Den e promé siman di Sèptèmber 2021, e klupnan di Kiwanis di Aruba huntu ku ku tur e otro klupnan di Kòrsou, Bonaire, Trinidad/Tobago i Sürnam a bini huntu pa di un forma virtual, reuní ku otro i asina kompartí e lokalnan tur e klupnan ta hasiendo. E Gobernador di e distrito ku e klupnan di Kiwanis ta pertenesé na dje, tambe tabata presente, apesar di e restrikshonnan debí ku Covid 19. Mi persona tambe tabata na Aruba i a keda sumamente enkantá di e hospitalidat ku nos a haña di nos rumannan di Aruba. E enkuentro tabata un éksito rotundo i Aruba por mira bek na un konferensia sumamente bon organisá.

Kiwanis Club San Nicolas Un di e klupnan di Kiwanis ku kuminsamentu di aña pasa a mira lus di dia ta Kiwanis Club San Nicolas. E klup di Kiwanis aki ta konsistí di hóbennan sumamente dinámiko i ku ta prometé hopi pa futuro. Mayoria di e hóbennan aki ta bida den San Nicolas i ku hopi orguyo nan ta hasiendo hopi trabou na benefisio di e parti di Aruba aki. Un di e miembronan ta un antropólogo, Sr. dr. Gregory Richardson, a duna un charla sumamente interesante over di e diferente gruponan ku a i ketu bai ta bida na San Nicolas.

San Nicolas
No solamente na Kòrsou un refineria a wòrdu konstruí pero tambe na Aruba na 1924 den e parti di San Nicolas. Esaki a trese kuné meskos ku na Kòrsou, un inyekshon formal den ekonomia di e isla. Ku yegada di Esso, lokalmente konosí komo Lago no solamente e ekonomia a floresé pero tambe mester a buska hende pa bin traha na e refineria. Asina bo ta haña ku fluho di estranhero ku a bini Aruba tabata grandi. E diferensia ku Kòrsou tabata ku na Aruba tur e hendenan ku a bini di afó a konsentrá na San Nicolas miéntras na Kòrsou e refineria Shell tabata den sentro di e isla.
E influensia di e gruponan ku a bin traha i biba na San Nicolas tabata tin su influensia kon e parti di San Nicolas a desaroyá. Kada unu di e gruponan aki tabata tin nan mes estilo di bida i ta p’esei no ta straño ku na San Nicolas bo ta haña masha hopi iglesia. Esun mas grandi ta sin duda e iglesia katóliko ku ta karga e nòmber di Santa Teresita. Rondo di e misa aki bo ta haña diferente skol I tambe klupnan sosial.

Seramentu di e Refineria Ora ku Lago a bandoná Aruba, esaki tabata un gòlpi grandi pa no solamente San Nicolas pero tambe henter Aruba. Despues di Esso e refineria a pasa den diferente man pero ya tin algun aña kaba ku e ta sera i maske ku polítikonan ta primintí masha hopi kos ku e refineria lo ta bai habri atrobe, mayoria di hende ta realista ku esaki lo no ta bai ta e kaso. E invershon ku tin ku hasi ta asina grandi ku ningun kompania fásilmente lo por saka nan sèn.
Dor di e diferente nashonalidat ku a bini traha na San Nicolas, esaki a trese kuné ku aparte di e parti ekonómiko tambe San Nicolas a haña hopi damanan ku tabata ehersé e fishi mas bieu na mundu. Te ainda apesar ku Covid a influensiá hopi e negoshi, te ainda ora bo ta kore den San Nicolas bo ta mira algun ta kana wak sin nan ta haña kliente.

Impulso nobo pa San Nicolas E reunionnan di Kiwanis a terminá riba djasabra i Kiwanis Club San Nicolas a organisá pa tur partisipante un rekorido den San Nicolas pa asina nos por a mira di aserka kon e esfuerso ta wòrdu hasi pa duna San Nicolas bida nobo. Gregory Richardson tabata nos guia ku a kana ku nos den e kayanan di San Nicolas i a mustra nos kon ta trahando duru pa hasi di e parti di Aruba aki algu bunita. San Nicolas sigur tin hopi historia i si bo por logra haña ku turistanan ta bin bishita e parti históriko aki di Aruba, chèns ta hopi grandi ku e di dos siudat di Aruba tin chèns di floresé atrobe.

Pinturanan na diferente parti di San Nicolas. Un di e kosnan ku diferente artista a hasi ta di duna nan kooperashon dor di pinta e murayanan di San Nicolas ku algun pintura sumamente yamativo i bunita. Ora bo ta kana i ta atmirá e pinturanan bo ta keda realmente impreshoná kon e artistanan a pinta di un manera úniko e murayanan di San Nicolas.

Kòrsou ta bon representá den e pinturanan. Ku hopi orguyo nos a ripara ku den e pinturanan i obra di arte tin dos yu’i di Kòrsou ku tambe a duna nan kontribushon den persona di Francis Sling i Giovani Abath. E pintura di Francis Sling ta unu sumamente bunita ku ora bo para su dilanti bo ta ripara kon bon e artista aki ta. Un presiosidat.
Tambe Giovani Abath no a keda atras i bo por atmirá sigur 3 obra di dje na San Nicolas. Komo yu’i di Kòrsou klaro ku bo ta sinti bo orguyoso di mira kon nos artistanan lokal tambe ta parti di e totalidat di un isla ruman. E obranan di Giovani tin su seyo di 7.1 graba den e obra.

Nicolaas store
Despues di e kaminata nos tur a bai Nicolaas store kaminda tur partisipante por a saboriá di un kos di kome i algu di bebe. Dilanti di Nicolaas store tabata tin un grupo di steelband ta toka dunando un tiki ambiente na e lugá.
Nicolaas store ta fungi awor aki komo un restorant kaminda bo por kome i bebe. E lugá aki a wòrdu restourá hopi bunita mes i sigur ta un atkisishon bunita pa San Nicolas. Den e restorant tin un potrèt grandi di e doño un ta Sr. Nicolaas originalmente di Boneiru. Den pasado e lugá aki tabata un tienda ku despues a wòrdu transformá den un restorant. E nòmber a keda meskos i e restourashon ta masha bunita hasi. Den e restorant tambe a djòin nos Sr. Leon Berenos, originalmente di Aruba pero kende a biba basta aña na Kòrsou. E tabata forma parti den pasado di Kiwanis Club Curaçao i asina konosé hopi persona ku un tempu tabata relashoná ku Kiwanis Club Curaçao. Un persona hopi agradabel i ku ta basta tempu na Aruba, special San Nicolas kaminda e ta fungi tambe komo guia pa mustra turistanan i grupo di hendenan ku ta deseá esaki, kon e desaroyo di San Nicolas a transformá.
Despues di a saboriá un dushi kuminda e grupo a sigui pa e “watertoren” ku ántes tabata wòrdu usa i ku awor a wòrdu konvertí den un museo. Den e edifisio aki nan pa pone na diferente sitio historia di San Nicolas. Sr. Leon Berenos ku su eksperensia amplio a splika tur presente e importansia di e watertoren i kon su uso tabata den pasado.
Despues di a bishita e watertoren nos a regresá bek na Misa Katóliko di San Nicolas pa tur hende por regresá nan kas.

Baby Beach Sinembargo e persona enkargá pa hiba nos bek Hotèl a disidí di mustra nos algu di Baby beach. Esaki ta un di e playanan masha frekuentá na San Nicolas. Bayendo direkshon di e playa bo ta pasa un anker kòrá grandi dediká na tur e piskadónan ku pèrdè nan bida durante ku nan tabata piska. Nos ta pasa tambe na “colony” ku tabata e kasnan ku e managernan ekstranhero tabata biba durante di nan estadia na San Nicolas. Tin algun kas ketu bai ta para bashí pero nos a komprondé ku e kasnan ta den man di gobièrnu Arubano I ta parse ku tin hende ta interesá pa kumpra un di e kasnan aki. E kasnan ta grandi i espasio. Hasta tin un misa protestant ku un tèmpo tabata wòrdu usa. Pa bo yega Baby Beach bo tin ku pasa un otro playa Rodgers Beach. Tin un pir konstruí na e playa aki kaminda boto por mara.
Baby Beach mes ta un playa no masha grandi pero riba djadumingu hopi drùk ku hendenan lokal ku ta bini pa dibertí. Tin un restorant kaminda esun ku ke por kumpra kuminda. Jammer ku nos no tabata tin hopi tempu de lo kontrario nos a tira un kabes den e awa.
Bayendo bek nos ta mira diferente kancha di volley i tènis ku ántes tabata wòrdu usa pero ku awor ta den dekadensia. Na San Nicolas te ainda tin un hospital IMSAN, Instituto Médiko San Nicolas, i nos a komprondé ku a ekspandé y modernis’é despues di hopi tèmpo. E hospital aki tabata importante tempu ku e Refineria tabata funshoná. Pero nos a komprondé ku special ku Covid hopi hende ku mester di yudansa médiko, no relatá ku Covid, ta bai akinan pa servisio di promé asistensia.

Skibi pa Anthony Haile