E situashon den futbòl lokal ta sigui interesante i kayente.
5 Star a komprondé ku e máksimo dirigente di FFK ku ta Sr. Ramiro Griffith lo yega Kòrsou awe for di Qatar i ta antisipá ku mañan mèrdia e direktiva di FFK lo reuní. E situashon den FFK ta mustra kayente ya ku tin un parti grandi di direktiva ku lo no tabata di akuerdo pa hunga e final di segundo divishon.
Apesar di esei Sr. Griffith a duna òrdu pa e final kontinuá i Atletiko di Saliña a bira kampeon i ta promové.
Ramiro su desishon pa sigui lo mester tabata kontra di komishon di arbitrahe ku lo mester a konsehá pa atendé e protesta di Hubentut Fortuna.
Lo mester bini aklarashon den e reunion riba e “ITC” dje futbolistanan Ulandes ku a hunga pa Atlétiko di Saliña.
Pa un futbolista hunga di un liga pa otro e mester wòrdu di “clear” pa e transferensia ta ofisial di un federashon pa otro.
Sin e papel ei e hungadó ta ilegal.
Tambe bo ta tende ku e último dirigente ku a drenta direktiva di FFK ta pone bon kla ku e ta bai tin vários pregunta i ku e no ta aseptá kiko ku ta, i lo ta hasta dispuesto pa “bedank”, paso e no ta deseá di ta den “chanchuyo” debí ku e ta outoridat di rango haltu.
Hopi kos tin den “kaya”, i ku lo mester haña un klaridat despues dje reunion di mañan mèrdia ku ta primintí di bira “Hot”.
Ya kaba a atvertí “Brantwer” di Rio Canario pa ta riba un alerta !!!
Nan ta bisa ku Sr. Griffith ta hopi determiná i lo no duda pa trese hopi kos ku no por mira lus di dia na klaridat, sigur despues di tende ku ta buskando firma pa kore kuné.

A pidi tur hende di Rio Canario pa nan ta na trabou, i hasta a atvertí esnan di Steenrijk.
E dianan aki tin awa na abundansia pa paga kandela.
(Korant tin di bende !!)