PUNDA/OTROBANDA – No ku nada a sosodé for di e tempu aya, pero awor ta konta atrobe den terminologia marítimo ‘bela yen’ pa loke ta e preparashonnan pa e spektákulo di e bishita di tall ships i barkunan asosiá di 7 pa 12 di yüni 2022 den haf di Kòrsou.
Curaçao Sail Foundation (CSF), presidí pa señora Lucky Ezechiëls, i su tim di kolaborador ta tuma riba nan pa ripití e evento ku na 2018 tabata un éksito rotundo ku un ambiente masha spesial.
Te ainda ta hasi uso di superlativo ora wak bèk riba Velas Latinoamérica Curaçao 2018. Na ámbos banda di Bahia di Santa Ana e tall ships a mara, atrayendo bòshi

hende pa bini Punda i Otrobanda.
E barkunan bishitante i e fregatanan a indiká ku nan bishita na Kòrsou tabata un di e puntonan kulminante di e festividat ku nan tabata forma parti di dje. P’esei e tempu ei, promé ku nan a bandoná nos isla, a palabrá en prinsipio ku nan pa ripití e evento na 2022.
A keda den kontakto estrecho ku e barkunan tur e añanan aki i vários di nan a rekonfirmá ku otro aña nan lo ke partisipá atrobe.
Lamentablemente e barku Chileno Esmeralda no por ta presente, pasobra hustamente den e periodo ei nan ta sak’é for di sirkulashon pa un trabou grandi di mantenshon. Sinembargo, aparte di e partisipantenan di tres aña pasá, a aserká tambe otro barku pa mira si nan por ta presente den e periodo na yüni 2022 pa duna nan kontribushon na e festividat marítimo.
Den e fase aki ainda ta poko prematuro pa presentá un lista di barku partisipante.

Covid-19 lo ta un reto adishonal pa Organisashon di Velas

E Fundashon ku ta organisá Velas Latinoamerica a keda den kontakto estrecho tambe ku outoridatnan di haf, Marina Real, e patrosinadornan i e ehérsito di boluntario ku tin di yuda pa tur kos kana na òrdu.
Sin por mira hopi dilanti, mester presumí ku e tempu ei Covid-19 lo no a disparsé ainda, di moda ku esei lo bira un reto adishonal pa e organisadónan.
Ounke ku CSF komo fundashon su meta no ta pa hasi ganashi, tòg tin gastunan mará na organisashon di Velas Latinoamérica Curaçao 2022.
P’esei, den e tempu binidero e tim nukleo di CSF lo aserká e spònsernan di promé atrobe, pero tambe esnan potensial nobo, pa realisá finansiamentu di e fiesta popular aki.
Ademas, pa mas lat e aña aki a plania algun evento pa generá fondo pa e kousa spesífiko aki.

Na su debido tempu lo bini ku mas informashon di ese

i.