Connect with us

Sosial

KIZZME ta lansá kompa melódiko ‘ONLY WITH YOU’ ku QSHANS

Published

on

WILLEMSTAD – Awó ku e período di pandemia ta tras di lomba i poko poko farándula ta normalisando, KIZZME ta bèk ku un kompa melódiko titulá ‘ONLY WITH YOU,’ ku e talentoso kantante QSHANS. Spesífikamente, e kantika sensual ta un ‘Kompa Gouyad,’ ku elemento nan di zouk i ritmo kombiná, pues un perfekto kantika pa baila riba un tegel. ‘ONLY WITH YOU’ a keda skibí i komposita pa QSHANS, Mr. Ray Bass i AJ GRAND, kende tambe a areglá e piesa.
Qshans
E ultimo añanan tras di lomba, Qshans a traha duru riba su karera artístiko, posishonando su mes komo un vokalista di peso den e género di Ritmo Kombiná na Hulanda. Manera ta konosí, ela militá den front di Cache Deluxe and Cache Royale pa vários aña. Komo solista, Qshans a sigui saka diferente single manera ‘No Trata Mi Asina’ ku Stanley Clementina, i ‘Mas Mi Drai’ huntu ku Ivanhoe Willems, tur dos na 2020. Entre 2016 pa 2019, Qshans a marka pouta ora ela realisá su soño i penetrá den e mundu di teater na Hulanda ku su aktuashon den ‘the Lion King’ komo e suplente pa e ròl di Banzai. Tambe Qshans a figurá den ‘Mama Mia’ komo Pepper i den ‘Sister Act’ komo TJ, Pablo i Eddie Fritzinger na Oberhausen, Alemania, i últimamente e obra basá riba bida di e legendario Tina Turner. Den e siman benidero Qshans lo ta na Kòrsou i Aruba pa algun presentashon eksklusivo.
Plannan grandi
Na 2017, KIZZME a keda fundá na Hulanda pa e basista i kantante Riendy Holder, mihó konosí komo Mr. Ray Bass, kende a uni forsa ku talentoso kompositor i músiko Andre ‘AJ GRAND’ Pantophlet i Orville ‘OMD’ Mac Donald pa asina forma e núkleo musikal di e banda. E banda afrokaribense ta konosí pa su abilidat distinto di krea un sonido úniko unda ta meks Kizomba, Zouk, Kompa, Semba i músika afroséntriko. Sobra integrantenan di KIZZME ta kantante Nilson Silva, Natalia Santos, Marise Barbosa Verela di Cabo Verde, i perkushonista Kevin Leito di Kòrsou. E kolaborashon ku Qshans ta típiko e manera di kolektivo kon KIZZME ta funkshona, unda su integrantenan ta traha tambe riba nan respektivo proyekto individual. Pa e piesa aki KIZZME tambe a traha ku dos músiko di Martinique i Fransia ku a yega di militá den Kassav.
Foi kuminsamentu di e aña aki, KIZZME a traha hopi riba nan estilo i produkshon musikal i a ranka sali ku diferente komposishon propio nobo. KIZZME tin plannan grandi pa e aña aki, unda nan lo lansá diferente piesa den e lunanan benidero. Dia 11 di yüni benidero, KIZZME lo presentá ‘ONLY WITH YOU’ na e evento di baile SILENT KIZZ na Amsterdam, unda nan lo deleitá entre otro e fiel bailadó di kizomba i kompa, ku ta gosando di un otro ola di popularidat. Últimamente KIZZME tin komo meta pa uni tur hende via muzik afrokaribense, tresiendo nan huntu apesar di nos diferensia di idioma i kultural.
Bishitá KIZZME su página sosial manera Facebook.com/WeAreKizzMe, i Instagram @wearekizzme pa keda na altura di futuro presentashon. Tambe bishitá KIZZME su Tik Tok na https://vm.tiktok.com/ZMLK1B6X6 pa e challenge di ‘ONLY WITH YOU’ unda lo saka diferente ganadó den e simannan benidero. Korda pidi pa e piesa ‘ONLY WITH YOU’ na tur radio emisora i televishon popular riba nos islanan.

Continue Reading

Sosial

Promé ‘Trumpet Challenge 2022’ djarason dia 22 di yuni den Sambil

Published

on

By

WILLEMSTAD – Por fin e dia ta yegando pa Kòrsou konosé su promé trumpet challege 2022. Esaki lo tuma lugá djarason awor dia 22 di yüni den Sambil pa 7 or di anochi.

Despues di vários luna di preparashon bou di direkshon di Hector Sampson, e trompetistanan aki ta kla pa laga pueblo di Kòrsou disfrutá di nan músika.
Manera ta konosí, Fundashon WESU a bin ta trata riba e parti di formashon musikal i organisá na desèmber último, e promé Trombone Challenge ku tabata un éksito total.

Awor ta toka turno na trompetistanan pa nan tin nan Trumpet Challenge i despues di vários luna di preparashon intensivo, djarason awor dia 22 di yüni, Pueblo di Kòrsou por bai disfrutá grátis di nan presentashon.
E evento lo tuma lugá riba e stage grandi skùin dilanti Victoria Secret den Sambil. E evento lo kuminsá eksaktamente 7 pm i ta algun kansion nan lo bai presentá. P’esei un apelashon ta na tur hende ku ta interesá pa wak nan, pa nan tei presente den Sambil djarason awor.

Continue Reading

Sosial

AMAK ta partisipá dos gran baluarte di farandula ku a bai laga nos

Published

on

By

WILLEMSTAD – Djamars anochi a drenta e notisia tristu ku e konosido Patrick Janzen a bai laga nos i den oranan di mardugá djarason 9 di yüni 2022, e pianista, kompositor i areglista Eddy Mar a bai sosegá.

Patrick Janzen
Pa lokual ku ta trata e personahe di Patrick Janzen, nos a komprondé ku el a fayesé na un edat di 53 aña na su kas, despues di tabata hospitalisá pa algun dia.

Patrick a bai laga nos na un edat relativamente hóben i durante su trayektoria den farándula, e tabata envolví den diferente aktividat farandulero tantu aki na Kòrsou komo na Ulanda.

Patrick a inisiá ku su negoshi i pone lus i harma stage pa diferente aktividat i seguidamente ela formalisá su aktividatnan ku lantamentu di Ola ku ta nifiká Organisashon pa Lanta Ambiente.

Patrick tabata pone zonido i meks pa diferente agrupashon musikal i un di su éksitonan grandi tabata lantamentu di e Agrupashon Musikal No Game, ku a kosechá hopi popularidat i hasta a konkista e titulo di Rei di Tumba ku Reinir Lijfrock komo kantante na 2006.

Último tempunan aki, Patrick a lanta un grupo musikal di Bachata i tabata tin intenshon tambe pa lanta un grupo di Kòmbèk i formalisá regreso di No Game. Lamentablemente e no por a logra realisá tur su soñonan

Eddy Mar
Pa loke ta trata fayesimentu di Eddy Mar, AMAK por menshoná ku e tabata hopi aktivo tantu komo músiko, pero tambe durante mas ku 10 aña komo dosente di e proyekto di Formashon Musikal den Bario.
Eddy Mar tabata forma parti di diferente agrupashon musikal i esnan ku sigur el a kosecha hopi éksito kune tabata e agrupashonnan musikal Dynamics i BESS ku tabata un agrupashon musikal ku e i defuntu Mr. Babalu tabata dirigí musikalmente.
Eddy Mar durante último tempu ku a pasa tabata sufri di kebrante di salu i den oranan di mardugá di djarason el a bin fayesé.
Direktiva di AMAK ta ekspresá su sentido de pésame na famianan di Patrick Janzen i Eddy Mar. Ku nan alma sosegá na pas.

Continue Reading

Sosial

HOPI INTERES PA KURSO DI HISTORIA DI MUZIK DI KORSOU ORGANISA PA CCC

Published

on

By

Willemstad – Durante e periodo di 7 di febrüari te ku 16 di mei 2022 Sentro Kultural Kòrsou a organisá otro interesante Kurso Historia di Muzik di Kòrsou den su Sentro situá na Emmastad, kua tabata na enkargo di e konosido músiko Henri (Harry) Moen.

Den e kurso aki a trata desaroyo di muzik tradishonal di Kòrsou di e époka entre 1863 i 2000. Entre otro e kursantenan ta siña rekonosé ritmonan tradishonal i konhuntonan musikal, tambe nan ta sera konosi ku kompositor i otro desaroyonan den muzik di Kòrsou. Huntu ku esaki tambe nan ta haña un bista di aspektonan sosial i ekonómiko ku tin relashon ku e desaroyo.

E kurso un biaha mas tabata un èksito total na opinion di e kursantenan ku a yena un bashí na informashon tokante nos muzik. E forma úniko di duna lès di señor Harry Moen i su splikashon al kaso, kla i konsiso a mantené un entusiasmo kontínuo serka e kursantenan.

Djaluna 16 di mei ultimo e kursantenan presente a risibí nan sertifikado for di man di señor Harry Moen i señor Henri Cornelia, Presidente di Fundashon Sentro Kultural Kòrsou. Esnan ku a kalifiká pa nan sertifikado ta: Valentina Cijntje-Engelhardt, Alton Gordon, Rose-Marie Heije, Frensel Malacia, Isolda Mansana, Aronnette Martis, Jacqueline Nicia, Elvin Rijke, Lidwina Rodriguez, Aemilius Palm, John Scheidelaar i Glenda Sluis

Sentro Kultural Kòrsou ta felisitá tur e partisipantenan i nan dosente ku èksito di e kurso. For di aña 2012 un total di 176 kursante, di ken 67 penshonado, a risibí nan sertifikado di partisipashon na e kurso.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login