· Deporte 5 Star ayera tabatin e privilegio di a kombersá den e seshon “Cuando Yo, Era Yo” di Deporte Hoyer ku Sr. Nelson Maria ku ta un tesorero di “luho” di nos deporte, spesialmente futbòl, i último añanan e ta hasi e trabou di FDOK. Sr. Nelson Msria tin un trayektoria largu den deporte. E ta bini di famia di deporte, “Mau” i “Echi” Maria (dfm) ta su primu banda di Tata, i banda di Mama su primu ta e eks estrea di futbòl Glenn Kwidama.
Esei ta nifiká ku Nelson Maria no por a skapa, deporte ta den su sanger.
E mes a hunga futbòl na edat hóben, i tabata den e tim di Vesta. Nelson a konta ayera ku dado momento tabatin 16 Maria den futbòl.
E ta ruman tambe di nos amigu entrenadó di futbòl Sr. Kenneth Maria. Na edat hóben nan a lanta un tim di bario ku nan a yama Cosmos.
E la kuminsá su trayektoria komo di dos tesorero serka e organisashon di Vesta enkabesá pa Sr. Joe Mathilda (dfm). Nelson a konta ayera mainta den “Cuando Yo, Era Yo” di su trayektoria komo dirigente, e la traha den Centro Dominguito, den Jong Colombia, i a forma parti den mayoria di direktiva di futbòl lokal i Antiano ku presidentenan manera: “Chito” Wallé, Andres Constancia (dfM), Sr. Jean Francisca.

Pa hopi aña tambe e tabata e hòmber finansiero na ADC.

Fuera di federashonnan lokal, Sr. Nelson Maria tambe a traha komo tesorero di Union Karibense di Futbòl den vários periodo.
E hòmber finansiero di FDOK a konta 5 Star ku e la yega di enkabesá vários delegashon di futbòl i ku nos tin dos minister den e aktualmente gabinete ku a biaha kuné komo futbolista.

Nos premier Sr. Gilmar, “Pik” Pisas a bai Trinidad ku selekshon hubenil, miéntras ku minister di ekonomia Sr. Ruisandro Cijntje tabata den e selekshon hubenil ku a aktua na Canada.
Tambe Sr. Nelson Maria ta riba e “Wall of Fame” ku FFK a introdusí resientemente.

Minister Ruisandro Cijntje.