BOGOTA – Gustavo Petro presidente elekto Colombiano a deklará ayera durante un entrevista ku e kombersashon ku e tabatin ku eks presidente Alvaro Uribe tabata un ku e por bisa a bai bon i ku ta un señal ku ámbos lider por sigi atendé ku otro na benefisio di e pais.
Gustavo Petro a bisa ku e tin su ideologia i Alvaro Uribe tin su forma di pensa pero ku ámbos ta bai traha pa atendé ku e problemanan serio ku e pais tin.
Alvaro Uribe ta un di e polítikonan ku tin muchu mas eksperensia ku Gustavo Petro i ku ta dispuesto pa duna su koperashon i kontribushon den próksimo kuater añanan benidero.
E reunion entre Gustavo Petro i Alvaro Uribe a dura 2 ora i tin indikashon ku lo bai tin mas di e enkuentronan aki segun Francia Márquez ku lo ta Colombia su próksimo vise presidente.
E plan ta pa Gustavo Petro i Francia Márquez ku lo bai asumí e kargo di presidente i vise presidente respektivamente logra un akuerdo nashonal ku lidernan di oposishon.

VIRGINIA – Christopher Hensley hefe di kuerpo polisial na Chesterfield a konfirmá ku un tata a bai traha i lubidá ku su yu di 18 luna den un igra di solo den su vehíkulo.
Mama di e kriatura aki a yama e krèsh kaminda e yu mester a keda hiba for di mainta trempan i a haña komo kontesta ku na ningun momentu so e Tata a trese e yu.
Lokual a pasa ta e mama a yama polis pa informá nan ku su yu ta na peliger i pa lokalisá e vehíkulo di su kasa ta manehá mas lihé ku ta posibel.
Na momentu ku un patruya a lokalisá e vehíkulo tabata lat kaba debí ku e kriatura no tabata move mas den e kayente ku ta asotando na Virginia.
Ta parse ku e Tata lo a tende loke a pasa i di un forma of otro a logra yega na su kas i a kometé suisidio. Christopher Hensley a splika ku lokual a pasa aki tabata realmente un tragedia kaminda e famia aki a pèrdè dos miembro riba un solo dia.

ESTAMBUL – Dos dia despues ku presidente Recep Tayyip Erdogan no tabatin ningun opheshon na e Kumbre di Madrid pa Suesia i Finlandia drenta OTAN.
Ta manera Recep Tayyip Erdogan a yega Turkia ela kambia di opinion i for di su pais ta bolbe manda mensahe di atvertensia ku elo por blòkia ainda ku e dos paisnan aki pa stroba nan di bira miembro.
Recep Tayyip Erdogan a bolbe manda un mensahe pa lidernan di Suesia i Finlandia pa nan ekstraditá e teroristanan Turko ku a orkestra e gòlpi di estado na 2016 kontra su gobièrnu sino elo no firma pa nan drenta komo miembro di OTAN.
E lidernan di Suesia i Finlandia ta bon na altura ku nan tin sospechosonan di terorismo ku ta vinkulá ku gruponan Kurdo ku a planeá pa asesin’é.
Presidente Recep Tayyip Erdogan kier kòrda miembronan di OTAN ku e regla ta ku tin 30 miembro aworakí i e regla ta ku mester tin aprobashon formal di tur 30 miembro pa atmití otro pais komo miembro.
Den kaso ku Turkia komo miembro lo no firma Suesia i Finlandia pa por ingresa OTAN komo miembro.