Lokal
Kurasoleño Ludgardo (34) detené komo sospechoso kaso asesinato Peter de Vries
TILBURG. Ayera nochi outoridatnan polisial na Hulanda a anunsiá ku nan a praktiká un detenshon mas den e investigashon pa solushoná asesinato dje periodista Peter de Vries i kende nan a identifiká komo e Kurasoleño Ludgardo S. di 34 aña ku ta biba na Tilburg i tin un karchi di kastigu serio.
Den pasado e tabata envolvi den un kaso ku konsekuensia fatal durante un atrako pero e biaha aki ta pa su supuesto komplisidat den asesinato di Peter R. de Vries.
Luna pasá a tira su ruman mata na Hulanda di akuerdo ku fuentenan periodistiko i hustisia mes a konfirma ku e ta di oktavo sospechoso ku nan ta arestá.
Hustisia ta sospecha ku e ta forma parti di gruponan ku ta den kriminalidat i no a partisipa direktamente den e asesinato sino mas bien tabata opservá i raportá e pasonan di De Vries.
E Kurasoleño di Tilburg tin un reputashon serka polis komo hende ku no ta fies di violensia kriminal pisá. Na 2011 e tabata envolvi den un atrako ku konsekuensia fatal riba doño di un tienda di telefon huntu ku su ruman i dos amigu na Vlaardingen.
Ora doño dje tienda a lucha pa defende su propiedat e kuarteto a sali na kareda i a tira un solo tiru ku a skarmai na suela i a bai pega den kabes dje viktima.
E viktima tabata papiando na telefon ne momento i Ludgardo a haña un kastigu di 8 aña pero ela sinta menos kastigu pasobra 7 aña despues polis a aresté ku arma di kandela den un outo ku su ruman na Rotterdam i ela purba skonde e arma bou pedal di tròt pero a faya.
Pe delito aki ela haña 6 luna di kastigu pero e tin un lista di delito serio manera ladronisia i kore sin reibeweis of fuma.
ASESINATO
NA POMP DI
GASOLIN
Luna pasá un pistolero a tira su ruman grandi Lucho mata dia 21 di desember na un pòmp di gasolin na Tilburg.
Poko despues dje asesinato polis a detené seis sospechoso i despues di a interogá nan, a laga nan bai pero e mesun anochi un dje sospechosonan a bai entreg’é na polis.
Segun testigu, e pistolero i e viktima tabata kore tras di otro te ora un di nan a kuminsa tira i varios impakto di bala a alkansá Lucho i ela muri.
Mesora a relashona e asesinato ku morto di Boechie na Tilburg dia ei i talbes e hecho ku nan a topa otro un kos a sigi otro.
8 SOSPECHOSO
Segun e relato polisial di awe mainta ku detenshon di Ludgardo nan a yega na 8 sospechoso den e kaso di asesinato dje periodista hulandes kende a pèrdè su bida dia 6 di uli 2021 den Lange Leidsedwarsstraat na Amsterdam.
Ela agonisá 9 dia promé ku ela muri. De Vries tabata persona di konfiansa di e testigu di korona Nabil B., den e proseso di likidashon Marengo na Hulanda.
E notorio Ridouan Taghi ta e sospechoso prinsipal den e konspirashon den kual a detené 8 hende.
Direktamente despues di e tiroteo polis a aresto un tal Delano G., i e shofùr dje outo get-away Kamil di 36 aña.
Un intermediario kriminal Polako a kontratá e sospechosonan i a manda un foto di Peter R. de Vries pa nan ku e teksto: “Te kachó aki boso mester mata”.
Direktamente despues dje atentado polisnan a mira dos homber ta filma De Vries malamente heridá. Na Helmond tambe a arestá un kómplise dje duo pero nan a lag’e bai rapidamente i fin di september aña pasá a detené un kómplise na Polonia ku a organisá outo, arma i plaka pa e asesinonan Delano i Kamil E.
E kaso kontra e duo tabata kla kaba te ku fiskal a pidi kastigu di bida largu pa nan pero promé ku a sera e kaso, wes a habri e kaso di nobo pasobra Ministerio Publiko a produsi un testigu importante.
Aparte di esei a detené tres sospechoso nobo ku te Polako i e dos hendenan ku a filma e asesinato.
Pa kolmo un dje wesnan dje tribunal a emigrá pa otro pais, e kaso a tarda i mester hasi henter e kaso di nobo.
WILLEMSTAD – Tin hopi interes di bishitantenan di eksterior pa karnaval di Kòrsou.Tin hopi turista ta riba nos isla i representantenan turistiko i tambe prensa internashonal ta na kantidat grandi pa kubri nos karnaval. Muryad de Bruin, direktor di Ofisina di Turismo a bisa ku CTB ta hopi kontentu pa tin karnaval bèk den su gloria kompleto manera e tabata semper. Prinsipalmente for di den region, entre otro Surnam, tin hopi turista na Kòrsou pa gosa di karnaval.
Pa motibu di Covid-19, ultimo dos aña, no por a organisa karnaval na di Kòrsou,. fisina di Turismo a prepara hopi bon pa e regreso di e fiesta grandi aki. Henter e siman aki, media internashonal ta di bishita na Kòrsou pa kubri e paradanan di karnaval, prinsipalmente esun grandi ku tuma luga mañan. Di e manera aki i ta mustra mundu tambe kon bunita nos karnaval ta.
De Bruin a bisa ku di tur e merkadonan di Korsou, tin representante turistiko e siman akin a Korsou. Ta trata di entre otro Hulanda, Colombia, Ecuador, Surnam, Merka i Republika Dominikana, ‘Nan ta kubri nos karnaval i dun’e e atenshon den publisidat internashonalmente’.
Henter e siman aki personal di e departamentu di produkto di CTB i ‘destination services’ ta riba kaya, pa host huntu ku ‘influencersnan’, i medionan di komunikashon. CTB ta guia i perkura pa e miho parti di Korsou ta bisto riba nan publikashonnan.
KONSIENTISA
Tambe komo ofisina di Turismo ta dedika atenshon na konsientisashon lokal. E direktor di CTB a a menshona ku durante di temporada di karnaval, ta konsientisa pa tene nos isla limpi. Esaki ta ta un kampaña ku ta tuma luga hopi luna kaba. E konsientisashon ta ku mester tene Kòrsou dushi i limpi. Den temporada di Karnaval, Ofisina di Turismo ta keda pone atenshon riba e asuntu aki, pa logra ku nos komo País, ta un país limpi pa nos mes pero tambe pa e bishitantenan.
CHATA tambe ta hopi kontentu ku karnaval ta bek, pasobra esaki ta hopi positivo pa e okupashon di e hotelnan i otro negoshinan ku ta relata na turismo.
Hans Slier, presidente di CHATA a bisa ku e okupashon dje hotelnan den e temporada aki ta hopi bon. Ademas, asina Slier ta bisa, eventonan manera karnaval ta no solamente ta hopi bon pa turismo pero tambe pa Kòrsou mes. Karnaval i otro festivalnan manera Jazz i Blues Fesitval, ta pone Korsou riba mapa internashonal loke ta hopi bon.
WILLEMSTAD – Den e periodo di 23 yanüari 2023 pa 30 yanüari 2023, polis a registrá i a analisá e siguiente aktividatnan kriminal.
Atrako
Kantidat: 5
Orario: entre 02.51’or. – 06.51’or. / 11.26’or. – 23.13’or. Sitio: Jan Noorduynweg, Dein, Pietermaai, Kanga, Mahuma.
Ladronisia di
vehíkulo
Kantidat: 4
Orario: entre 23.00’or. – 05.00’or.
Sitio: Marie Pampoen (2x), Pietermaai, Otrobanda.
Kiebro den kas
Kantidat: 8
Orario: entre 11.00’or. – 15.00’or.
Sitio: Pannekoek, Hoendenberg, Mahuma (2x), Rooi Catootje, Koraal Partier, Suffisantdorp, Julianadorp.
Partikularidat: Dor di kibra porta dilanti (mayoria).
Kiebro den negoshi
Kantidat: 3
Orario: entre di 00.00’or. – 05.00’or.
Sitio: Fokkerweg, Caracasbaaiweg, Souax West. Partikularidat: Dor di kibra dak i kandal (mayoria).
Kiebro den /na outo
Kantidat: 11
Orario: alrededor di 11.00’or. – 14.00’or / 23.00’or. – 05.00’or
Sitio: Caracasbaai, Noordkust, Otrobanda, Sabana bij Wespunt (3x), St. Wilibrordus, Habaai, Vredenberg Bij Kenchan(2x), Wespunt.
Partikularidat: Dor di kibra glas patras i bai ku piesa di outo(mayoria).
Violensia relashonal
Kantidat: 15
Orario: entre 00.00’or. – 03.00’or
Sitio: Otrobanda, Sucasa, Bonam, Oude Water, Marie Pampoen, Koraal Specht, Buena Vista, Monchi, Vredeberg bij Sta. Maria, Punda, Sta. Cruz, Jonisberg, West Groot St. Joris, Zuid Abrahamsz, Noord Zapateer.
WILLEMSTAD – JCI Dutch Caribbean lo kier informa ku a elegí i instalá su direktiva nobo pa e aña 2023. Sigun e presidente nobo di JCI Dutch Caribbean durante di e aña 2023 e organisashon lo proveé oportunidatnan pa desaroyo di liderzgo i empodera miembronan pa krea impaktonan positive den nos komunidat. Pues, pa e motibu aki e lema prinsipal di 2023 ta ‘Step Up’.
Junior Chamber International (JCI) su filosofia di ‘one year to lead’ tin e enfoke pa duna hendenan entre 18 pa 40 aña oportunidat di haña eksperensia den posishonnan di liderazgo.
JCI Dutch Caribbean su direktiva pa aña 2023 ta konsistí di e di 62 Presidente Shakira Sedney – Albertoe, ku asistensha di Sekretaria Jacqueline Candelaria, Tesorero Alasha Tejeda, Vise Presidente Ehekutivo Aldimir Vrutaal, Vise Presidente Sulmahine Penza – Kwidama, Vise Presidente Richards Martina, Asesor Legal General Vanessa Overman i Presidente Saliente Sulin S.F. Passial.
JCI ta un organisashon global di lidernan entre 18 pa 40 aña ku ta transformá hóbennan pashoná den lidernan kapabel pa medio di training, proyektonan, eventonan i programanan. JCI Dutch Caribbean ta konsistí di 5 organisashon lokal. Na Kòrsou, JCI Creative Leaders in Curaçao (CLIC), JCI Involvement Of Banda Ariba Curaçao (IOBA Curaçao) i JCI Willemstad. Na Aruba: JCI Young Active Leaders Aruba (YALA). Na Sint Maarten: JCI SXM A.C.T.I.O.N (Aspiring Change To Impact Our Nation).
Si bo ta interesá di desaroyá bo abilidatnan di liderazgo miéntras bo ta krea impaktonan positivo den bo komunidat, tuma kontakto ku JCI Dutch Caribbean libramente na dutchcaribbean@jci.cc.
Pa mas informashon di JCI general bishita www.juniorchamber.international.
Sigui nos riba Facebook, Instagram, LinkedIn @jcidutchcaribbean pa e último informashonnan di JCI Dutch Caribbean su aktividatnan.
Daily Nobo
Covid-19 Statistics
Hamas a konfirmá ku nan lider a keda asesiná pa un misil na Iran
Antony Blinken a afirmá ku Merka no ta impliká den asesinato di Ismail Haniyeh
Maduro ta vinkulá: Lider di Tren de Aragua responsabel den e protesta kontra resultado ofisial elektoral
Gobiernu merikano a manda atvertensia: Serio den direkshon di Nicolas Maduro relashoná ku resultado di elekshon
