Lokal
KÒRSOU UN BIAHA MAS SUP KAMPEON MUNDIAL, KIKO AWOR?
WILLEMSTAD Aña aden aña afó nos muchanan ta presentá den e kompetensianan di beisbòl Little League na Williamsport i logra sali ku masha bon resultado mes. Figurábu, un isla chikitu manera ta e kaso ku Kòrsou, ta logra gana di Nicaragua, gana di Mexico, gana di Panamá. Nos ta bira kampeon den Karibe, despues den e kategoria internashonal tambe ta nos ta kampeon. Tur esaki ta sosodé ku regularidat (esei ke men ku no ta pa kasualidat tur e logronan aki), anto te ainda nos gobernantenan no a sa kon inventá trayektonan ku ta duna e tipo di desaroyonan aki mas forsa, hasi ku nos por sigui gana den futuro ku beisbòl. Mayornan ta hinka nan mes den debe pa yunan no keda atras, pasobra tin gastunan mará na praktikamentu di e deporte aki. Klupnan sa pasa trabou pa por haña e plakanan nesesario, na momentu ku mester biaha pa Williamsport. Anto no lubidá tampoko hopi sakrifisio di parti di voluntarionan.
Una bes ta asina leu ku Kòrsou logra, kasi tur miembro di e komunidat kurasoleño ta kontentu i orguyoso ku e logronan, pero kiko awor?
Di un manera òf otro lo mester tabatin insentivonan nobo kaba ‘in place’ ku ta duna mas ‘boost’ na posibilidatnan pa subi e nivel di Little League ainda mas na Kòrsou. Masha tempu esei mester a sosodé, pero ta rekerí gobernantenan inteligente, ku vishon i ku ambishon sufisiente haltu pa laga nos isla krese ainda mas. Mester ta trata di polítiko i gobernantenan dispuesto pa yama tur ‘stakeholders’ ku tin di haber ku beisbòl Little League na mesa, pa analisá, diskutí i interkambiá di opinion pa finalmente introdusí fórmulanan ku ta stimulá e ramo aki di deporte ainda mas. Pues ta momento pa bini ku kontestanan konkreto riba e pregunta: “Kiko mester hasi pa alsa resultadonan di Little League mas na Kòrsou?”. Komo konsekuensia di nos afinidat ku beisbòl ku klaramente ta keda demostrá ya na nivel di Little League, sobrá paisnan di mundu ta eksperensiá ku mester tene kuenta ku Kòrsou. Nos hendenan, simplemente bisá, ta nasé ku e talento ei, pues ta lógiko ku, ounke un isla ku un komunidat asina chikí, tòg un kantidat respetá di yunan di Kòrsou ta bin resultá den Liga Grandi aya na Merka.
Kòrsou mester asumí e papel di ta e Mekka den Karibe si ta trata di beisbòl Little League. Nos mester ban pe, anto sin basilá.
P’esei e ta un apsurdes di marka mayó pa skucha, eks gobernantenan sintá den bankinan di oposishon, reklamá i trata na yama tur atenshon, bisando ku sierto proyektonan, ku awor ta kosechando éksito, ta nan a introdusí. Tantu energia pa mustra ku tabata nan idea, ku tabata nan inisiativa (tempu ku nan tabata den gobièrnu), en bes di sigui wak padilanti i aportá ku mas bon proyekto pa benefisiá Kòrsou. Ta un hecho tambe ku hopi polítiko i òf gobernante di Kòrsou ta preferá bòikotiá idea i proyektonan di gobièrnu anterior, nan tin miedu pa e fama bai pa otro gobernante. Hesta ridíkulo no? Asina ei nos propio gobernantenan a tene Kòrsou hopi aña abou, perhudikando nos mes pueblo. Un komportashon sumamente bobo, kruel i destruktivo esaki ta.
Tur e puntonan aki ta djis pa ilustrá ku si Kòrsou ke bai dilanti, mester pasa un strepi kòrá den e mentalidat kòmbou ku ainda ta dominá, mester kuminsá pensa i traha ku seriedat pa sirbi interes general.
Pero lamentablemente ainda ta trata di polítiko i gobernantenan ‘light weight’ ku pueblo no mester konfia ku e responsabilidat pa goberná e isla aki.
WILLEMSTAD – Tin hopi interes di bishitantenan di eksterior pa karnaval di Kòrsou.Tin hopi turista ta riba nos isla i representantenan turistiko i tambe prensa internashonal ta na kantidat grandi pa kubri nos karnaval. Muryad de Bruin, direktor di Ofisina di Turismo a bisa ku CTB ta hopi kontentu pa tin karnaval bèk den su gloria kompleto manera e tabata semper. Prinsipalmente for di den region, entre otro Surnam, tin hopi turista na Kòrsou pa gosa di karnaval.
Pa motibu di Covid-19, ultimo dos aña, no por a organisa karnaval na di Kòrsou,. fisina di Turismo a prepara hopi bon pa e regreso di e fiesta grandi aki. Henter e siman aki, media internashonal ta di bishita na Kòrsou pa kubri e paradanan di karnaval, prinsipalmente esun grandi ku tuma luga mañan. Di e manera aki i ta mustra mundu tambe kon bunita nos karnaval ta.
De Bruin a bisa ku di tur e merkadonan di Korsou, tin representante turistiko e siman akin a Korsou. Ta trata di entre otro Hulanda, Colombia, Ecuador, Surnam, Merka i Republika Dominikana, ‘Nan ta kubri nos karnaval i dun’e e atenshon den publisidat internashonalmente’.
Henter e siman aki personal di e departamentu di produkto di CTB i ‘destination services’ ta riba kaya, pa host huntu ku ‘influencersnan’, i medionan di komunikashon. CTB ta guia i perkura pa e miho parti di Korsou ta bisto riba nan publikashonnan.
KONSIENTISA
Tambe komo ofisina di Turismo ta dedika atenshon na konsientisashon lokal. E direktor di CTB a a menshona ku durante di temporada di karnaval, ta konsientisa pa tene nos isla limpi. Esaki ta ta un kampaña ku ta tuma luga hopi luna kaba. E konsientisashon ta ku mester tene Kòrsou dushi i limpi. Den temporada di Karnaval, Ofisina di Turismo ta keda pone atenshon riba e asuntu aki, pa logra ku nos komo País, ta un país limpi pa nos mes pero tambe pa e bishitantenan.
CHATA tambe ta hopi kontentu ku karnaval ta bek, pasobra esaki ta hopi positivo pa e okupashon di e hotelnan i otro negoshinan ku ta relata na turismo.
Hans Slier, presidente di CHATA a bisa ku e okupashon dje hotelnan den e temporada aki ta hopi bon. Ademas, asina Slier ta bisa, eventonan manera karnaval ta no solamente ta hopi bon pa turismo pero tambe pa Kòrsou mes. Karnaval i otro festivalnan manera Jazz i Blues Fesitval, ta pone Korsou riba mapa internashonal loke ta hopi bon.
WILLEMSTAD – Den e periodo di 23 yanüari 2023 pa 30 yanüari 2023, polis a registrá i a analisá e siguiente aktividatnan kriminal.
Atrako
Kantidat: 5
Orario: entre 02.51’or. – 06.51’or. / 11.26’or. – 23.13’or. Sitio: Jan Noorduynweg, Dein, Pietermaai, Kanga, Mahuma.
Ladronisia di
vehíkulo
Kantidat: 4
Orario: entre 23.00’or. – 05.00’or.
Sitio: Marie Pampoen (2x), Pietermaai, Otrobanda.
Kiebro den kas
Kantidat: 8
Orario: entre 11.00’or. – 15.00’or.
Sitio: Pannekoek, Hoendenberg, Mahuma (2x), Rooi Catootje, Koraal Partier, Suffisantdorp, Julianadorp.
Partikularidat: Dor di kibra porta dilanti (mayoria).
Kiebro den negoshi
Kantidat: 3
Orario: entre di 00.00’or. – 05.00’or.
Sitio: Fokkerweg, Caracasbaaiweg, Souax West. Partikularidat: Dor di kibra dak i kandal (mayoria).
Kiebro den /na outo
Kantidat: 11
Orario: alrededor di 11.00’or. – 14.00’or / 23.00’or. – 05.00’or
Sitio: Caracasbaai, Noordkust, Otrobanda, Sabana bij Wespunt (3x), St. Wilibrordus, Habaai, Vredenberg Bij Kenchan(2x), Wespunt.
Partikularidat: Dor di kibra glas patras i bai ku piesa di outo(mayoria).
Violensia relashonal
Kantidat: 15
Orario: entre 00.00’or. – 03.00’or
Sitio: Otrobanda, Sucasa, Bonam, Oude Water, Marie Pampoen, Koraal Specht, Buena Vista, Monchi, Vredeberg bij Sta. Maria, Punda, Sta. Cruz, Jonisberg, West Groot St. Joris, Zuid Abrahamsz, Noord Zapateer.
WILLEMSTAD – JCI Dutch Caribbean lo kier informa ku a elegí i instalá su direktiva nobo pa e aña 2023. Sigun e presidente nobo di JCI Dutch Caribbean durante di e aña 2023 e organisashon lo proveé oportunidatnan pa desaroyo di liderzgo i empodera miembronan pa krea impaktonan positive den nos komunidat. Pues, pa e motibu aki e lema prinsipal di 2023 ta ‘Step Up’.
Junior Chamber International (JCI) su filosofia di ‘one year to lead’ tin e enfoke pa duna hendenan entre 18 pa 40 aña oportunidat di haña eksperensia den posishonnan di liderazgo.
JCI Dutch Caribbean su direktiva pa aña 2023 ta konsistí di e di 62 Presidente Shakira Sedney – Albertoe, ku asistensha di Sekretaria Jacqueline Candelaria, Tesorero Alasha Tejeda, Vise Presidente Ehekutivo Aldimir Vrutaal, Vise Presidente Sulmahine Penza – Kwidama, Vise Presidente Richards Martina, Asesor Legal General Vanessa Overman i Presidente Saliente Sulin S.F. Passial.
JCI ta un organisashon global di lidernan entre 18 pa 40 aña ku ta transformá hóbennan pashoná den lidernan kapabel pa medio di training, proyektonan, eventonan i programanan. JCI Dutch Caribbean ta konsistí di 5 organisashon lokal. Na Kòrsou, JCI Creative Leaders in Curaçao (CLIC), JCI Involvement Of Banda Ariba Curaçao (IOBA Curaçao) i JCI Willemstad. Na Aruba: JCI Young Active Leaders Aruba (YALA). Na Sint Maarten: JCI SXM A.C.T.I.O.N (Aspiring Change To Impact Our Nation).
Si bo ta interesá di desaroyá bo abilidatnan di liderazgo miéntras bo ta krea impaktonan positivo den bo komunidat, tuma kontakto ku JCI Dutch Caribbean libramente na dutchcaribbean@jci.cc.
Pa mas informashon di JCI general bishita www.juniorchamber.international.
Sigui nos riba Facebook, Instagram, LinkedIn @jcidutchcaribbean pa e último informashonnan di JCI Dutch Caribbean su aktividatnan.
Daily Nobo
Covid-19 Statistics
Hamas a konfirmá ku nan lider a keda asesiná pa un misil na Iran
Antony Blinken a afirmá ku Merka no ta impliká den asesinato di Ismail Haniyeh
Maduro ta vinkulá: Lider di Tren de Aragua responsabel den e protesta kontra resultado ofisial elektoral
Gobiernu merikano a manda atvertensia: Serio den direkshon di Nicolas Maduro relashoná ku resultado di elekshon
