Connect with us

Sosial

REMSES RAFAELA TA PRESENTA ‘LIVESTREAM’ FRESH: MI MAMA

Published

on

WILLEMSTAD – Djabièrnè, 16 di aprel 2021, bo por gosa konfortabelmente na kas di e ‘livestream’ FRESH: Mi Mama presentá pa bailarin profeshonal, koreógrafo i kreadó di teater, Remses Rafaela. E presentashon lo keda transmití ‘live’ fo’i Maaspodium na Rotterdam, i ta kuminsa 3ór di atardi (ora di Korsou), pa unda un i tur por sintonisá esaki!
Durante e ‘livestream’ FRESH: Mi Mama, Remses, kende a nase i lanta na Korsou, ta invitá nos pa djòin e riba su búskeda pa kompronde e sekso femenino mihó i kiko ta nifika pa ta muhé den e époka aki. SI bo kier forma parti di esaki, e karchinan pa e ‘livestream’ ta 5 euro so i ta disponibel ‘online’ na www.maastd.nl/livestream-mimama.

FRESH: MI MAMA Inspirá pa e muhé di su hubentut, amplifika pa su eksperensianan komo tata, Remses ta sasia su kuriosidat i ta aseptá e reto pa mapa kon e hende muhé ta eksperensia mundu. Su yu hòmber i yu muhé ta e motivashon di mas grandi tras di e biahe personal aki, unda e ke kontribuí na un mundu ku su yunan ta sinti nan mes kompronde, aseptá i sostené. Pa yuda forma e mundu aki, e ta sinti ta su deber pa purba kompronde e ser femenino mas mihó. Durante FRESH: Mi Mama, Remses ta invitá diferente muhé pa kompartí nan eksperensianan den forma di baile, músika i pelíkula. Segun Remses, “nos mester tin e kurashi pa kana riba nos mes un kaminda, nos destino, maske esaki ta diferente di e kaminda ku bo mayor nan a stipulá pa bo. Si bo keda kana den imprenta di otro, nunka nada no lo kambia”.

MAS DI REMSES Remses Rafaela, mihó konosí komo ‘Muisje Muis’, tin un pashon pa baile fo’i chikí. Su estilo ta influensia pa su raisnan afrokaribense manera salsa i kalypso, mesklá ku akrobasia, hip hop i baile moderno ku ta resultá den un moda di ekspreshon úniko. Anteriormente serka Maaspodium, nos por a mira Remses durante su presentashon ‘RPhO meets Maas’ i e presentashon di breakdance ‘B-BOY’. Durante e ultimo periodo, Remses a produsí su promé obra pa mucha titulá ‘Wijzer’, kual e ta preparando pa trese Korsou, Boneiru i Aruba promé ku e fin di e aña. KARCHI FRESH: Mi Mama a keda produsí pa e fundashon Passion & Skillz, fundá pa Remses Rafaela i lo keda transmití ‘live’ fo’i Maaspodium. E ‘livestream’ ta kuminsa 3ór di atardi dia 16 di aprel, ora di Korsou, i ta dura aproksimadamente 60 minüt.

Karchinan ta na rason di 5 euro i bo por paga ku bo karchi di krédito. Kumpra bo karchi ‘online’ na www.maastd.nl/livestream-mimama i risibí bo link di akseso via e-mail dia 16 di aprel. Pa mas informashon, por siguí Remses Rafaela riba vários plataforma sosial manera Facebook.com/remses.rafaela i Instagram.com/muisjemuis of riba su wepsait www.passion-and-skillz.com.

Continue Reading

Sosial

Kuater ganadó di Televishon di 55″ di Coca-Cola su Kampaña di ‘World Cup’

Published

on

By

Willemstad – Komo un di e spònsernan ofisial di WK Futbòl, Coca-Cola a organisá un kampaña relashoná ku e tema aki pa su konsumidónan. Riba e tapa di oro di tur produkto produsí lokal, a pone un imágen di un futbòl. Por kambia e tapanan aki pa e produktonan original di WK di Coca-Cola, Powerade i Adidas.
Konsumidónan tambe por yena un lòt pa por gana e premio mayó: un Volkswagen Saveiro 2023 riba 30 di desèmber próksimo. Pero promé ku yega asina leu, Coca-Cola a organisá e promé entrega di premio den kua nan a rifa kuater 55″ Smart TV.

Na Bonaire tabatin dos gananadó Monique Balentien i Joanne Philips.
E e felis ganadornan di dos televishon na Kòrsou ta Yanfen Liang i Thalia Ortela.

E premiashon na Kòrsou a tuma lugá na e partner prinsipal Select Automotive na Seru Lora ku tambe ta un di e puntonan di entrega. Pa kambia tapa, nan ta habrí djaweps i djabièrnè for di di 9’or di mahinta te 5.30 or di atardi i riba djasabra di 9’or di mahinta te 1’or di mèrdia. Sambil ta yama tur konsumidó bon biní pa entregá nan tapa di djarason te ku djadumingu di 1’or di mèrdia pa 8’or di anochi.
Best Brands Bonaire ta habrí di djaluna pa djasabra di 8’or di mahinta pa 5’or di atardi.

Produktonan di WK
E produktonan ku e konsumidó por skohe ta un tas di lomba (rugtas) i tèrmu kùp (‘tumbler’) di Coca-Cola (5 tapa i Fl. 10,00 pa produkto) i un ‘drawstring’ tas òf ‘bidon’ di Powerade (5 tapa i Fl. 2,00 pa produkto). Adidas, partner di WK, a pone pèchi disponibel pa 15 tapa, sin pago. Tambe tin bala pa Fl. 5,00 i glas pa Fl. 2,00 huntu ku 5 tapa. Ademas di esaki, konsumidó ku kambia nan tapa ta haña un bòn di deskuento di 10% na e pakus di Adidas na Sambil.

Pa mas informashon por bishitá e página di Facebook CocaColaCuracao; riba Instagram CocaColaKorsou, via telefòn 461-3311 òf por manda un mail na [email protected]

Continue Reading

Sosial

Shashindushka Nazir, Miss Curaçao Holland 2023

Published

on

By

** Djasabra anochi a tuma lugá e di dos edishon di e Sertámen Miss Curaçao Hollands 2023. Fanátikonan di e 8 partisipantenan entusiasmá pa animá nan partisipante faborito ku ya tabatin 2 luna den preparashonnan intensivo ku a kulminá den e tremendo anochi ku e tema “VIVE L’ AFRIQUE”
Un anochi ku a ser kondusí pa Presidente di “Dia di Tula” Vany Hooi, Grupo di Baile ku a ser kordiná pa e hóben Chendel Beker I artistanan manera Kilate Tesla I T Shean ku a deleitá e públiko ku kansionnan inolvidabel.

Un anochi kaminda a kuminsá ku un Black Carpet kaminda tur hurado, partners I invitadonan speshal por a pasa I ser risibí pa e ekipo di Aubrey America. Den e anochi speshal aki a konta ku presensia di Mariana Pietersz Promé Finalista Miss Universo Curaçao 2022 i Kanisha Sluis Finalista di Miss Grand 2022.

Un anochi hopi emoshonal kaminda Jeny Minguel e promé Miss Curaçao Holland 2022 mester a tuma despedida di su título pa asumí ofisialmente su título Internashonal ku e diferente tareanan ku e organisashon a pone pe hasi.

Resultadonan di e anochi:

Miss Beautiful Face I Most Discipline 2022: # 04 Shashinduska Nazir
Most Beautifull Smile: #02 Shurnalie Nivillac
Best Body, Most beautifull Hair, Miss Internet I Most Dynamic: #03 Kim Rossen
Most Amity: #07 Jurinaiska Celestijn
Most Eelegance I Most Beautill Skin: #09 Kimberly Stuart

Semi finalistanan: Kim Rossen, Shashinduska Nazir, Kimberly Stuart i Jurinaiska Celestijn.

Ganadornan:
2 nd Runner up: Kimberly Stuart
1 st Runner up: Kim Rossen
Miss Curaçao Holland 2023: Shashindushka Nazir

Ekipo di Aubrey America ta sumamente kontentu ku e resultado final I awor aki planiando e tareanan ku e hóbennan aki lo tin ku ehersé den e aña di reinado.
Nos ke deseá e hóbennan aki tur klase di éksito den nan trayektoria nobo komo Embahadora di nos Komunidat aki na Hulanda. Sigui nan pasonan via tur e medionan sosial di Aubrey America.

Continue Reading

Sosial

Festival di lus mágiko den kurá di Landhùis Bloemhof

Published

on

By

Willemstad – Mondi Mágiko ta bèk. Di 8 di Dezèmber 2022 te ku 6 di Yanüari 2023 e kurá di Landhùis Bloemhof ta transformá den un parke mágiko ku míles di lus. E aña akí e tema lo ta Kompa Nanzi, e araña sabí di nos kuentanan di ántes.
Pa e edishon aki atrobe Landhùis Bloemhof a será kabes ku artista Giovanni Abath i su tim di Kara Productions pa krea e festival di lus deslumbrante. Na 2019, Mondi Mágiko a ser organisá pa promé biaha. Lanthùis Bloemhof i Kara Productions a bin ku e inisiativa espektakular den e luna di fiesta. Mas ku 18.000 bishitante a disfrutá di e ambiente di fin di aña.

Èkstra festivo
Dor di COVID-19 e fiesta di lus no por a tuma lugá e último dos añanan. Despues di dos aña difísil, Landhùis Bloemhof i Kara productions ker a ofresé algu èkstra festivo na grandi i chikí durante fin di aña. Mondi Mágiko ta pa hinter famia. E rason prinsipal ta pa trese hende huntu den un esfera di lus i magia. Den un ambiente uniko bishitantenan lo biba momentunan ku rekuerdonan agradabel pa rekordá hopi tempu despues di e luna di fiesta. E magia ei – ta e motibu prinsipal ku ta organisá Mondi Mágiko.

Kompa Nanzi
Mondi Mágiko ta konsistí di un programa varia rondó di Kompa Nanzi. Banda di e kaminata iluminá dor di e mondi di Bloemhof, tin un eksposishon titulá ‘Lus riba Nanzi’. Tambe tin presentashon musikal i hende disfrutá di fragmentonan di e aventuranan di Kompa Nanzi. Riba 15 di Dezèmber e Café Literario ta den gara di e araña astuto. E kuentanan di Nanzi originalmente a bin for di Ghana i a ser traspasá i kontá den tur parti di mundu na unda hende sklavisá a ser obligá pa traha. E kuentanan tabata un forma di protesta; nan tabata konta nan den sekreto durante trabou òf anochi promé ku bai drumi. Den e periodo di sklabitut Nanzi a haña un kontrinkante; Cha Tiger. Nanzi semper tabata mas sabí kuné. E tiger tabata símbolo pa e opresor, anto Nanzi pa e hende sklavisá. Di e manera aki Mondi Mágiko ta selebrá e kultura di konta kuenta.

Entrada
Mondi Mágiko ta habri djaweps 8 di Dezèmber pa públiko i lo ta habrí riba djabièrnè, djasabra i djadumingu di 6’or te 10’or di anochi. E otro dianan ta reservá pa kompanianan. Durante siman di 23 te ku 30 di Dezèmber, públiko general por bishita Mondi Mágiko tur dia. Karchi ta na benta online via www.mondimagiko.com, òf na porta i ta kosta 20,00 florin pa adulto i 10 florin pa mucha te ku 12 aña.

Lanthùis Bloemhof ta situá na Santa Rosaweg 6, banda di Café Tap Maar In. Mas informashon ta disponibel via e-mail [email protected] bloemhof.cw . Sigui nos riba Instagram i ‘like’ nos paginá di Facebook.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login