Connect with us

Katoliko

DI BINTIDOS DJADUMINGU SIKLO B

Published

on

Promé Lektura : Deuteronomio 4, 1-2, 6-8
Salmo : Salmo 15, 2-5
Di dos Lektura : Hakobo 1, 17-18, 21-22, 27
Evangelio : Marko 7, 1-8, 14-15, 21-23

Lei no ta “apsoluto”

Hesus den mas di un okashon ta parse di ta duna ménos importansia na e lei, manera den e kaso di djasabra i awor e labamentunan sagrado ku e fariseonan tabata apresiá asina tantu.
Esaki no ta nifiká ku E lo a despresiá e normanan di bida di hudiunan: El a bisa ku E no a bini pa abolí e lei, sino pa laga nan nifikashon berdadero Sali na kla. Lei ta nesesario i ta sirbi nos di kaminda pa e bon i pa e armonia interior i eksterior. E ta, manera nos ta lesa den e promé lektura, e berdadero sabiduria. Loke Hesus a hasi tabata interiorisá e lei akí, p’asina ku nos ta konformá nos mes ku e aparensia eksterior; personalisá e lei akí, lantando e responsabilidat personal den nos aseptashon di e boluntat di Dios, di moda ku su kumplimentu no sea únikamente e realisashon eksterno i formalista di e “lèter”, sino ku e ta sigui su “spiritu” òf intenshon segun Dios.
Loke Hesus a desaprobá tabata e legalismo formalista, e interpretashon eksagerá di e lei, ku ta hasié mas bien sklabisante ku di ta liber, mas preokupá pa e kumplimentu minusioso ku pa karidat pa esun den nesesidat. Si E ta duna ménos balor na e lei ta pasobra E ta duna prioridat na e persona. Norma ta nesesario, pero nos no mester bira katibu di su materialidat deskuidando su intenshon profundo.
Fariseonan tabata personanan masha kumplidó di e lei, pero eksagerá den su interpretashon i demasiado satisfecho di su kumplimentu. Hesus oponé “e mandamentu di Dios”, ku evidentemente ta lo prinsipal, na “e tradishonnan humano”, prinsipalmente ora ku a hib’é na sierto ekstremonan ku ta laga e lei pèrdè su finalidat último, ku ta e bon di hende. Un kos ta obedesé e lei di Dios, i otro ta e legalismo, e formalismo, o sea, konformá nos mes ku e kumplimentu eksterno i no yega te na su intenshon profundo.
Den e okashon akí tabata trata di laba mannan promé di kome, prinsipalmente despues di tabata den marshe, kaminda tabata posibel algun kontakto, por ehemplo, ku pekadornan i paganonan, ku mester a purifiká nan mes promé. E labamentunan no tabata meramente higiéniko, sino ku a bira, prinsipalmente dor di interpretashonnan di diverso skol rabíniko, un lei religioso.
Hesus no ta kritiká esaki. Ta detayenan chikí i amor tambe ta konsistí di detayenan chikí. Pero e ta probechá pa afirmá ku ta mas importante puresa di e kurason i di e konsenshi, esun interior, ku esun eksterior di mannan. Tambe Pablo, den su karta na Korintionan (IKo 8), na ora di papia di e los “idolotito” (karni prosedente di e komementunan sagrado di diosnan pagano), ta duna ménos balor na prohibishon di kome e karni akí, a no ser ku na ora di kom’é ta skandalisá e rumannan mas debil.
E lektura aki ta invitá nos na un eksamen di konsiensia i na un chekeo di nos bida di fe, prinsipalmente di e intenshonnan ku ta move nos pa aktua den bida pa ku nos mes òf riba tereno di hustisia sosial.
Tambe por sosodé ku nos ku nos no sa na distinguí entre kosnan ku ta berdaderamente importante i esnan ku no ta, òf nos ta duna mas importansia na e kumplimentu eksterno ku na esun interno. Esaki ta e tentashon di “formalismo”. Kumpli ku mandamentunan i inkluso ku normanan eklesial, por ehemplo referente na e selebrashon litúrgiko, esaki ta masha bon. Pero e no ta asina “apsoluto” ku e tin preferensia riba kualke otro sirkunstansia.
Tin be, institushonalmente, nos a kai den un algu eksagerá, ku a parse mas preokupá pa e kumplimentu eksterno ku pa e búskeda di e sentido interior di e lei. Basta rekordá e importansia ku nos a duna durante siglonan na latin, apesar di ku e tabata difikultá lo prinsipal, ku ta partisipashon den e selebrashon. Òf e lei di ayuno eukarístiko, for di mei anochi, ku e idea di ekspresá rèspèt pa Eukaristia, a parse di duna preferensia e kumplimentu di lei na dje, den profundidat, tabata un norma eklesial no asina importante manera e atmirabel don ku Kristu lo a laga pa nos den herensia. Laga nos rekordá e sabiduria di e “konsilio de Herusalèm”, ora nan a disidí di no imponé mas karga ku esnan nesesario na esnan ku ta bini di paganismo. Sediendo den detayenan chikí (djasabra, sirkumsishon, algun kuminda) pa salba lo prinsipal: e universalidat di salbashon di Kristu.
Nos ta manera e fariseonan den e interpretashon minusioso di e norma? Nos ta kapas pa pèrdè e pas i laga pèrd’é di otronan pa kosnan insignifikante den e bida familiar òf eklesial? Nos ta konformá nos mes ku e aparensia eksterior, òf nos ta drenta den interioridat di nos motibunan di aktuashon?
Loke ta drenta den boka i ta sali di kurason
Pa Hesus loke ta konta ta loke ta nase di paden, no la mera kumplimentu eksterior (“nan ta alabá mi ku nan boka so, ma den nan kurason na ta leu di Mi”).
Su lenguahe ta tumá di bida i tur hende ta komprond’é: loke ta drenta di pafó pa boka no tin tantu importansia manera loke ta sali di e kurason humano. Di e kurason ta unda ta sali mal propósito, adulterio, ambishon pa plaka, envidia, difamashon di e ruman… Esaki si ta hasi un persona impuru i no tantu loke e ta kome òf no ta kome, òf si el a laba e mannan òf no.
Tur esaki tambe por pasa nos den nos ambiente familiar òf komunitario. Tin be nos ta pèrdè e pas i humor pa un antífona mas o ménos, òf pa si nos mester hinka rudia òf no den tal momento, i no ta parse nos di preokupá nos pa e aktitutnan interno ku mester ta bou di e normanan aki.
E salmista a puntra “ken por hospedá den bo tienda”, ku awor kiko lo ta igual na “ken por yama su mes bon persona, bon kristian”. I e kontesta lo tabata e ora ei i tampoko awor, únikamente e kosnan di orashon i kulto, sino honestidat, komprenshon pa ku otronan, apstené bo mes di propio interes òf di soborno, no difamá e ruman…”. I ta sigui siendo bèrdat ku “esun ku ta obra asina nunka lo faya”.

Continue Reading

Katoliko

Papa Francisco: Futuro saserdotenan mester ser evaluá integralmente

Published

on

By

Papa Francisco a bisa djabièrnè ku ora un persona ta konsiderá e vokashon saserdotal, ta nesesario evalu’é integralmente pa por tin saserdotenan ku ta kapas pa komuniká e bondat di Dios.
Asina e Tata Santu a indiká dn e Palasio Apostóliko di Vatikano, den e oudiensia konsedé na e formadornan di e Seminario Arzobispado de Milán (Italia), na okashon di e di 150 aniversario di e revista “La Scuola Cattolica” (E Skol Katóliko).
“Ora ta diserní si un persona por inisiá òf konsiderá un rekorido vokashonal, ta nesesario investig’é i evalu’é di moda integral”, Papa Francisco a splika den su diskurso djabièrnè 17 di yüni.
Den e sentido akí, el a kontinuá, “mester tene kuenta ku nan moda di biba afektonan, relashonnan, espasionan, ròlnan, responsabilidatnan, asina manera debilidatnan, temornan i desekilibrionan”.
“Henter e trayekto mester aktivá prosesonan ku ta buska na forma saserdotenan i esnan konsagrá madurá, ekspertonan den humanidat i serkania, i no funshonarionan di lo santu”, Papa Francisco a enfatisá.
Pa esaki, e Tata Santu a resaltá, “superiornan i formadornan di e seminario, esnan ku ta kompañá nan i e personanan den formashon ta yamá na krese diariamente na e plenitut di Kristu p’asina ku, atraves di e testimonio di kada un, e karidat di Kristu ta manifestá su mes mas klaramente”.
Papa Francisco tambe a bisa e formadornan ku “e seminaristanan i hóbennan den formashon mester por siña mas di boso bida ku di boso palabranan, nan mester por siña e bondat di boso obedensia, e trabou di boso dedikashon, e generosidat ku esnan pober di boso sobriedat i disponibilidat, paternidat di boso afekto kasto i no posesivo”.
“Nos ta konsagrá pa sirbi e Pueblo di Dios, pa atendé ku e heridanan di tur hende, kuminsando ku esnan mas pober”, Papa a enfatisá.
Mundu, Papa Francisco a kontinuá, “mester di saserdotenan kapas pa komuniká e bondat di Señor na esun ku ta eksperimentá piká i frakaso, saserdotenan eksperto den humanidat, pastornan dispuesto na kompartí alegria i sufrimentu di e rumannan, hòmbernan ku sa na skucha e gritu di esnan ku ta sufri”.
Renobashon i kuido di vokashonnan
E Tata Santu tambe a dediká un momento di su reflekshon na renobashon di vokashonnan saserdotal.
“Renobashon i futuro di vokashonnan ta posibel únikamente si tin saserdotenan, diákononan, esnan konsagrá i laikonan bon formá”, Papa Francisco a enfatisá.
“Kada vokashon partikular ta nase, krese i ta desaroyá su mes den kurason di Iglesia, i esnan ‘yamá’ no ta manera padestul ku ta aparesé diripiente. E mannan di Señor, ku ta duna forma na e ‘barinan di klei’, ta operá atraves di e kuido ku pasenshi di formadornan i kompañantenan.
Na nan, Papa Francisco a sigurá, “ta konfia e servisio delikado, eksperto i kompetente pa kuida e nasementu, e kompañamentu i disernimentu di vokashonnan, den un proseso ku ta rekerí hopi bondat i konfiansa”.
Servisio di teologia
E Tata Santu tambe a papia di e importansia di teologia i di e nesesidat pa por tin personanan kapas pa splika esaki na e mundu di awe.
E komunidat “mester di trabou di esnan ku ta buska na interpretá fe, tradusié i bolbe tradusié, pa hasié komprensibel, pa eksponé ku palabranan nobo: un trabou ku lo mester bolbe hasié di nobo ku kada generashon”.
Ta pesei, “Iglesia ta enkurashá i ta sostené e esfuerso aki, e difikultat pa bolbe definí kontenido di e fe den kada époka, den e dinamismo di e tradishon”.
Den e sentido akí, Papa Francisco a kontinuá, “e lenguahe teológiko semper mester ta bibu, dinámiko, e no por hasi otro ku evolushoná i preokupá su mes pa hasi su mes komprendibel”.
Papa ademas a mustra riba e papel iluminador di teologia den e mundu aktual kaminda a pèrdè sentido di kosnan.
“Un di e problemanan mas grandi di nos tempu ta en efekto e pèrdida di sentido. Teologia, awe mas ku nunka, tin e gran responsabilidat pa stimulá i orientá e búskeda, pa iluminá e kaminda”.

Continue Reading

Katoliko

Historia di dia di Tata

Published

on

By

Irónikamente, kreashon di dia di Tata, finalmente, a keda inspirá de un predikashi riba dia di mama. Na 1909, Sonora Smart Dodd de Spokane, Washington, a skucha un predikashi i a duna kuenta di ku su tata a meresé homenahe similar. E tabata Henry Jackson Smart, kunukero i veterano di guera sivil, kende a kria Sonora i su sinku yunan chikí despues di ku su esposa lo a muri dor di komplikashonnan durante nasementu di su di seis yu.
Sonora tabata ke un dia spesial pa su tata lo a sa kantu e tabata apresiá su amor i apnegashon, asina manera e sakrifisionan ku el a realisá komo tata soltero. Dia 19 di yüni 1910, riba dia di kumpleaño di Henry, Sonora a festehá e dia di Tata pa di promé bia na Spokane. Na 1924, Presidente Calvin Coolidge a apoyá públikamente e dia Nashonal di Tata. Finalmente, na 1966, Presidente Lyndon Johnson a firma un resolushon pa kombertí Dia di Tata den dia festivo nashonal. Seis aña mas lat, presidente Richard Nixon ta kombertié den lei permanente pa festehá dia di Tata riba e di tres djadumingu di yüni.
Sin embargo, e selebrashon akí ta varia di fecha den diferente pais di mundu. Algun ta konservá e di tres djadumingu di yüni, manera ta mayoria di e paisnan latinoamerikano, miéntras ku otronan ta preferá hasié dia 19 di mart, dia di San Hosé, manera ta e ehèmpel di Bolivia, Spaña i Honduras

Continue Reading

Katoliko

Di Shete Djadumingu di Pasku di Resurekshon

Published

on

By

Promé Lektura : Hechonan di apòstelnan 7, 55-60
Salmo : Salmo 97, 1-2. 6-7. 9
Di dos Lektura : Revelashon 22, 12-14. 16-17. 20
Evangelio : Huan 17, 20-26

E evangelio di awe ta ofresé nos un bunita okashon pa meditá den unidat. E ta bin ta ripití den e último añanan akí ku mundu ke logra integrashon kada be mas grandi entre pueblo i individuonan.Pa medio di FE nos sa ku moveshon di historia ta bai kondusiendo nos na realisashon di e soño asina largu sperá, e union den un solo famia. Nos tur ta anhelá un edat den kua no tin divishon i ku riba tera ta kuminsá un era di pas i di hermandat. Kristu den e ora mas solèm di su bida a resa pa unidat di hende: “Pa tur hende sea un.”
Uni hende ku otro i ku Dios ta e ideal i trabou di Iglesia. Pa e ideal akí si ta bal la pena inbertí tur nos energia. Pero promé laga nos mes un pregunta: Kiko ta unidat? Biba den unidat no ta nifiká pensa igual, sinti mesun kos, ku ta uni tur ser humano den un uniformidat laf i steril. Dos esposo sa ku ta uní no ta nifiká ku kada un mester pèrdè su personalidat. Unidat no ke men renunsiá na nos manera di pensa. Tampoko e ta nifiká semper keda ketu o keda sin defendé konvikshonnan propio.. Kiko e ora ei ta unidat ? Lo splik’é ku un frase hopi ripití, pero berdadero. Unidat ta e armonia kreá di diversidatnan. San Pablo ta splika e konsepto akí ku e imágen di e kurpa humano. “Ta un hecho ku e kurpa, siendo un, tin hopi parti , pero e partinan maske ku nan ta hopi, ta forma entre tur un solo kurpa”. Nos kurpa ta papiando ku nos di un maravioso unidat konstruí a base di diversidat. Ta logra e armonia akí pasobra tur parti di e kurpa ta traha, ta move, ta aktua den funshon di e konhunto.
Sosiedat ta konsistí di un variedat riku di hende. Tin múltiple rasa, lenga i kultura. Kada un ta poseé su propio rikesa.
Pa biba den unidat laga nos kuminsá na aseptá e diversidat ku ta eksistí den mundu. Nos no ta pretendé di biba den un paraiso irealístiko kaminda tur hende ta pensa igual i ta kana riba e mesun kaminda. Laga nos aseptá e desafio pa biba e unidat den e diversidat, pa logra armonia atraves di rèspèt pa variedat. Laga nos ta outéntiko den nos manera di pensa i di aktua i laga nos respetá e forma personal di pensa i di aktua di kada persona, semper i kuando esaki no afektá e bon komun.
Ta logra armonia ora kada hende kontribuí na e bon komun. E dos palabranan aki: bon komun, ta esnan ku mester inspirá nos akshonnan. Ora e interes personal i egoista ta pone su mes dilanti di e bon komun, e ora ei unidat i konkordansha ta kibra.
Kristu, ora e ta resa pa unidat, no ta pensando únikamente den un unidat horizontal, ke men di hende entre un ku otro. “Ku nan tambe ta ku nos”, Hesus a pidi den su orashon na Tata. En bèrdat, no por tin union duradero entre hende si Dios no ta e laso ku ta uni nos.

Sinembargo, kon difísil ainda ta e unidat entre kristiannan. No ta nesesario mira pafó i haña un mundu den guera konstante pa konkluí kon difísil ta di biba den unidat. Ta sufisiente pa nos mira un poko paden di nos mes pa deskubrí den nos propio sentimentu e rais di un divishon profundo. E rais akí ta nos egoismo.
Nos sa ku egoismo ta un forsa ku nos tur ta dirigí t’e na nos propio satisfakshon. Nos por bisa ku komo ser humano nos ta lèn den direkshon di egoismo, pero komo kristian nos mester obra ku amor. Stima ta nifiká sali di nos mes pa proyektá nos mes den direkshon di otro. Ora nos logra konvensé nos mes di e forsa konstruktivo ku amor ta enserá, únikamente e ora ei nos lo kuminsá traha riba e bon komun.
Den eukaristia kada djadumingu, nos ta selebrá e unidat di e famia kristian. Un solo Señor, un solo fe, un solo boutismo, un solo Dios I Tata. Tur loke tin den misa ta papia ku nos di unidat: altá ta e mesa di famia, kaminda komo ruman nos ta sinta pa kome di e mesun pan i pa bebe di e mesun biña. Ku ora nos sali di e tèmpel akí nos bai na praktiká e unidat i komunion ku nos a bin pa selebrá bibando den rèspèt mutuo i den amor, promoviendo e bon komun.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login