Zinho Constancia hóben DT di e tim di Jong Colombia djamars mainta a kombersá un ratu den Deporte Hoyer ku “Calili” Ruiter.

Mester rekonosé ku tabata un tremendo aña pa e tim Saminero ku a promové pa divishon máksimo i ya ta den klasifikashon pa play-off Kaya-6.
Masha poko fanátiko a duna Jong Colombia chèns di hasta keda ariba.

Sinembargo nan ta den klasifikashon pa play-off. Zinho ta rekonosé ku kos a bai mihó ku a spera.
E la rekonosé den e entrevista ku e union den e tim a yuda masha hopi mes.

Tambe e la keda pidi semper pa disiplina loke ta pone ku tur kos lo bai mihó.

Constancia ta kere den talento hóben, pero ku semper bo mester e hungadó ku eksperensia pa aportá na e totalidat. Zinho semper tabatin e deseo di a bira DT.

E ta kòrda kon e tabata bisa su Tio Andres Constancia (dfm) esei.
E ta splika ku pabo ta un DT e kos mester ta den bo. Bo mester stima e kos.

Zinho su deseo ta pa e sigui desaroyá komo tékniko di futbòl.
E la haña basta oportunidat i ta bisa ku e la probechá pa siña hopi kos.
E no kier a bisa unda e lo deseá pa Jong Colombia finalisá.

“Si ta asina ku semper bo ta deseá masa.

Ora bo ta den e seisnan, bo ke bai den e kuaternan i despues final.

Jong Colombia su deseo ta lo máksimo, ounke mester rekonosé ku tin timnan ku ta mas kompleto”, e hóben i dinámiko DT a deklará serka “Calili” Ruiter.