WILLEMSTAD – En kuadro di Dia Internashonal di Derecho pa Mucha, Stichting Passion & Skillz huntu ku Child First Foundation, ta estrena e ‘short-film’ impaktante titula ‘Kaminda’, dia 21 di November benidero. E estreno lo tuma luga na e edifisio di ASA, na Buena Vista.
Trese un yu na mundu ta un di e regalonan mas presioso ku un tata por eksperensia. Ta enbolbí den bida di bo yu, unda bo ta mir’e krese, desaroya i diskubrí mundu, ta un privilegio ku hopi ta konsidera e norma, pero tin hopi tata ku no ta haña nan yu mira pa motibu di un desputa di kustodia ku e èks pareha. Ku KAMINDA, e produktor kultural kurasoleño Remses Rafaela i bailarina Anna Maria Suykerbuyk ta duna homenage na e laso importante entre mayor i yu den un pelíkula di baile.
Kaminda – e pelíkula

‘Kaminda ‘, ta un pelíkula di baile i ultimo produkshon di Remses Rafaela, huntu ku bailarina Anna Maria Suykerbuyk. E pelíkula di baile por keda deskribí komo un poema sinematográfiko ku moveshon, unda e bailarinnan a kaptura nan biahe personal di paternidat. Den ‘Kaminda’ esun protagonista ta konta kon alienashon paternal i e oposishon di e sistema a afekte i e otro ta papia over paternidat sin pareha. Motivá pa nan fuente di inspirashon prinsipal, ku ta nan yunan, nan tur dos ta kompartí su eksperensia personal den un diálogo di baile úniko ku músika di Remses Rafaela i filma pa Railyson Martina di My Vision Counts.

MAS DI REMSES
Remses ta krea i produsi aktuashon, músika i pelíkula multi disiplinario foi e perspektiva afro karibense. Nos konose komo rapper ‘Muisje Muis’, presentadó i bailarín. Rafaela, aktualmente tin un relashon estrecho ku Maas Teater, unda e ta fungi komo produktor independiente di varios obra teatral manera e investigashon kultural Fresh: Mi Mama, e obra pa mucha Wijzer i ultimo e enkuentro kultural TOPA unda ela kolabora ku entre otro musiko Vernon Chatlein i bailarinnan Pom Arnold, Sarada Sarita Keilman i Dalton Jansen. Aktualmente e ta presentando den MELOMANIAC, un ‘crossover’ di musika i baile ku orkesta Filarmóniko di Rotterdam.
KAMINDA KAMINDA lo keda transmití via di ‘livestream’ dia 20 di November próksimo, 8’or dia anochi NL TIME ku ta 2 PM ora lokal na www.passion-and-skillz.com. Kumpra bo karchi ‘online’ riba wepsait di Passion & Skillz unda bo por paga ku bo tarheta di krédito.
Pa mas informashon, por siguí Remses Rafaela riba vários plataforma sosial manera Facebook.com/remses.rafaela i Instagram.com/muisjemuis of riba su wepsait www.passion-and-skillz.com.