Connect with us

Katoliko

Mensahe di Papa Francisco na wela i tawelanan

Published

on

Papa Francisco ta invitá nos selebrá un djadumingu spesial dediká na tur wela i tawela, djadumingu 25 di yüli próksimo.
E mensahe tin komo título: “Mi ta ku boso tur dia” tuma for di Evangelio di San Mateo, ora Hesus a tuma despedida di su apòstelnan i el a subi na shelu (cf. Mt 28,20).
Papa Francisco ta konsiente ku su mensahe ta yega den un momentu difísil: e pandemia di e Corona vírus ku a pone na prueba “nos ku ta di edat avansá”. Hopi a bira malu, hopi sernan kerí a laga nos. Hopi di nos ansiano a sufri soledat durante e pandemia aki.
Señor konosé tur nos sufrimentu durante e temporada aki. Den tradishon ku no ta skirbi den Evangelio, pero ku el keda transmití pa apòstel Hakobo i ku e pintor Giotto a representá den un di su pinturanan estilo fresko, ta konta kon Hoakin kasa di Ana, tawela di Hesus, mester keda leu di siudat den soledat, pa motibu ku e no tabatin yu. Den e situashon tristu ei, un angel di Señor a aparesé na Hoakin i anunsi’é ku Señor a skucha su orashon i ku Ana su kasá lo trese un yu na mundu. Nos tambe por rekonosé presensia di su angelnan pa konsolá nos den nos soledat i bisa nos: “Mi ta ku bo tur dia”. Esaki ta e sentido di e dia aki ku nos ke selebrá pa di promé biaha e aña akí.
Mare kada wela – tawela por risibí e bishita di un angel! Tin biaha e por ta e presensia di un ñetu, di un miembro di famia, un amigu. Nos a sinti falta di un saludo i abraso den e tempu di pandemia aki.

Papa Francisco ta konta su eksperensia di bida ora e tabata pa drenta edat di bai ku penshun, el a haña e yamada pa bira Papa. E mandato di Señor di bai anunsiá tur hende e bon notisia di Evangelio, e ta bai dirigí na nos tambe pa nos komprondé mihó ku nos vokashon ta di protehá e raisnan, transmití e fe na hóbennan i di kuida e chikitunan. No lubidá!
Bo por puntra: kon mi por anunsiá e Evangelio awor ku mi edat a subi i mi energianan ta limitá? Kon mi por dediká mi mes na otro, na e pobernan, awor ku tin tantu nesesidat den mi famia? Kon mi por abri mi bista na otronan si ni sikiera mi por sali di mi kas? Ya e soledat ya no ta un karga hopi pisá kaba?
Hesus mes ta duna e kontesta na tur e preguntanan aki ora e ta kombersá ku Nikodemo ku a puntr’é: “Kon un hende por bolbe nasé ora e ta hende grandi kaba?” (Hn 3,4), esaki ta sosedé ora bo habri bo kurason na e obra di Spiritu Santu ku ta supla kaminda e ke. Spiritu Santu ta move tur kaminda i ta hasi loke e ke.

Papa Francisco ta bolbe afirmá ku for di e pandemia aki mundu lo no sali igual manera ántes, nos lo sali mihó mare nos no lubidá e loke nos a siña den e tempu aki. Mara nos no lubidá e ansianonan di falta di resistensia. Mara e doló grandi akí no sea inútil. Nos mester yuda otro pa un humanidat nobo nasé. Niun hende no por salba su so. Nos tur ta un ruman.

Papa Francisco ta sugerí pa nos konstruí e mundu di mañan riba tres pilar: e soñonan, e memoria i e orashon. Rekòrdando profeta Yoël e ta bisa “ boso hòmbernan di edat lo haña soño i boso hóbennan lo haña vishonnan”. (Yo 2:28). E futuro di mundu ta keda fundá riba aliansa entre hóbennan i ansianonan. Ta nesesario pa kultivá e soñonan di nos grandinan i pa e hóbennan realisá e vishonnan aki pa konstruí un futuro. E soñonan ta mara na memoria i ta importante ku e rekuerdo doloroso di guera por siña e generashonnan nobo riba e balornan di pas. T’abo ta esun ku por transmití e balor aki despues ku bo a pasa e doló di guera. Si bo a iluminá maske ta un konsenshi so, riba e rekuerdo di pasado, e esfuerso akí tin su balor: e memoria ta krea bida. Laga nos kòrda e historia di nos wela i tawelanan di “Papa Francisco” ku a imigrá i nan a haña sa kon duru ta pa nan bandoná nan patria i buska un futuro mihó. E memoria por yuda konstruí un mundu mas humano. Sin memoria no por konstruí ni presente ni futuro.

Finalmente orashon di nos ansianonan por protehá mundu i ta yuda na un manera spesial den e momentu difísil aki pa intersedé pa mundu i iglesia. E orashonnan di nos wela i tawelanan lo ta un refugio sigur den e tempestat aki.

Kerido wela i tawelanan “Papa Francisco” ke señalá e Beato Carlos de Foucauld ku pronto lo bira santu. El a biba un bida di soledat den un pais Islámiko pero e su deseo tabata di sinti kualke ser humano komo ruman. Laga nos pidi Señor pa habri nos kurason i hasi nos mas sensibel na e sufrimentunan di e mas chikitu i inosentenan i kapas di intersedé pa nan.

Laga kada un di nos ripití na nos hóbennan e palabra di konsuelo ku nos a skucha awe “Ami ta ku Boso tur dia te na fin di mundu”.
Señor bendishoná boso…. Amèn (Papa Francisco).

Continue Reading

Katoliko

Papa Francisco: Futuro saserdotenan mester ser evaluá integralmente

Published

on

By

Papa Francisco a bisa djabièrnè ku ora un persona ta konsiderá e vokashon saserdotal, ta nesesario evalu’é integralmente pa por tin saserdotenan ku ta kapas pa komuniká e bondat di Dios.
Asina e Tata Santu a indiká dn e Palasio Apostóliko di Vatikano, den e oudiensia konsedé na e formadornan di e Seminario Arzobispado de Milán (Italia), na okashon di e di 150 aniversario di e revista “La Scuola Cattolica” (E Skol Katóliko).
“Ora ta diserní si un persona por inisiá òf konsiderá un rekorido vokashonal, ta nesesario investig’é i evalu’é di moda integral”, Papa Francisco a splika den su diskurso djabièrnè 17 di yüni.
Den e sentido akí, el a kontinuá, “mester tene kuenta ku nan moda di biba afektonan, relashonnan, espasionan, ròlnan, responsabilidatnan, asina manera debilidatnan, temornan i desekilibrionan”.
“Henter e trayekto mester aktivá prosesonan ku ta buska na forma saserdotenan i esnan konsagrá madurá, ekspertonan den humanidat i serkania, i no funshonarionan di lo santu”, Papa Francisco a enfatisá.
Pa esaki, e Tata Santu a resaltá, “superiornan i formadornan di e seminario, esnan ku ta kompañá nan i e personanan den formashon ta yamá na krese diariamente na e plenitut di Kristu p’asina ku, atraves di e testimonio di kada un, e karidat di Kristu ta manifestá su mes mas klaramente”.
Papa Francisco tambe a bisa e formadornan ku “e seminaristanan i hóbennan den formashon mester por siña mas di boso bida ku di boso palabranan, nan mester por siña e bondat di boso obedensia, e trabou di boso dedikashon, e generosidat ku esnan pober di boso sobriedat i disponibilidat, paternidat di boso afekto kasto i no posesivo”.
“Nos ta konsagrá pa sirbi e Pueblo di Dios, pa atendé ku e heridanan di tur hende, kuminsando ku esnan mas pober”, Papa a enfatisá.
Mundu, Papa Francisco a kontinuá, “mester di saserdotenan kapas pa komuniká e bondat di Señor na esun ku ta eksperimentá piká i frakaso, saserdotenan eksperto den humanidat, pastornan dispuesto na kompartí alegria i sufrimentu di e rumannan, hòmbernan ku sa na skucha e gritu di esnan ku ta sufri”.
Renobashon i kuido di vokashonnan
E Tata Santu tambe a dediká un momento di su reflekshon na renobashon di vokashonnan saserdotal.
“Renobashon i futuro di vokashonnan ta posibel únikamente si tin saserdotenan, diákononan, esnan konsagrá i laikonan bon formá”, Papa Francisco a enfatisá.
“Kada vokashon partikular ta nase, krese i ta desaroyá su mes den kurason di Iglesia, i esnan ‘yamá’ no ta manera padestul ku ta aparesé diripiente. E mannan di Señor, ku ta duna forma na e ‘barinan di klei’, ta operá atraves di e kuido ku pasenshi di formadornan i kompañantenan.
Na nan, Papa Francisco a sigurá, “ta konfia e servisio delikado, eksperto i kompetente pa kuida e nasementu, e kompañamentu i disernimentu di vokashonnan, den un proseso ku ta rekerí hopi bondat i konfiansa”.
Servisio di teologia
E Tata Santu tambe a papia di e importansia di teologia i di e nesesidat pa por tin personanan kapas pa splika esaki na e mundu di awe.
E komunidat “mester di trabou di esnan ku ta buska na interpretá fe, tradusié i bolbe tradusié, pa hasié komprensibel, pa eksponé ku palabranan nobo: un trabou ku lo mester bolbe hasié di nobo ku kada generashon”.
Ta pesei, “Iglesia ta enkurashá i ta sostené e esfuerso aki, e difikultat pa bolbe definí kontenido di e fe den kada époka, den e dinamismo di e tradishon”.
Den e sentido akí, Papa Francisco a kontinuá, “e lenguahe teológiko semper mester ta bibu, dinámiko, e no por hasi otro ku evolushoná i preokupá su mes pa hasi su mes komprendibel”.
Papa ademas a mustra riba e papel iluminador di teologia den e mundu aktual kaminda a pèrdè sentido di kosnan.
“Un di e problemanan mas grandi di nos tempu ta en efekto e pèrdida di sentido. Teologia, awe mas ku nunka, tin e gran responsabilidat pa stimulá i orientá e búskeda, pa iluminá e kaminda”.

Continue Reading

Katoliko

Historia di dia di Tata

Published

on

By

Irónikamente, kreashon di dia di Tata, finalmente, a keda inspirá de un predikashi riba dia di mama. Na 1909, Sonora Smart Dodd de Spokane, Washington, a skucha un predikashi i a duna kuenta di ku su tata a meresé homenahe similar. E tabata Henry Jackson Smart, kunukero i veterano di guera sivil, kende a kria Sonora i su sinku yunan chikí despues di ku su esposa lo a muri dor di komplikashonnan durante nasementu di su di seis yu.
Sonora tabata ke un dia spesial pa su tata lo a sa kantu e tabata apresiá su amor i apnegashon, asina manera e sakrifisionan ku el a realisá komo tata soltero. Dia 19 di yüni 1910, riba dia di kumpleaño di Henry, Sonora a festehá e dia di Tata pa di promé bia na Spokane. Na 1924, Presidente Calvin Coolidge a apoyá públikamente e dia Nashonal di Tata. Finalmente, na 1966, Presidente Lyndon Johnson a firma un resolushon pa kombertí Dia di Tata den dia festivo nashonal. Seis aña mas lat, presidente Richard Nixon ta kombertié den lei permanente pa festehá dia di Tata riba e di tres djadumingu di yüni.
Sin embargo, e selebrashon akí ta varia di fecha den diferente pais di mundu. Algun ta konservá e di tres djadumingu di yüni, manera ta mayoria di e paisnan latinoamerikano, miéntras ku otronan ta preferá hasié dia 19 di mart, dia di San Hosé, manera ta e ehèmpel di Bolivia, Spaña i Honduras

Continue Reading

Katoliko

Di Shete Djadumingu di Pasku di Resurekshon

Published

on

By

Promé Lektura : Hechonan di apòstelnan 7, 55-60
Salmo : Salmo 97, 1-2. 6-7. 9
Di dos Lektura : Revelashon 22, 12-14. 16-17. 20
Evangelio : Huan 17, 20-26

E evangelio di awe ta ofresé nos un bunita okashon pa meditá den unidat. E ta bin ta ripití den e último añanan akí ku mundu ke logra integrashon kada be mas grandi entre pueblo i individuonan.Pa medio di FE nos sa ku moveshon di historia ta bai kondusiendo nos na realisashon di e soño asina largu sperá, e union den un solo famia. Nos tur ta anhelá un edat den kua no tin divishon i ku riba tera ta kuminsá un era di pas i di hermandat. Kristu den e ora mas solèm di su bida a resa pa unidat di hende: “Pa tur hende sea un.”
Uni hende ku otro i ku Dios ta e ideal i trabou di Iglesia. Pa e ideal akí si ta bal la pena inbertí tur nos energia. Pero promé laga nos mes un pregunta: Kiko ta unidat? Biba den unidat no ta nifiká pensa igual, sinti mesun kos, ku ta uni tur ser humano den un uniformidat laf i steril. Dos esposo sa ku ta uní no ta nifiká ku kada un mester pèrdè su personalidat. Unidat no ke men renunsiá na nos manera di pensa. Tampoko e ta nifiká semper keda ketu o keda sin defendé konvikshonnan propio.. Kiko e ora ei ta unidat ? Lo splik’é ku un frase hopi ripití, pero berdadero. Unidat ta e armonia kreá di diversidatnan. San Pablo ta splika e konsepto akí ku e imágen di e kurpa humano. “Ta un hecho ku e kurpa, siendo un, tin hopi parti , pero e partinan maske ku nan ta hopi, ta forma entre tur un solo kurpa”. Nos kurpa ta papiando ku nos di un maravioso unidat konstruí a base di diversidat. Ta logra e armonia akí pasobra tur parti di e kurpa ta traha, ta move, ta aktua den funshon di e konhunto.
Sosiedat ta konsistí di un variedat riku di hende. Tin múltiple rasa, lenga i kultura. Kada un ta poseé su propio rikesa.
Pa biba den unidat laga nos kuminsá na aseptá e diversidat ku ta eksistí den mundu. Nos no ta pretendé di biba den un paraiso irealístiko kaminda tur hende ta pensa igual i ta kana riba e mesun kaminda. Laga nos aseptá e desafio pa biba e unidat den e diversidat, pa logra armonia atraves di rèspèt pa variedat. Laga nos ta outéntiko den nos manera di pensa i di aktua i laga nos respetá e forma personal di pensa i di aktua di kada persona, semper i kuando esaki no afektá e bon komun.
Ta logra armonia ora kada hende kontribuí na e bon komun. E dos palabranan aki: bon komun, ta esnan ku mester inspirá nos akshonnan. Ora e interes personal i egoista ta pone su mes dilanti di e bon komun, e ora ei unidat i konkordansha ta kibra.
Kristu, ora e ta resa pa unidat, no ta pensando únikamente den un unidat horizontal, ke men di hende entre un ku otro. “Ku nan tambe ta ku nos”, Hesus a pidi den su orashon na Tata. En bèrdat, no por tin union duradero entre hende si Dios no ta e laso ku ta uni nos.

Sinembargo, kon difísil ainda ta e unidat entre kristiannan. No ta nesesario mira pafó i haña un mundu den guera konstante pa konkluí kon difísil ta di biba den unidat. Ta sufisiente pa nos mira un poko paden di nos mes pa deskubrí den nos propio sentimentu e rais di un divishon profundo. E rais akí ta nos egoismo.
Nos sa ku egoismo ta un forsa ku nos tur ta dirigí t’e na nos propio satisfakshon. Nos por bisa ku komo ser humano nos ta lèn den direkshon di egoismo, pero komo kristian nos mester obra ku amor. Stima ta nifiká sali di nos mes pa proyektá nos mes den direkshon di otro. Ora nos logra konvensé nos mes di e forsa konstruktivo ku amor ta enserá, únikamente e ora ei nos lo kuminsá traha riba e bon komun.
Den eukaristia kada djadumingu, nos ta selebrá e unidat di e famia kristian. Un solo Señor, un solo fe, un solo boutismo, un solo Dios I Tata. Tur loke tin den misa ta papia ku nos di unidat: altá ta e mesa di famia, kaminda komo ruman nos ta sinta pa kome di e mesun pan i pa bebe di e mesun biña. Ku ora nos sali di e tèmpel akí nos bai na praktiká e unidat i komunion ku nos a bin pa selebrá bibando den rèspèt mutuo i den amor, promoviendo e bon komun.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login