Pa promé biaha un Sínodo desentralisá: “unidat den pluralidat”

Ku un selebrashon litúrgiko riba djadumingu 17 di òktober den Katedral di Pietermaai, Obispu a inisiá e proseso sinodal di Iglesia Katóliko pa nos obispado. Ku partisipashon di tur klero a inisiá e Sínodo den forma di orashon riba tur seis isla pareu, un Sínodo ku lo dura te 2023, ora tur obispu di mundu bini huntu na Vatikano den e Sínodo di Obispunan.

Na aña 2015 Papa Francisco a konvoká e Sínodo akí ku e biaha akí lo ta diferente for di tur Sínodo anterior. Nos konosé Sínodo komo un reunion di konsulta. E biaha akí e diferensia grandi ta ku ta trata di un konsulta di henter Pueblo di Dios. Entretantu den tur obispado na mundu a organisá pa e proseso di konsulta akí den tur Iglesia partikular di e sinku kontinentenan, siguiendo un itenerario di tres aña, ku lo artikulá den tres fase: Skucha, Diserní i Konsultá. Durante e itenirario di tres aña nos fielnan lo ta – manera Papa Francisco ta ekspresá – “riba kaminda di e sinodalidat” durante kual “nos tur ta skuchando otro; i tur skuchando e bos di Spiritu Santu p’asina nos diserní e kaminda ku Dios ke prepará nos Iglesia pa e di tres milenio”.

Den e siman akí tur klero di Obispado di Willemstad lo ta den un konferensia riba e tópiko di Sinodalidat ku lo tin e tema “Pa un Iglesia sinodal: komunion, partisipashon i mishon”. Tur seis isla di nos Obispado lo konektá den komunion virtual pa asina entre kleronan inisiá e proseso di skucha, diserní i konsultá. Den e lunanan di novèmber i desèmber próksimo, lo promové, organisá i ehekutá e konsulta diosesano riba tur seis isla i tur kreyente por kontribuí. Nos tur lo skucha otro pa nos por diserní kon Iglesia ta biba su mishon den mundu. E kompilashon di nos konsulta diosesano lo kontribuí na e proseso siguiente di sinodalidat den Karibe: Di Sínodo di Obispunan pa Sínodo di Iglesia.