PARIS – Emmanuel Macron presidente di Fransia a anunsiá ayera ku e situashon awor ta muchu pió debí ku e variante britániko a plama di un forma bárbaro rònt e pais.

E variante Britániko ta muchu mas kontagioso, peligroso i mortal segun palabranan di Emmanuel Macron.

Komo medida drástiko ku gobiernu a tuma pa entrante djasabra próksimo lo bai tin un lock down total rònt Fransia.

Ningun hende no por ta riba kaya for di 7’or di anochi te ku 5’or di mainta i si polis mester topabu bo ta bai sera.

E situashon ta di prekupashon ya ku pa dia tin riba 50 mil hende ta keda kontagia di kual mas ku mitar ta kontagio di e variante Britániko.

Pa lokual ta skolnan ta keda sera pa por lo ménos 1 luna largu entrante 5 di aprel próksimo.

Emmanuel Macron a indika ku departamentunan di kuido intensivo den hospitalnan rònt Fransia ta kompletamente saturá i ku e situashon ta alarmante.

Ekspertonan na Fransia ku ta konseheronan di departamentu di salubridat a indika ku e situashon ta mas alarmante ku aña pasa durante mesun periodo aki.