ROMA – Silvio Berlusconi magnate i polítiko italiano a deklará ayera den un entrevista na “Radio Anch’io” emisora públiko na Italia ku ela haña bastante preshon di suidadanonan pa e bolbe bek den polítika.
Durante un periodo di 9 aña Silvio Berlusconi a keda ekspulsá for di polítika debí ku ela kometé froude fiskal.
Awor ku e periodo di ekspulshon a kaduká Silvio Berlusconi ta bolbe haña e oportunidat pa bolbe pa partisipá den e elekshon general ku ta na kaminda dia 9 di sèptèmber próksimo. Silvio Berlusconi lo bai kompetí kontra e partidonan di e ultraderechistanan Giorgia Meloni i Matteo Salvini.
Lokual ta sorprendé tur hende na Italia ta ku Silvio Berlusconi ku ta bai kumpli 86 aña di edat dos dia promé ku elekshon general na Italia i tin forsa mental i físikamente pa sigi den polítika.

WASHINGTON – Gobiernu merikano a presentá kargo nan kontra un miembro di Guardia Revolushonario di Iran pa planeá asesinato di John Bolton asesor di seguridat nashonal durante periodo di gobiernu di Donald Trump (2017/2021).
Segun akusashon di Departamento di hustisia merikano Shahram Poursafi mihó konosí komo Mehdi Rezayi a trata na asesiná John Bolton den represaya pa e morto di general Qasem Soleimani den un operashon d atake na luna di yanüari di 2020.
Shahram Poursafi di 45 aña di edat ku a nase na Teherán a keda akusá di un kòmplòt di asesinato den korte na Washington DC.
Tin indikashon ku Shahram Poursafi a risibí un pago di
$ 300.000 pa hasi e trabou di asesiná John Bolton na su residensia na e área metropolitana di Washington.
Lokual a skapa John Bolton ta ku servisio di inteligensia huntu ku FBI a logra interseptá mailnan i kòmbersashonnan telefóniko ku a logra kaptura Shahram Poursafi promé ku ela yega pa asesin’é.
Jake Sullivan aktual asesor di seguridat nashonal a indika ku elo bai atendé ku e kaso di John Bolton meskos di un forma rígido pa asina hustisia pone Shahram Poursafi tras di trali i ku asina lo mustra otronan pa respetá.

LIMA – Ayera tabatin un entrada hudisial pa diferente fiskal di Ministerio Públiko na Palasio di gobiernu pa buska kuña di presidente Pedro Castillo.
Despues di kasi kuater ora di búskeda di Yenifer Paredes agentenan federal di Ministerio Públiko a disidí na bati retirada di residensia presidensial.
Yenifer Paredes di apénas 26 aña di edat ta keda sospecha di ta metí den kasonan di korupshon i labamentu di plaka.
Hans Aguirre fiskal general ku a guia e operashon pa buska Yenifer Paredes a splika ku ta promé biaha den historia algu asin’aki a pasa kaminda outoridatnan ta drenta den kas presidensial pa buska un sospechoso di hustisia.
Hans Aguirre a splika ku Ministerio Públiko tin sinku kaso di investigashon kontra Pedro Castillo i esaki ta konta meskos pa Yenifer Paredes.
Den kaso ku si mester detené i interogá Yenifer Paredes lo por nifiká ku pronto Pedro Castillo tambe lo tin ku entrega poder si realmente e ta envolví den tur e kasonan aki.