DEN HAAG – Minister Plenipotenciario Guillfred Besaril a presencia e apertura di e Aruba College Fair diabierna 2 di November ultimo na Renaissance Convention Center. Aki e mandatario a wordo ricibi pa Presidente di ACFF, Muzanin Wever pa despues esaki guia e mandatario na e standnan di e diferente institutonan di enseñansa di Hulanda, Merca y Aruba. Aki sr. Besaril a papia cu e representantenan di e Hogeschoolnan, manera Fontys Hogeschool, Saxion Hogeschool, Hogeschool van Arnhem en Nijmegen y Hogeschool van Amsterdam. Sr. Besaril a mustra su aprecio pa presencia di e Hogeschoolnan cu di e manera aki nos studiantenan por haya informacion di e diferente estudionan cu e Hogeschoolnan aki ta brinda. E mainta ey tambe tabatin un presentacion di Arubahuis bou e titulo: “ Studeren in Nederland”. N’e ocasion aki Minister Besaril a tene un discurso cortico pe sala yen di alumno cu ta pensa di bay studia na Hulanda. Aki e mandatario un biaha mas a ripiti cu Arubahuis pa basta luna caba a tuma e iniciativa pa informa e studiantenan prome cu nan bin Hulanda pa studia.