SHANGHÁI – Jiang Zemin (96) eks presidente di China ku a okupá e puesto entre 1993 pa 2003 a fayesé.
Tin informashon ku Jiang Zemin kende tabata lider di PCCh ( Partido Comunista di China) den dékadanan 80 a fayesé na su residensia na Shanghai.
Lokual ku por a komprondé ta ku Jaing Zemin te ku aña pasa tabata den bon estado di salu pero na komienso di e aña dòkternan a bin konstatá ku e tabatin Leukemia.
Jiang Zemin a nase na 1926 na Yangzhou i a keda nombra sekretario general di e partido PCCh na 1989.
E último aparishon públiko di Jiang Zemin tabata dia 1 di òktober di aña 2019 ku ta Dia Nashonal i selebrashon aniversario di proklamashon di Repúblika Nashonal di China.

QUITO – Ministerio di Agrikultura i Ganadería a deklará ayera ku tin un emergensia sanitario pa 90 dia despues debí ku a detektá un brote di influenza aviar den vários finka ku ta kria galiña di e pais.
Ta p’esei e Ministerio di Agrikultura i Ganadería durante siguiente 90 dianan no por mobilisá ningun produkto di orígen aviar manera webu, puitu, galiña i patu pa ningun otro finka pa evitá un brote.
E promé kaso di influenza aviar altamente kontagioso a keda detektá tres dia pasa na un finka na e provinsia ku yama Cotopaxi.
Tur e kriadero di galiñanan ku tin na Ecuador huntu tin 263 mion galiña i lokual a keda detektá ta solamente 180.000 galiña ku ta afektá ku e influenza aviar.
Ta p’esei Ministerio di Agrikultura i Ganadería lo tin ku bai sakrifiká e bestianan aki pa evitá un brote di influenza aviar na e finka nan na Ecuador.
E sektor aki na Ecuador ta generá anualmente $1.800 mion i a bin ta krea 300.000 kupo di trabou.
Segun e Ministerio di Agrikultura i Ganadería na Ecuador
entre yanüari pa novèmber e finka nan ku tin kriadero di galiña a produsí 495.000 tonelada di karni di galiña i 3.812 mion webu.

CARACAS – Nicolás Maduro presidente di Venezuela a sigurá ayera ku su pais tin entre $24.000 pa $ 30.000 mion blòkia den eksterior i ku esaki ta produkto di e sanshonnan ekonómiko Internashonal.
Durante Nicolas Maduro su rueda di prensa den Palacio de Miraflores a bisa ku ta trata aki di fondonan di estado venesolano ku ta kongelá, blòkia i sekuestrá.
E mandatario a bisa ku gobiernu tin un plan pa repatriá tur e plaka ku a keda inhustamente kongelá i blòkia pa Merka i paisnan den Union Europeo.
Ya kaba tin informashon ku Banco Central de Venezuela tin na su disponibilidat $3.000 mion ku lo keda repartí na asuntunan sosial pa e pueblo venesolano.
Tin hopi proyekto sosial ku tabata stanka i ku lo bai keda finansiá ku e fondonan aki segun presidente Maduro.
E fondonan aki tabata keda atministrá pa e organisashon di Nashonnan Uni.