E desishon di Ingeniero Sr. Lennert Angela pa legumai nos selekshon di softball femenino fastpitch tin nos softball femenino fastpitch di “luto”.
Lennert Angela ku tabata presidente di CSB a haña konfiansa serka e direktiva aktual presidí pa Sr. Chu Martis pa kontinuá ku selekshon.
Lennert ta esun ku a kuminsá ku e trayektoria pa trese nos softball femenino fastpitch bek riba mapa Internashonal loke e la hasi tremendamente bon.
Ku Lennert komo “motor” nos softball femenino ta bek Internashonalmente.
No únikamente Lennert ku ta dirigente tékniko sa kiko ta nifiká softball fastpitch di nivel, pero e ta tambe un persona ku ta sumamente bon den merkadeo loke e la hasi tambe ku nos selekshon.
Lennert a sinti sumes malu paso tabatin akuerdonan hasi ku CSB no a kumpli kuné i no tabata promé biaha. Lennert a bisa 5 Star ku tabatin palabrashon ku a wòrdu hasí ku CSB no a kumpli kuné.
Lennert a manda un karta pa CSB demostrando su malkontentu.
E máksimo dirigente di nos softball Sr. “Chu” Martis no a hasi muchu kaso di e remarkenan di Lennert, i simplemente a kontesta Lennert ku ta “Oke”.
Lennert e ora ei a saka su konklushon i tuma e desishon pa legumai e tarea ku e tabatin. Sin duda e desishon di Lennert ta pone ku nos sòftbòl femenino fastpitch ku Internashonalmente a haña rekonosementu bek ta di “luto”.
Nos ku tin hopi aña den softball por sigurá ku no tin niun hende na Kòrsou pa hasi e trabou ku Lennert a bini ta hasi.
Nos ta konvensí ku MCB ku ta yuda den patrosinio i FDOK tin di intervení.
No por laga niun hende kibra e bon trabou ku Lennert a bini ta hasi, paso ounke presidente, e softball no ta dibo. MCB i FDOK tin di intermediá i pone hende su kabes pareu.
Tin hende ku poder ta pone ku nan kabes ta kuminsá suta.
Ta e úniko konklushon ku nos por saka si un hende bisa ku ta NOBO I korant Bala ke kibra softball, siendo ku ta e dos medianan ku mas ta dediká na softball promé ku vários dirigente di e aktual direktiva di CSB a nase.