Connect with us

Lokal

Otro torpesa di Knops: Informá Senado di fondo di invershon pa nos empresarionan inverti na Ulanda!

Published

on

Raymond Knops

DEN HAAG. Den e siman ku Sekretario di Estado Raymond Knops a papia den Senado Ulandes, ela pinta un kuadro koló di rosa pe senadornan ounke nan a bora e supuesto medidanan di bonachon pa nos paisnan den Karibe i a sensuré severamente pe forma torpe ku e aktua i papia ku representantenan di nos pais.

Un dje kosnan ku ela konta e senadornan ta ku ne momentonan aki empresanan privá na Kòrsou, Aruba i Sint Maarten ta depende merkado finansiero lokal pa fia plaka i hasi invershonnan nesesario. (Pa gobiernunan tin otro mekanismo).
En prinsipio Invest-NL lo pone 40 mion euro disponibel pa kada un dje tres paisnan den Karibe i esaki ta un promesa pretu riba blanku ku Sekretario di Estado Knops a hasi den Senado ulandes siman pasá.
Loke e no a bisa aserka ta e prosedura i via kua instansia na Kòrsou empresanan privá den e tres paisnan tin ku akudi pa hasi un petishon.
I ku si nan hasi un petishon ta pa haña kapital pa inverti huntu ku un kompania ulandes na Ulanda. E oferta pues ta komparabel ku Knops ta ofresé empresanan den e tres paisnan un kas nobo pero sin porta ku yabi pa drenta.
Loke e mandatario ta dispuesto di hasi ta pa yuda nos paisnan pa hasi kontakto ku fondonan ku tin.
Pero i aki ta bin e gran ‘pero’…. Invest-NL ta dirigi eksklusivamente pa hasi invershon na Ulanda i ne munisipionan ulandes den Karibe tambe pero no tin e posibilidat pa hasi invershon na Kòrsou, Aruba i Sint Maarten…..!”
Ku otro palabra un kaska di webu weku-seku…..
E fondo por yuda finansia akuerdonan di ‘joint venture’ manera Invest International ku ta brinda bon posibilidat i Invest International por apoya i asisti empresanan ulandes pa inverti den merkadonan prometedor den estranheria. Venezuela por ehempel ku ta pais ku e aktual gobiernu ulandes tinmasha afinidat kune sí Ulanda ke tin kontakto kune.
E fondo por fasilitá kapital tambe pa empresanan kombiná den e paisnan den Karibe i aparentemente ya kaba tabatin kombersashon orientador riba e tema aki pero di kual ningun palabra no a yega Kòrsou.
Apesar ku den Senado Ulandes nan a bati kabes di Knops ku moekel pa su manera torpe di atende ku nos gobiernunan, e ta kere ku e tres paisnan den Reino por hasi kontakto via Ulanda pa haña fiansa barata na Europa.
Segun Knops esaki ta duna inisiativanan pa joint venture mas balor “….pasobra Ulanda ta sosio seif den e fondo i ta fosé un kanal pa hasi negoshi den nos paisnan.
BOU DI KONDISHON
E kuenta di Shon Arey lo no tabata kompleto si no tabatin un ‘pero’ konopá na dje i esei ta ku Knops
a splika ku tur kos ta dependé si gobernashon riba e islanan ta stabil i si de fakto pa inverti den nos paisnan, ki ta e perspektivanan pa inverti den nos paisnan i si e empresanan ta dispuesto di pasa den transishon pa garantisá durabilidat.
Riba esei su gabinete ta papiando ku e fondo ounke ku a promé biaha ku nos ta tende dje posibilidat aki.
Otro ‘pero’ grandi ta ku segun Knops, Kòrsou, Aruba i Sin Maarten tambe mester krea espasio den nan presupuesto pa pone plaka disponibel pa invershon.
Esnan ku promé ta responsabel pa e programa kana te paisnan ku tin ku pone òrdu riba nan situashon finansiero
pa dje forma aki haña invershon tambe den infrastruktura di gobiernu.
Su teoria ta ku si nos gobiernunan ekonomisá den e sektornan kaminda por liberá fondonan pa invershon nobo.
I Knops su teoria ta ku si Ulanda por a hasi e sakrifisio, anto Kòrsou, Aruba i Sint Maarten tambe tin ku hasi esei.

 

Continue Reading

Lokal

Wowo di mundu ta dirigí riba Karnaval di Kòrsou

Published

on

By

WILLEMSTAD – Tin hopi interes di bishitantenan di eksterior pa karnaval di Kòrsou.Tin hopi turista ta riba nos isla i representantenan turistiko i tambe prensa internashonal ta na kantidat grandi pa kubri nos karnaval. Muryad de Bruin, direktor di Ofisina di Turismo a bisa ku CTB ta hopi kontentu pa tin karnaval bèk den su gloria kompleto manera e tabata semper. Prinsipalmente for di den region, entre otro Surnam, tin hopi turista na Kòrsou pa gosa di karnaval.
Pa motibu di Covid-19, ultimo dos aña, no por a organisa karnaval na di Kòrsou,. fisina di Turismo a prepara hopi bon pa e regreso di e fiesta grandi aki. Henter e siman aki, media internashonal ta di bishita na Kòrsou pa kubri e paradanan di karnaval, prinsipalmente esun grandi ku tuma luga mañan. Di e manera aki i ta mustra mundu tambe kon bunita nos karnaval ta.
De Bruin a bisa ku di tur e merkadonan di Korsou, tin representante turistiko e siman akin a Korsou. Ta trata di entre otro Hulanda, Colombia, Ecuador, Surnam, Merka i Republika Dominikana, ‘Nan ta kubri nos karnaval i dun’e e atenshon den publisidat internashonalmente’.
Henter e siman aki personal di e departamentu di produkto di CTB i ‘destination services’ ta riba kaya, pa host huntu ku ‘influencersnan’, i medionan di komunikashon. CTB ta guia i perkura pa e miho parti di Korsou ta bisto riba nan publikashonnan.

KONSIENTISA
Tambe komo ofisina di Turismo ta dedika atenshon na konsientisashon lokal. E direktor di CTB a a menshona ku durante di temporada di karnaval, ta konsientisa pa tene nos isla limpi. Esaki ta ta un kampaña ku ta tuma luga hopi luna kaba. E konsientisashon ta ku mester tene Kòrsou dushi i limpi. Den temporada di Karnaval, Ofisina di Turismo ta keda pone atenshon riba e asuntu aki, pa logra ku nos komo País, ta un país limpi pa nos mes pero tambe pa e bishitantenan.
CHATA tambe ta hopi kontentu ku karnaval ta bek, pasobra esaki ta hopi positivo pa e okupashon di e hotelnan i otro negoshinan ku ta relata na turismo.
Hans Slier, presidente di CHATA a bisa ku e okupashon dje hotelnan den e temporada aki ta hopi bon. Ademas, asina Slier ta bisa, eventonan manera karnaval ta no solamente ta hopi bon pa turismo pero tambe pa Kòrsou mes. Karnaval i otro festivalnan manera Jazz i Blues Fesitval, ta pone Korsou riba mapa internashonal loke ta hopi bon.

Continue Reading

Lokal

Análisis di krímennan di impakto haltu

Published

on

By

WILLEMSTAD – Den e periodo di 23 yanüari 2023 pa 30 yanüari 2023, polis a registrá i a analisá e siguiente aktividatnan kriminal.

Atrako
Kantidat: 5
Orario: entre 02.51’or. – 06.51’or. / 11.26’or. – 23.13’or. Sitio: Jan Noorduynweg, Dein, Pietermaai, Kanga, Mahuma.

Ladronisia di
vehíkulo
Kantidat: 4
Orario: entre 23.00’or. – 05.00’or.
Sitio: Marie Pampoen (2x), Pietermaai, Otrobanda.

Kiebro den kas
Kantidat: 8
Orario: entre 11.00’or. – 15.00’or.
Sitio: Pannekoek, Hoendenberg, Mahuma (2x), Rooi Catootje, Koraal Partier, Suffisantdorp, Julianadorp.
Partikularidat: Dor di kibra porta dilanti (mayoria).

Kiebro den negoshi
Kantidat: 3
Orario: entre di 00.00’or. – 05.00’or.
Sitio: Fokkerweg, Caracasbaaiweg, Souax West. Partikularidat: Dor di kibra dak i kandal (mayoria).
Kiebro den /na outo
Kantidat: 11
Orario: alrededor di 11.00’or. – 14.00’or / 23.00’or. – 05.00’or
Sitio: Caracasbaai, Noordkust, Otrobanda, Sabana bij Wespunt (3x), St. Wilibrordus, Habaai, Vredenberg Bij Kenchan(2x), Wespunt.
Partikularidat: Dor di kibra glas patras i bai ku piesa di outo(mayoria).

Violensia relashonal
Kantidat: 15

Orario: entre 00.00’or. – 03.00’or
Sitio: Otrobanda, Sucasa, Bonam, Oude Water, Marie Pampoen, Koraal Specht, Buena Vista, Monchi, Vredeberg bij Sta. Maria, Punda, Sta. Cruz, Jonisberg, West Groot St. Joris, Zuid Abrahamsz, Noord Zapateer.

Continue Reading

Lokal

JCI Dutch Caribbean a elegí i instalá su direktiva nobo

Published

on

By

WILLEMSTAD – JCI Dutch Caribbean lo kier informa ku a elegí i instalá su direktiva nobo pa e aña 2023. Sigun e presidente nobo di JCI Dutch Caribbean durante di e aña 2023 e organisashon lo proveé oportunidatnan pa desaroyo di liderzgo i empodera miembronan pa krea impaktonan positive den nos komunidat. Pues, pa e motibu aki e lema prinsipal di 2023 ta ‘Step Up’.

Junior Chamber International (JCI) su filosofia di ‘one year to lead’ tin e enfoke pa duna hendenan entre 18 pa 40 aña oportunidat di haña eksperensia den posishonnan di liderazgo.
JCI Dutch Caribbean su direktiva pa aña 2023 ta konsistí di e di 62 Presidente Shakira Sedney – Albertoe, ku asistensha di Sekretaria Jacqueline Candelaria, Tesorero Alasha Tejeda, Vise Presidente Ehekutivo Aldimir Vrutaal, Vise Presidente Sulmahine Penza – Kwidama, Vise Presidente Richards Martina, Asesor Legal General Vanessa Overman i Presidente Saliente Sulin S.F. Passial.
JCI ta un organisashon global di lidernan entre 18 pa 40 aña ku ta transformá hóbennan pashoná den lidernan kapabel pa medio di training, proyektonan, eventonan i programanan. JCI Dutch Caribbean ta konsistí di 5 organisashon lokal. Na Kòrsou, JCI Creative Leaders in Curaçao (CLIC), JCI Involvement Of Banda Ariba Curaçao (IOBA Curaçao) i JCI Willemstad. Na Aruba: JCI Young Active Leaders Aruba (YALA). Na Sint Maarten: JCI SXM A.C.T.I.O.N (Aspiring Change To Impact Our Nation).
Si bo ta interesá di desaroyá bo abilidatnan di liderazgo miéntras bo ta krea impaktonan positivo den bo komunidat, tuma kontakto ku JCI Dutch Caribbean libramente na dutchcaribbean@jci.cc.
Pa mas informashon di JCI general bishita www.juniorchamber.international.
Sigui nos riba Facebook, Instagram, LinkedIn @jcidutchcaribbean pa e último informashonnan di JCI Dutch Caribbean su aktividatnan.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

I'm already a member, take me to login