Pa ami tambe manera NOBO a skibi e medaya di Bròns ta bal Oro.
Tabatin masha hopi kos, asina Lennert a deklará den kombersashon ku Deporte Hoyer serka Calili Ruiter.

“Nos a prepará nos muchanan ku na Argentina lo no ta fásil.
Nos a haña nos den un friu enorme.

No tabata fásil.

E frialdat a hasi hopi mucha malu.

Kuminda tambe a laga di deseá.

Tabata un doló di kabes.

Mainta nos mester a kumpra awa i bleki di “Tuna”.

Nos mester a hasi hopi esfuerso, ni tabata fasil. E muchanan a duna lo máksimo. Nos tabatin masha mucha malu riba vèlt, pero bo no tabata ripara esei.

Guatemala a paga pa bai hotèl, nos no tabata por. Argentina su selekshonnan no a keda den mes aliniashon ku nos.

Nos mester a keda motivá.

Bo mester keda di “focus”.

Nos tabata duna e muchanan vitamina tur dia.

Tin mucha ku no por a drumi anochi i kasi no por a para riba pia, pero ku tabata duna tur ku tin riba tereno.

E medaya pa nos ta bal hopi.

Nos mes mester a yuda ku trata e muchanan su leshon, na palabra Lennert Angela ku ta fungi komo “General Manager” di nos selekshon di sòftbòl.

“Pabo logra resultado kasi bo tin di hasi milager”, Lennert ta splika. E dirigente a rekonosé ku tin deportista pa representá nan Pais ta sali perhudiká.

Tin skol ta dunabo chèns pa hasi bo “tèntamen”, otro ta bisabo kubo tin di hasiele den di dos chèns. E atleta tin “zoek het maar uit”.

E deportista kubo ta representá bo Pais riba nivel nashonal mester haña un trato preferensial.
Nan ta representá bo Pais.

Nos mester por ahustá nos deportistanan ku ta representá nos Pais, Sr. Angela a deklará.

“Coachnan” tin di sakrifiká nan dianan fakansi.
Tin empresa ku si ta kontribuí.

Ta hopi kos nos ta pasa aden den deporte, e dirigente a deklará serka “Calili” Ruiter.

Tambe e la gradisí MCB/FDOK pa koperá.
Huntu ku nan: Chapè Bernardus i “Pin” Wijman ku a yuda den preparashon.