Deporte 5 Star a kombersa ayera merdia ku Sr. Rudsel Schmidt máksimo dirigente dje tim di New Song.

Rudsel a bisa nos ku naturalmente e ta kibrá despues di tende e veredikto i ku Jong Colombia i Hubentut Fortuna ta hunga e final.
“Mi no por a drumi..
Bo ta sinti un Inhustisia”, e ta remarká.
Rudsel ta bisa ku bo no por proba, pero ku bo ta sinti ku tabatin un plan.
“Bo ta sinti inhustisia”, e ta remarká.
Schmidt a bisa ku nan ta traha ku nan muchanan. I loke a sosodé ta un sla enorme.
“Ta un sla pa e muchanan.

Nan a traha duru i nan tambe lo ke subi i proba nan mes”, el a añadí.
El a splika ku nan a pidi “beroep” i no a haña kontesta.

Na su konsepto FFK tabata sa for di “day-1” ku e hungadó a haña tarheta kòrá.

Tin masha hopi kos mas ku nos a tende.

Kosnan ku no ta na benefisio di deporte.
Na benefisio di futbòl i hóbennan.
E máksimo dirigente di New Song a sigurá ku nan lo sigui move i ku e kos lo nos keda asina.
Schmidt a splika tambe ku nan a forma un komishon ku lo atendé ku e problemátiko aki. Nan no ta ekskluí nada i asta lo ta dispuesto pa bai FIFA, pasó loke a sosodé tin un sabor di inhustisia.
El a splika 5 Star ku nan ta un organisashon ku ta traha duru i ku nan hóbennan. “Tabatin un aña ku nos a pèrdè 13 hungadó”, el a konta.
Manera ta konosí den e Órgano Ofisial ku a sali djabièrnè último FFK ta informá ku e final di segundo divishon lo bai entre Hubentut Fortuna i Jong Cololmbia, loke ta nifiká New Song lo tin di warda te otro aña. Manera ta konosí, Tera Kòrá tabata dilanti 6-0 vs Hubentut Fortuna, pero nan a hinka un futbòlista den wega ku lo mester a haña tarheta kòrá, i Hubentut Fortuna a protestá, gana e wega 3-0 i asina pa diferensia di gol ta laga New Song “den tereno”.