Connect with us

Sosial

Nautilus Restaurant ku Breakfast òf Brunch Box pa tur okashon!

Published

on

WILLEMSTAD – Hopi ta esnan ku a yega di risibí un Breakfast òf Brunch Box di Nautilus Restaurant. Kisas nan mes a pidi esaki òf nan a risibié komo regalo. Kada un ta keda elaborá ku dedikashon. E ya popular Breakfast Box di Nautilus Restaurant, ta bin ku un surtido di pan, croissants, muffin, fruta, granola, cornflakes, yogurt, un surtido di belèg ku keshi, salada i mas. Pa loke ta e Brunch Box por spera ‘steamed vegetables’, salmou, diferente karni, batata, aros, salada i mas. Tur dia tin un diferente menú; ta ideal pa yama adelantá pa informá i reservá mesora. Kantidat ta limitá. Keda pendiente pa un ‘Dia di Mama’ Brunch Box!

Pa kada okashon tin un ‘box’, kisas bo ke sorpresá un persona riba su aña òf aniversario. Kisas un persona tin kebrante di salú i bo ke lanta su ánimo. Elizabeth di Renaissance Curaçao Resort & Casino ta un di esnan ku ta hasi ‘delivery’, “Mi ta sintimi hopi kontentu ora mi entregá e Breakfast òf Brunch Box, klientenan ta habri porta hopi entusiasmá. Tur hende ta hasi nan máksimo esfuerso pa keda kontentu bou di e sirkunstan-sia(nan).” Klientenan ta gosa masha ku Renaissance Curaçao Resort & Casino ta mantené protokòl di higiena estrikto ora di hasi entrega.

Risibí un Breakfast òf Brunch Box di Renaissance Curaçao Resort & Casino ta muchu mas ku risibí ‘kuminda’ den un kaha. E ta pèrkurá pa famia òf pareha ta huntu, na unda ta biba momentunan bunita no opstante e situashon aktual. Keda na kas ta un desafio grandi pa hopi di nos, why not, hasié alegre? Por bestèl un Breakfast òf Brunch Box tur dia, di djaluna pa djadumingu entre 8’or i 11’or di mainta pa breakfast i entre 12’or di mèrdia i 3’or di atardi pa brunch. E Breakfast Box ta 45 florin pa persona i e Brunch Box 65 florin pa persona. Ámbos preis menshoná ta inkluí OB. E ‘delivery’ ta grátis na un pedido di 2 òf mas. *Pa algun área lo por tin un rekargo pa entrega *Tene kuenta ku e tempu di entrega ta aproksimadamente 45 minüt. Pidi pa e Nautilus Reward Card; esnan ku tin nan Nautilus Reward Card ta risibí diferente rekompensa.

Pidi pa e Nautilus Reward Card
E Nautilus Reward Card ta un karchi di rekompensa ku ta duna e kliente diferente benefisio, e.o na akumulashon i stèmpel di 2 ‘delivery’ e kliente ta risibí 2 ‘pastry’ i 2 kòfi grátis, na akumulashon di 6 ‘delivery’ e ta risibí un Beach Pass pa 2 persona grátis i asina lo tin diferente otro rekompensa mas ora ku akumulá e stèmpel(nan).

Den e próksimo dianan Renaissance Curaçao Resort & Casino i Nautilus Restaurant lo tin un promoshon di Brunch Box spesialmente dediká na Dia di Mama. Tur ku ta deseá di partisipá, ta wòrdu rekomendá pa keda pendiente di e página di facebook facebook.com/NautilusRestaurant Pa reservashon por email [email protected] , yama 435.5034 òf WhatsApp 530.5063.

Continue Reading

Lokal

Kompetensia di skolnan ‘E skol di futuro’

Published

on

By

Willemstad – CORE N.V. ta kumpli su di 25 aniversario na luna di mart di 2022. Komo muestra di gratitut i kompromiso pa ku komunidat, CORE N.V. ta organisá un kompetensia pa Skolnan di Fundeshi. E kompetensia aki ta pa stimulá i inspirá alumnonan pa pensa riba e impakto ku teknologia tin riba futuro di enseñansa mirá for di nan perspektiva. E skolnan ku partisipá tin chèns pa gana 5000, 3000 i 2000 florin.

CORE N.V. ta brinda solushonnan di Teknologia di Informashon (IT) i “Cloud” na kompanianan den sektor públiko i sektor privá. CORE N.V. su mishon ta:

“To be the reliable IT and Cloud solutions provider, adding value to the business operations, through our professional and committed staff and secure infrastructure.”

Último añanan, teknologia a krese drástikamente i desaroyonan riba e área aki tin impakto riba kompanianan i nos komunidat. Esaki lo bai trese kambionan grandi riba nos manera di traha i hasi sierto kosnan. Nos sistema di enseñansa tambe lo bai eksperensiá esaki.

Den e kuadro aki CORE N.V. ke envolví skolnan, en partikular Skolnan di Fundeshi, na e selebrashon di su 25 aña di aniversario ku tin komo tema prinsipal “Empowering Tomorrow”.

Gustosamente CORE N.V. ta invitá tur skol di Fundeshi pa partisipá na e kompetensia di skol akí, ku tin komo meta pa duna alumnonan di Grupo 7 un bos i espasio pa kompartí nan vishon kon por integrá teknologia den nan ambiente di edukashon na un forma kreativo. Pa e kompetensia aki e alumnonan mester visualisá futuro di e tendensianan, asina yamá “trends”, di teknologia i presentá esaki pa medio di un modelo físiko (makèt, obra di arte, pintura) òf un modelo digital ku ta mustra kon nan skol di futuro lo ta i tur e posibilidatnan ku nan ta mira. E skolnan ku klasifiká pa e final lo mester presentá nan konsepto na un hurado ku lo skohe e 3 ganadónan final ku lo bai ku e gran premionan kas.

Skolnan ku ta deseá pa partisipá por registrá te ku 16 di desèmber próksimo via di [email protected] . E último fecha pa entregá e presentashon di kada skol ta 27 di yanüari di 2023. Pa 30 di yanüari lo anunsiá e finalistanan ku lo partisipá na e final di e kompetensia dia 2 di febrüari di 2023.

Continue Reading

Sosial

Rapper Jon Tarifa ta kolaborá ku kantante Darren Gardner den ‘When I was Younger’

Published

on

By

Rapper Jon Tarifa

WILLEMSTAD – Ku e kansion, ‘When I Was Younger,’ rapper Jon Tarifa, huntu ku kantante i eskritor Darren Gardner, ta ilustrá kon fasinante e mente di un mucha ta, unda nada ta strob’e pa perseverá i eksplora mundu.
E impulso pa eksplora teritorio deskonosí a hiba Darren, ku originalmente ta di Port Elizabeth, Suráfrika, te na Hulanda, unda na 2016 ela muda pa forma su bida ku su pareha Elsa. Na Hulanda ela haña e oportunidat di sigui desaroyá su talento musikal, unda ela traha ku diferente artista di tanda manera DJ Martin Garrix i ganadó di e premio Grammy Chris Henderson. Tambe Darren a skibí i areglá komposishonnan musikal pa, entre otro, Berget Lewis, i ZO Gospel Choir. Darren ta konsiderá e talentoso kantante i areglista kurasoleño, Stanley Clementina, komo su mentor, kende a introdusí’e na e industria musikal hulandes. Di e manera aki, Darren a keda eksponé na e diferente influensia musikal krioyo i a desaroyá un konekshon bunita ku nos islanan.
Ken ta Darren Gardner?
Darren Gardner a studia músika klásiko na Universidat di Pretoria na Suráfrika, unda ela spesialisá den Vokalisashon Klásiko i Ingeniera di Sonido, pero su amor pa músika ta bin di kas. Darren a lanta den un famia ku a eksponé na artistanan manera, the Beatles, Nat King Cole, Dionne Warwick, Mariah Carey, Lauryn Hill, i asta kompositornan klásiko manera Mozart i Beethoven. Konsekuentemente, Darren su músika ta saturá pa influensianan di pop, R&B i jazz. Komo estudiante, Darren a diskubrí su pashon pa arte ora ela forma parti di vários koro di skol i a presentá riba diferente tarima. Despues di a forma parti di algun banda, Darren a opta pa kontinuá komo solista i kontinuá traha riba su karera komo kantante i eskritor. Na 2020, Darren a partisipá na Holland Got Talent i duna un presentashon impreshonante ku ‘I Wish’ di Stevie Wonder, unda ela kanta i utilisá un diferente instrumento huntu ku un mashin di drùm pa konstruí e ritmo di e kantika.
Kolaborashon ku Jon Tarifa
Ku e proyekto aki, Darren a kolaborá ku e talentoso rapper albanes, Jon Tarifa, ku tambe ta basá na Hulanda, ken a pone su toke úniko riba e bunita konsepto musikal. E videoclip di ‘When I Was Younger’ a keda dirigí pa ItsmeKenny na Hulanda i Jon Tarifa a editá e produkto final. Darren a traha e konsepto i melodia di ‘When I Was Younger’ i a pone e base pa e areglo, pa despues laga produktor Wesley Nuis finalisá e kantika.
Jon Tarifa no ta un artista deskonosí pa nos aki na Kòrsou, despues ku ela skor un hit na 2011 ku su debut titulá “So Right’. Tambe ela keda invitá e aña ei pa presentá na Curaçao North Sea Jazz Festival ku kantante Levi Silvanie. Aktualmente, Jon ta biba na Bali, Indonesia, I e ta den e etapanan final di finalisá su album nobo, ku ta karga ku yen vibrashon isleño.
Plannan pa futuro
Aktualmente Darren ta trahando riba un EP ku e ta spera di lansa na 2023, pero ya ela duna nos un ñapa ku ‘When I Was Younger’. “Tempu nos tabata yòn, nos tur a soña i a aspirá pa un dia bira algu grandi,” Darren ta splika. E kantika ta papia netamente di e nostalgia ei i kon e mucha di paden ta biba den nos tur. Aktualmente Darren ta trahando riba su siguiente piesa ku guitarista i produktor Wesley Nuis, i ta spera di publiká esaki na kuminsamentu di 2023.
Bo por sigui Darren Gardner su músika via di su Instagram @darrengardnermusic pa keda na altura di su presentashonnan. Tambe por wak e clip di ‘When I Was Younger’ riba e página di You Tube di Jon Tarifa na https://youtu.be/rQt4qAr5LyA

Continue Reading

Sosial

“I’m Moving On” kansion di aña Premio Edgar Supriano 2022

Published

on

By

Axel Pikero

WILLEMSTAD – Ayera nochi tabata un dia grandi pa musikonan i Asosiashon di Músiko i Artista di Kòrsou. Na ‘The Stage’ den Sambil a tuma lugá entrega di “Premio Edgar Supriano 2022’, alabes AMAK a probecha presentá su logo nobo.
Ta asina ku durante algun dia, tur esnan ku tin relashon ku farándula di Kòrsou tabata tin e oportunidat pa postulá nan kandidatonan pa e 12 kategorianan di Premio Edgar Supriano 2022, mas 5 premiashon ku motivashon.
Despues ku e periodo pa vota a sera, un komishon independiente a repasá esakinan i a presentá e diferente nominadonan ku ta bini na remarke pa gana e tan kudisiá: Premio Edgar Supriano.
E nominadonan ta:
1. Artista Nobo di aña 2022
· Kirsten Mare
· B’Jay
· Ross
· Ganadó: B’Jay

2. Grupo Rítmiko di aña 2022
· Den chikí
· Grik
· Orirí
· Grupo Kompèr
· Ganadó: G.R.I.K.

3. Grupo di Tambú di aña 2022
· Limania
· Ruta
· Zojojo
· Ganadó: Grupo Ruta

4. Kansion Urbano di aña 2022
· Sekreto ( Nello)
· Balaclava ( B’Jay)
· Enemies ( Nello)
· Ganadó: Sekreto
5. Artista Urbano di aña 2022
· Nello
· B’Jay
· Lady Lava
· Ganadó: Nello

6. Entertaiment Band di aña 2022
· 501
· Dolce Band
· Highway Band
· Relax Band
· Ganadó: Dolce Band

7. Kantante di Kòmbèk di aña 2022
· Shurman Aniseta
· Ponche Martes
· Kenneth Hooi
· Ganadó: Kenneth Hooi

8. Agrupashon Musikal di Kòmbèk di aña 2022
· Classic XD
· Zudup Hopi Forsa
· Sabor Original
· Ganadó: Zudup Hopi Forsa

9. Kansion di Kòmbèk di aña 2022
· I’m moving on
· Orea pa’bo so
· Focus pa dilanti
· Ganadó: I’m moving on

10. Banda Ritmo Kombiná di aña 2022
· Icons
· ERA
· GIO
· One Flavaz
· Ganadó: One Flavaz

11. Kantante General di aña 2022
· Hunneley Felicia
· Gilbert “Dibo” Doran
· Djuric Virginie
· Ñaño Rosario
· Ganadó: Djuric Virginie

12. Kansion General di aña 2022
· For Real ( Hunneley Felicia)
· I’m moving on ( Djuric Virginie)
· Orea pa bo so ( Ñaño Rosario)
· Ganadó: I’m moving on (kantante Djuric Virginie, areglo i komposishon di Axel Pikero).

Banda di e 12 kategorianan di Premio Edgar Supriano pa esnan ku a destaká nan respektivo kategoria, AMAK e aña aki tambe ta presentá ku 5 premio èkstra ku ta kai bou di e kategoria di: Premiashon ku motivashon.
E premionan aki ta:
· Kantante Tambú Popular di aña 2022 a bai pa Tula
· Kantante Tambú Kultural di aña 2022 a bai pa Sherwin ‘Pincho’ Anita
· Kompositor General di aña 2022 pa Gilbert ‘Gibi’ Doran
· Premio Logro Eksepshonal pa Gibi Doran pa aktiva bèk e dos agrupashonnan musical, Gio Legends I Doble R Puru.
· Premio Prestigio pa Dibo Doran i Randal Corsen

Un pabien na tur esnan ku a keda nominá I speshalmente esnan ganadó Premio Edgar Supriano den nan kategorianan.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login