tur e subrinonan, Jenny, Shury, Sientje, Toni, Shila i Antonieta tabata huntu djasabra pa selebrá ku e persona ku a duna nan bon kriansa.Entre dje subrinanan tin ku ta biba den eksterior, pero ku a pèrkurá pa nan tambe uni ku e sobrá rumannan.
Jenny, e subrina di mas grandi di Dina, a konta NOBO ku Dina a tuma 6 ruman kria i ku nan no tabatin falta di nada.’ Ela kria nos bon i a papia hopi ku nos, pa nos bon’.Semper Dina tabata atento pa seguridat di su yunan di kriansa. Jenny ta konta: Si nos tres ruman mester bai un fiesta na un bisiña di kua e kuránan ta pega ku otro, maske fiesta ta kuminsá 9’or e ta laga nos bai for di 7’or. Anto 9’or e ta bin na waya bin yama nos. Jenny ta sigui konta ku e rumannan e ora ei mester pidi e bisiña (Narda Brunken ) pa pidi Dina pa nan keda i e mes ta wak nos. “Asina Dina ta laga nos keda te 12’or di anochi. Ora ku fiesta kaba ku Narda hinka e rumannan kas, Dina ta sintá den kas ta warda nan yega kas.
Jenny ta hopi kontentu i agradesido pa e edukashon ku Dina, huntu ku nan wela a duna e seis rumannan. Dina ta un Tanchi masha dushi mes, ku ounke ku e tabata strèn, a pèrkurá semper, tambe materialmente, masha bon pa su subrinonan. Jenny: ‘’Danki Dios ku e tabata strèn, pasobra nos tur a resultá bon’’.

REY
Toni, e úniko ruman hòmber a bisa NOBO, ku tantu serka Dina, su rumannan i serka su wela, ela risibí un trato manera rei na kas. ‘’Dina ku mi wela a duna nos un edukashon meskos ku tur mayor ta duna nan yunan. Nan tabata kuida nos èkstra bon, manera por ferwagt ora ku bo tin responsabilidat pa muchanan ku no ta bo propio yunan.Esaki no ta fásil tur ora, pasobra semper mucha ke tin mas libertat.
Komparando e situashon di ántes ku awor, Toni ta bisa ku awendia no por spera mas ku tanta i welanan ta tuma responsabilidat di kriansa fásil. ‘E mama i welanan mes ta yòn i ke disfrutá di nan bida’.
Den nan kaso, tur hende a resultá bon, Toni ta bisa. ‘Nos no tin título dilanti nos number, pero ta bon pará, sin ku tabatin di mester di atendé ku asuntunan ilegal’. Hopi importante tambe Toni ta konsiderá e echo ku e rumannan a keda semper uni.

Continue Reading

Sosial

Promé ‘Trumpet Challenge 2022’ djarason dia 22 di yuni den Sambil

Published

on

By

WILLEMSTAD – Por fin e dia ta yegando pa Kòrsou konosé su promé trumpet challege 2022. Esaki lo tuma lugá djarason awor dia 22 di yüni den Sambil pa 7 or di anochi.

Despues di vários luna di preparashon bou di direkshon di Hector Sampson, e trompetistanan aki ta kla pa laga pueblo di Kòrsou disfrutá di nan músika.
Manera ta konosí, Fundashon WESU a bin ta trata riba e parti di formashon musikal i organisá na desèmber último, e promé Trombone Challenge ku tabata un éksito total.

Awor ta toka turno na trompetistanan pa nan tin nan Trumpet Challenge i despues di vários luna di preparashon intensivo, djarason awor dia 22 di yüni, Pueblo di Kòrsou por bai disfrutá grátis di nan presentashon.
E evento lo tuma lugá riba e stage grandi skùin dilanti Victoria Secret den Sambil. E evento lo kuminsá eksaktamente 7 pm i ta algun kansion nan lo bai presentá. P’esei un apelashon ta na tur hende ku ta interesá pa wak nan, pa nan tei presente den Sambil djarason awor.

Continue Reading

Sosial

AMAK ta partisipá dos gran baluarte di farandula ku a bai laga nos

Published

on

By

WILLEMSTAD – Djamars anochi a drenta e notisia tristu ku e konosido Patrick Janzen a bai laga nos i den oranan di mardugá djarason 9 di yüni 2022, e pianista, kompositor i areglista Eddy Mar a bai sosegá.

Patrick Janzen
Pa lokual ku ta trata e personahe di Patrick Janzen, nos a komprondé ku el a fayesé na un edat di 53 aña na su kas, despues di tabata hospitalisá pa algun dia.

Patrick a bai laga nos na un edat relativamente hóben i durante su trayektoria den farándula, e tabata envolví den diferente aktividat farandulero tantu aki na Kòrsou komo na Ulanda.

Patrick a inisiá ku su negoshi i pone lus i harma stage pa diferente aktividat i seguidamente ela formalisá su aktividatnan ku lantamentu di Ola ku ta nifiká Organisashon pa Lanta Ambiente.

Patrick tabata pone zonido i meks pa diferente agrupashon musikal i un di su éksitonan grandi tabata lantamentu di e Agrupashon Musikal No Game, ku a kosechá hopi popularidat i hasta a konkista e titulo di Rei di Tumba ku Reinir Lijfrock komo kantante na 2006.

Último tempunan aki, Patrick a lanta un grupo musikal di Bachata i tabata tin intenshon tambe pa lanta un grupo di Kòmbèk i formalisá regreso di No Game. Lamentablemente e no por a logra realisá tur su soñonan

Eddy Mar
Pa loke ta trata fayesimentu di Eddy Mar, AMAK por menshoná ku e tabata hopi aktivo tantu komo músiko, pero tambe durante mas ku 10 aña komo dosente di e proyekto di Formashon Musikal den Bario.
Eddy Mar tabata forma parti di diferente agrupashon musikal i esnan ku sigur el a kosecha hopi éksito kune tabata e agrupashonnan musikal Dynamics i BESS ku tabata un agrupashon musikal ku e i defuntu Mr. Babalu tabata dirigí musikalmente.
Eddy Mar durante último tempu ku a pasa tabata sufri di kebrante di salu i den oranan di mardugá di djarason el a bin fayesé.
Direktiva di AMAK ta ekspresá su sentido de pésame na famianan di Patrick Janzen i Eddy Mar. Ku nan alma sosegá na pas.

Continue Reading

Sosial

HOPI INTERES PA KURSO DI HISTORIA DI MUZIK DI KORSOU ORGANISA PA CCC

Published

on

By

Willemstad – Durante e periodo di 7 di febrüari te ku 16 di mei 2022 Sentro Kultural Kòrsou a organisá otro interesante Kurso Historia di Muzik di Kòrsou den su Sentro situá na Emmastad, kua tabata na enkargo di e konosido músiko Henri (Harry) Moen.

Den e kurso aki a trata desaroyo di muzik tradishonal di Kòrsou di e époka entre 1863 i 2000. Entre otro e kursantenan ta siña rekonosé ritmonan tradishonal i konhuntonan musikal, tambe nan ta sera konosi ku kompositor i otro desaroyonan den muzik di Kòrsou. Huntu ku esaki tambe nan ta haña un bista di aspektonan sosial i ekonómiko ku tin relashon ku e desaroyo.

E kurso un biaha mas tabata un èksito total na opinion di e kursantenan ku a yena un bashí na informashon tokante nos muzik. E forma úniko di duna lès di señor Harry Moen i su splikashon al kaso, kla i konsiso a mantené un entusiasmo kontínuo serka e kursantenan.

Djaluna 16 di mei ultimo e kursantenan presente a risibí nan sertifikado for di man di señor Harry Moen i señor Henri Cornelia, Presidente di Fundashon Sentro Kultural Kòrsou. Esnan ku a kalifiká pa nan sertifikado ta: Valentina Cijntje-Engelhardt, Alton Gordon, Rose-Marie Heije, Frensel Malacia, Isolda Mansana, Aronnette Martis, Jacqueline Nicia, Elvin Rijke, Lidwina Rodriguez, Aemilius Palm, John Scheidelaar i Glenda Sluis

Sentro Kultural Kòrsou ta felisitá tur e partisipantenan i nan dosente ku èksito di e kurso. For di aña 2012 un total di 176 kursante, di ken 67 penshonado, a risibí nan sertifikado di partisipashon na e kurso.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login