CARACAS – Vladimir Padrino López minister enkargá ku e kartera di defensa na Venezuela a konfirmá ku pa òrdu di presidente di Nicolás Maduro ela keda enkargá pa bai establesé kontakto “di inmediato” ku su kolega Colombiano Iván Velásquez Gómez.
E motibu dikon Vladimir Padrino López lo tuma kontakto ku Iván Velásquez Gómez ta pa restablesé relashonnan militar entre ámbos nashon di un forma organisá.
Tin indikashon ku Nicolas Maduro a tuma kontakto kaba ku Gustavo Petro pa atendé vários tema importante i ku asina por kuminsá atendé ku nan situashon seguridat mas lihé ku ta posibel.

PORT AU PRINCE – Luis Almagro sekretario general di OEA (Organización de los Estados Americanos) ta konsiderá ku e situashon di violensia ku tin na Haiti mester keda atendé na serio.
Durante mas ku 20 aña komunidat Internashonal a trata na yuda Haiti pero no sufisiente.
Luis Almagro ta kalifiká e intervenshon aki komo frakasá di parti komunidat internashonal.
Gengnan ta mihó arma ku polis i militarnan i ta p’esei tin e pais kompletamente terorisá i ku outoridatnan no por hasi nada tampoko.
Luis Almagro a bisa ku si no hasi nada awor Haiti generashonnan di hóbennan ta bai kai den direkshon di kriminalidat i narkotráfiko.
E titular di OEA ta pensa ku lo por tin un solushon pa kuminsá resolvé problemanan ku tin na Haiti.
E puntonan ku Luis Almagro a keda presentá na presidente Interino Ariel Henry durante un reunion ayera na Palacio presidensial na Port au Prince.

CALIFORNIA- Keith Ballantyne bosero di kuerpo polisial na Santa Clara California a konfirmá ku ayera den oranan di trèmerdia un avioneta model Cessna di un solo motor a realisá un aterisahe di emergensia riba Buena Vista Avenue.
E piloto di e avioneta aki a trata na yega na Corona Municipal Airport pero no a logra alkansá su meta.
Keith Ballantyne a splika ku pa suerte e avioneta aki a aterisá pero a bai dal den un pickup marka Toyota ku tabata koriendo ne momentunan ei riba Buena Vista Avenue.
Pa suerte tantu e shofùr di e pickup komo e dos okupantenan di e avioneta ku a aterisá di emergensia a logra sali ileso di e aksidente aki.
Keith Ballantyne a finalisá indikando ku Buena Vista Avenue a keda sera ta ku 7’or di anochi ora a kaba di limpia e karetera kompletamente.