Connect with us

Katoliko

Vatikano ta desvelá e Dokumento Preparatorio ku detayenan di e próksimo Sínodo di Obispunan

Published

on

Pa Miguel Pérez Pichel | ACI Prensa

Djamars 7 di sèptèmber Santa Sede a publiká e Dokumento Preparatorio di e di XVI Asamblea General Ordinario di Sínodo di Obispunan, kompañá di un Vademecum den kua ta detayá e struktura di e Sínodo, su fasenan i su metodologia.
E Sínodo, titulá “Pa un Iglesia sinodal: komunion, partisipashon i mishon”, lo kuminsá dianan 9 i 10 di òktober de 2021 na Roma i dia 17 di òktober den kada Iglesia partikular. E proseso lo konkluí den e di XVI Asamblea General Ordinario di e Sínodo di Obispunan den òktober 2023. En definitivo, ta trata di un Sínodo tokante sinodalidat.
E pregunta esensial na kua e Sínodo di Obispunan lo trata na kontestá ta lo siguiente: “Kon ta realisá awe, na diverso nivel (for di e lokal na e universal) e ‘kanamentu huntu’ aki ku ta permití Iglesia anunsiá e Evangelio, di akuerdo ku e mishon ku kua el a ser konfiá; i kua pasonan e Spiritu ta ta invitá nos pa dal pa krese komo Iglesia sinodal?”.
E ophetivonan di e Sínodo, segun e Dokumento Preparatorio, ta, na promé lugá, “rekordá tokante kon e Spiritu a guia e kaminda di Iglesia den historia i ta yama nos na huntu ser testigunan di e amor di Dios”.
A kontinuashon, “biba un proseso eklesial partisipativo i inklusivo, ku ta ofresé na kada un –en partikular esnan ku pa diverso rason ta den situashonnan marginal– e oportunidat di ekspresá nan mes i di ser skuchá pa kontribuí den konstrukshon di e Pueblo di Dios”.
Na di tres lugá, “rekonosé i apresiá e rikesa i variedat di e donnan i di e karismanan ku e Spiritu ta parti libremente, pa e bon di e komunidat i na fabor di henter e famia humano”.
Un di kuater ophetivo ta “eksperimentá modanan partisipativo di ehersé e responsabilidat den anunsio di e Evangelio i den e kompromiso pa konstruí un mundu mas bunita i mas habitabel”.
Tambe “eksaminá kon responsabilidat i poder ta ser bibá den Iglesia, i e strukturanan ku kua na ta ser atministrá, kaminda prewisionan i práktikanan desordená ku no ta radiká den e Evangelio ta bini ariba i ta trata na kombertí nan”.
E di seis ophetivo sitá pa e Dokumento Preparatorio ta “sostené e komunidat kristian komo suheto kreibel i sosio konfiabel riba kamindanan di diálogo sosial, sanashon, rekonsiliashon, inklushon i partisipashon, rekonstrukshon di demokrasia, promoshon di fraternidat i di amistat sosial”.
“Regenerá e relashonnan entre e miembronan di e komunidatnan kristian, asina manera tambe entre e komunidatnan i otro gruponan sosial, por ehemplo, komunidatnan di kreyentenan di otro konfeshonnan i religionnan, organisashonnan di e sosiedat sivil, movementunan popular, etcetera”, lo ta e di shete ophetivo.
Por último, “favoresé balorashon i apropiashon di e frutanan di e resien eksperensianan sinodal na nivel universal, regional, nashonal i lokal”.
Segun e Vademecum, dokumento distribuí huntu ku e Dokumento Preparatorio, e Sínodo lo tin kuater fase.
E promé lo ta e Fase Diosesano, un fase si skucha kaminda lo pidi kontribushon di parokianan, movementunan di laikonan, skolnan i universidatnan, kongregashonnan religioso, komunidatnan kristian, gruponan di akshon sosial. movementunan ekuméniko e interreligioso i otro gruponan.
E di dos fase lo enbolbí e Konferensianan Episkopal i e Sínodonan di e Iglesianan Oriental, ku lo ta enkargá pa kompilá tur e aportashonnan di e Fase Diosesano i lo elaborá un síntesis den un Enkuentro Presinodal. Di e enkuentro aki lo Sali un promé Instrumentum Laboris ku e Sekretaria General di e Sínodo di e Obispunan lo publiká.
E di tres fase lo ta e Fase Kontinental, kaminda, den diferente enkuentro kontinental (shete en total, un pa kontinente), lo produsí shete Dokumento Final ku lo duna forma na e di dos Instrumentum Laboris, ku lo esun ku lo guia e trabounan di e Tatanan Sinodal den e Asamblea di òktober 2023.
Por último, e di kuater fase lo ta selebrashon di e Asamblea di e Sínodo di Obispunan presidí pa Papa Francisco na Roma.
Ta kòrda ku e Dokumento Preparatorio, ta un instrumento “pa faboresé e promé fase di skucha i konsultá e Pueblo di Dios den Iglesianan partikular”, ku lo desaroyá di òktober 2021 pa aprel 2022.
Un yamada pa kana huntu
E Dokumento ta presentá e Sínodo komo un yamada pa kana huntu den un konteksto di kambionan históriko di un sosiedat marká pa e tragedia global di e pandemia di COVID 19, desigualdatnan i inhustisia den un humanidat ku “kada be ta aparesé mas sakudí pa prosesonan di masifikashon i di fragmentashon”.
E situashon aki, “ku, no opstante e diferensianan grandi, ta uni henter e famia humano, ta pone na prueba e kapasidat di Iglesia pa kompañá personanan i komunidatnan”.
Den e kaso konkreto di kristiannan, ta señalá ku no por ignorá esaki. Pues, miéntras ku tin paisnan i regionnan di mundu kaminda mayor parti di e poblashon ta katóliko òf ta pertenesé na diferente denominashon kristian, “ta eksistí otro paisnan den kua katólikonan ta un minoria; den algun di e paisnan aki, katólikonan, huntu ku otro kristiannan, ta eksperimentá formanan di persekushon, inkluso mashá violento i hopi be martirio”.
“Si, di un banda, ta predominá un mentalidat sekularisá ku tin e tendensia pa ekspulsá religion di e espasio públiko, di otro banda, ta eksistí un integrismo religioso, ku no ta respetá libertat di otronan, ya alimentá formanan di intoleransia i di violensia, ku tambe a reflehá den e komunidat kristian i en su relashonnan ku e sosiedat”.
Un Iglesia sinodal
Den e Dokumento ta rekordá tambe ku sinodalidat ta un tradishon mashá antiguo den Iglesia. Iglesia, nan ta destaká, ta “konstitutivamente sinodal”. Sinodalidat “ta muchu mas ku selebrashon di enkuentronan eklesial i asambleanan di obispunan òf un kuestion di simpel atministrashon interno den Iglesia; sinodalidat ta indiká e forma espesífiko di biba e obra di Iglesia”.
Skucha Skrituranan
Asina mes, ta establesé un relashon entre e “kanamentu huntu” di e Iglesianan den e Sínodo i skuchamentu di e Palabra di Dios i su ponementu den práktika.
Den e sentido aki, ta apropiá ku konstrukshon di un Iglesia sinodal ta inspirá den dos imágen di Skritura: e representashon di e esena komunitario “ku konstantemente ta kompañá e kaminda di evangelisashon” i “e eksperensia di de Spiritu den kua Pedro i e komunidat primitivo ta rekonosé e riesgo di pone límitenan inhustifiká na e ko partisipashon di fe”.

Continue Reading

Katoliko

Papa Francisco: Futuro saserdotenan mester ser evaluá integralmente

Published

on

By

Papa Francisco a bisa djabièrnè ku ora un persona ta konsiderá e vokashon saserdotal, ta nesesario evalu’é integralmente pa por tin saserdotenan ku ta kapas pa komuniká e bondat di Dios.
Asina e Tata Santu a indiká dn e Palasio Apostóliko di Vatikano, den e oudiensia konsedé na e formadornan di e Seminario Arzobispado de Milán (Italia), na okashon di e di 150 aniversario di e revista “La Scuola Cattolica” (E Skol Katóliko).
“Ora ta diserní si un persona por inisiá òf konsiderá un rekorido vokashonal, ta nesesario investig’é i evalu’é di moda integral”, Papa Francisco a splika den su diskurso djabièrnè 17 di yüni.
Den e sentido akí, el a kontinuá, “mester tene kuenta ku nan moda di biba afektonan, relashonnan, espasionan, ròlnan, responsabilidatnan, asina manera debilidatnan, temornan i desekilibrionan”.
“Henter e trayekto mester aktivá prosesonan ku ta buska na forma saserdotenan i esnan konsagrá madurá, ekspertonan den humanidat i serkania, i no funshonarionan di lo santu”, Papa Francisco a enfatisá.
Pa esaki, e Tata Santu a resaltá, “superiornan i formadornan di e seminario, esnan ku ta kompañá nan i e personanan den formashon ta yamá na krese diariamente na e plenitut di Kristu p’asina ku, atraves di e testimonio di kada un, e karidat di Kristu ta manifestá su mes mas klaramente”.
Papa Francisco tambe a bisa e formadornan ku “e seminaristanan i hóbennan den formashon mester por siña mas di boso bida ku di boso palabranan, nan mester por siña e bondat di boso obedensia, e trabou di boso dedikashon, e generosidat ku esnan pober di boso sobriedat i disponibilidat, paternidat di boso afekto kasto i no posesivo”.
“Nos ta konsagrá pa sirbi e Pueblo di Dios, pa atendé ku e heridanan di tur hende, kuminsando ku esnan mas pober”, Papa a enfatisá.
Mundu, Papa Francisco a kontinuá, “mester di saserdotenan kapas pa komuniká e bondat di Señor na esun ku ta eksperimentá piká i frakaso, saserdotenan eksperto den humanidat, pastornan dispuesto na kompartí alegria i sufrimentu di e rumannan, hòmbernan ku sa na skucha e gritu di esnan ku ta sufri”.
Renobashon i kuido di vokashonnan
E Tata Santu tambe a dediká un momento di su reflekshon na renobashon di vokashonnan saserdotal.
“Renobashon i futuro di vokashonnan ta posibel únikamente si tin saserdotenan, diákononan, esnan konsagrá i laikonan bon formá”, Papa Francisco a enfatisá.
“Kada vokashon partikular ta nase, krese i ta desaroyá su mes den kurason di Iglesia, i esnan ‘yamá’ no ta manera padestul ku ta aparesé diripiente. E mannan di Señor, ku ta duna forma na e ‘barinan di klei’, ta operá atraves di e kuido ku pasenshi di formadornan i kompañantenan.
Na nan, Papa Francisco a sigurá, “ta konfia e servisio delikado, eksperto i kompetente pa kuida e nasementu, e kompañamentu i disernimentu di vokashonnan, den un proseso ku ta rekerí hopi bondat i konfiansa”.
Servisio di teologia
E Tata Santu tambe a papia di e importansia di teologia i di e nesesidat pa por tin personanan kapas pa splika esaki na e mundu di awe.
E komunidat “mester di trabou di esnan ku ta buska na interpretá fe, tradusié i bolbe tradusié, pa hasié komprensibel, pa eksponé ku palabranan nobo: un trabou ku lo mester bolbe hasié di nobo ku kada generashon”.
Ta pesei, “Iglesia ta enkurashá i ta sostené e esfuerso aki, e difikultat pa bolbe definí kontenido di e fe den kada époka, den e dinamismo di e tradishon”.
Den e sentido akí, Papa Francisco a kontinuá, “e lenguahe teológiko semper mester ta bibu, dinámiko, e no por hasi otro ku evolushoná i preokupá su mes pa hasi su mes komprendibel”.
Papa ademas a mustra riba e papel iluminador di teologia den e mundu aktual kaminda a pèrdè sentido di kosnan.
“Un di e problemanan mas grandi di nos tempu ta en efekto e pèrdida di sentido. Teologia, awe mas ku nunka, tin e gran responsabilidat pa stimulá i orientá e búskeda, pa iluminá e kaminda”.

Continue Reading

Katoliko

Historia di dia di Tata

Published

on

By

Irónikamente, kreashon di dia di Tata, finalmente, a keda inspirá de un predikashi riba dia di mama. Na 1909, Sonora Smart Dodd de Spokane, Washington, a skucha un predikashi i a duna kuenta di ku su tata a meresé homenahe similar. E tabata Henry Jackson Smart, kunukero i veterano di guera sivil, kende a kria Sonora i su sinku yunan chikí despues di ku su esposa lo a muri dor di komplikashonnan durante nasementu di su di seis yu.
Sonora tabata ke un dia spesial pa su tata lo a sa kantu e tabata apresiá su amor i apnegashon, asina manera e sakrifisionan ku el a realisá komo tata soltero. Dia 19 di yüni 1910, riba dia di kumpleaño di Henry, Sonora a festehá e dia di Tata pa di promé bia na Spokane. Na 1924, Presidente Calvin Coolidge a apoyá públikamente e dia Nashonal di Tata. Finalmente, na 1966, Presidente Lyndon Johnson a firma un resolushon pa kombertí Dia di Tata den dia festivo nashonal. Seis aña mas lat, presidente Richard Nixon ta kombertié den lei permanente pa festehá dia di Tata riba e di tres djadumingu di yüni.
Sin embargo, e selebrashon akí ta varia di fecha den diferente pais di mundu. Algun ta konservá e di tres djadumingu di yüni, manera ta mayoria di e paisnan latinoamerikano, miéntras ku otronan ta preferá hasié dia 19 di mart, dia di San Hosé, manera ta e ehèmpel di Bolivia, Spaña i Honduras

Continue Reading

Katoliko

Di Shete Djadumingu di Pasku di Resurekshon

Published

on

By

Promé Lektura : Hechonan di apòstelnan 7, 55-60
Salmo : Salmo 97, 1-2. 6-7. 9
Di dos Lektura : Revelashon 22, 12-14. 16-17. 20
Evangelio : Huan 17, 20-26

E evangelio di awe ta ofresé nos un bunita okashon pa meditá den unidat. E ta bin ta ripití den e último añanan akí ku mundu ke logra integrashon kada be mas grandi entre pueblo i individuonan.Pa medio di FE nos sa ku moveshon di historia ta bai kondusiendo nos na realisashon di e soño asina largu sperá, e union den un solo famia. Nos tur ta anhelá un edat den kua no tin divishon i ku riba tera ta kuminsá un era di pas i di hermandat. Kristu den e ora mas solèm di su bida a resa pa unidat di hende: “Pa tur hende sea un.”
Uni hende ku otro i ku Dios ta e ideal i trabou di Iglesia. Pa e ideal akí si ta bal la pena inbertí tur nos energia. Pero promé laga nos mes un pregunta: Kiko ta unidat? Biba den unidat no ta nifiká pensa igual, sinti mesun kos, ku ta uni tur ser humano den un uniformidat laf i steril. Dos esposo sa ku ta uní no ta nifiká ku kada un mester pèrdè su personalidat. Unidat no ke men renunsiá na nos manera di pensa. Tampoko e ta nifiká semper keda ketu o keda sin defendé konvikshonnan propio.. Kiko e ora ei ta unidat ? Lo splik’é ku un frase hopi ripití, pero berdadero. Unidat ta e armonia kreá di diversidatnan. San Pablo ta splika e konsepto akí ku e imágen di e kurpa humano. “Ta un hecho ku e kurpa, siendo un, tin hopi parti , pero e partinan maske ku nan ta hopi, ta forma entre tur un solo kurpa”. Nos kurpa ta papiando ku nos di un maravioso unidat konstruí a base di diversidat. Ta logra e armonia akí pasobra tur parti di e kurpa ta traha, ta move, ta aktua den funshon di e konhunto.
Sosiedat ta konsistí di un variedat riku di hende. Tin múltiple rasa, lenga i kultura. Kada un ta poseé su propio rikesa.
Pa biba den unidat laga nos kuminsá na aseptá e diversidat ku ta eksistí den mundu. Nos no ta pretendé di biba den un paraiso irealístiko kaminda tur hende ta pensa igual i ta kana riba e mesun kaminda. Laga nos aseptá e desafio pa biba e unidat den e diversidat, pa logra armonia atraves di rèspèt pa variedat. Laga nos ta outéntiko den nos manera di pensa i di aktua i laga nos respetá e forma personal di pensa i di aktua di kada persona, semper i kuando esaki no afektá e bon komun.
Ta logra armonia ora kada hende kontribuí na e bon komun. E dos palabranan aki: bon komun, ta esnan ku mester inspirá nos akshonnan. Ora e interes personal i egoista ta pone su mes dilanti di e bon komun, e ora ei unidat i konkordansha ta kibra.
Kristu, ora e ta resa pa unidat, no ta pensando únikamente den un unidat horizontal, ke men di hende entre un ku otro. “Ku nan tambe ta ku nos”, Hesus a pidi den su orashon na Tata. En bèrdat, no por tin union duradero entre hende si Dios no ta e laso ku ta uni nos.

Sinembargo, kon difísil ainda ta e unidat entre kristiannan. No ta nesesario mira pafó i haña un mundu den guera konstante pa konkluí kon difísil ta di biba den unidat. Ta sufisiente pa nos mira un poko paden di nos mes pa deskubrí den nos propio sentimentu e rais di un divishon profundo. E rais akí ta nos egoismo.
Nos sa ku egoismo ta un forsa ku nos tur ta dirigí t’e na nos propio satisfakshon. Nos por bisa ku komo ser humano nos ta lèn den direkshon di egoismo, pero komo kristian nos mester obra ku amor. Stima ta nifiká sali di nos mes pa proyektá nos mes den direkshon di otro. Ora nos logra konvensé nos mes di e forsa konstruktivo ku amor ta enserá, únikamente e ora ei nos lo kuminsá traha riba e bon komun.
Den eukaristia kada djadumingu, nos ta selebrá e unidat di e famia kristian. Un solo Señor, un solo fe, un solo boutismo, un solo Dios I Tata. Tur loke tin den misa ta papia ku nos di unidat: altá ta e mesa di famia, kaminda komo ruman nos ta sinta pa kome di e mesun pan i pa bebe di e mesun biña. Ku ora nos sali di e tèmpel akí nos bai na praktiká e unidat i komunion ku nos a bin pa selebrá bibando den rèspèt mutuo i den amor, promoviendo e bon komun.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login