Connect with us

Lokal

Gibi Bacilio na konferensia di mesa rondó na Hulanda: Awor sí Hulanda mester pidi pordon honesto Pa daño hasi durante eksklabitut…

Published

on

Gibi Bacilio

 

WILLEMSTAD – E siman aki a tuma luga denTweede Kamer e di dos konferensia di mesa rondó, ku a trata e ròl ku Hulanda a hunga durante sklabitut; ki impakto esaki tabatin i tin riba e komunidat i kiko ta hasi pa repará esaki.

Gibi Bacilio i Suzy Camelia-Römer, na nòmber di Kòrsou a partisipa virtualmente na e konferensia.

Gibi Bacilio a bisa NOBO ku djaluna último tabatin e di dos Konferensia di mesa rondó tokante sklabitut, komèrsio di hende, den kua Hulanda a hunga un papel masha importante.

Hulanda a transportá mas ku 600 mil hende for di Afrika trese den Karibe, Sur Amerika, pa laga nan traha sin paga nan nada. A maltratá nan tambe, pa saka ganashi brutu for di nan.

Loke ku Hulanda a hasi, tabatin impakto riba nos hendenan antes, pero nos di awe tambe.

Bacilio: ‘’Awor nos ta bisa Hulanda tres kos: Rekonose e bèrdat; Pidi despensa i hasi reparashon’’. Den e reunion di djaluna, tur partisipante, Hulanda, e gruponan surnameo i e grupo di Karibe a duna nan punto di bista riba e rapòrt ku nan a traha riba i kiko nan ta pensa ku mester sosode awor.

Gibi Bacilio a skohe 3 punto, for dje 12 puntonan ku su grupo tabatin.

Ela papia riba esun di pordon, ku e ta haña ku awor si Hulanda mester stòp di skonde  i pidi pordon.

Pero e mester ta un pordon honesto i sinsero. Esaki pa e krimen ku ela komete kontra di humanidat, durante di mas ku dos siglo.

E di dos punto ku Bacilio a elaborá riba dje, ta e hecho ku mester rehabilitá Tula, ku ta nos heroe nashonal.

Bacilio a bisa ku na 2010 nos a rehabilitá Tula huntu ku e otro luchadónan ku tabatin na Kòrsou na 1795.

‘I nos a pronunsiá i nombra Tula tambe hasta komo heroé nashonal.

Pero nos ta den un reino i bo no por tin un reino , kaminda ku ta menshoná Tula awor komo un heroé pero na e otro parti di Reino ketu bai tin Tula komo  bandido, malechor i kriminal’.

HULANDA TAMBE

Bacilio ta eksigi ku Hulanda tambe ta rehabilitá Tula. ‘Ma mustra kon un hòmber ku ta lucha pa derecho humano, kon boso antepasadonan a kibra tur wesu den su kurpa’.  Mester drecha esei tambe, segun Bacilio, dor di bisa despensa i ku e loke ku a pasa no mester a sosode, pasobra e tabata fout. Ounke ku e hendenan di aworaki no tabatei e tempu ei, Bacilio ta konsidera ku nan ta e asina yamá ‘rechtsopvolgers’ i ku nan mester bisa ku e hendenan di e tempu aya tabata fout.

Despues di rehabilitá Tula mester pone riba e pedestal ku e merese, banda di entre otro Nelson Mandela.

E di tres punto ku Gibi Bacilio a menshona durante dje konferensia di mesa rondó, tabata esun di dekolonisashon.

Te awe nos ta un kolonia mientras ku varios profesor di Derecho a kaba di hasi un investigashon ku ta mustra bon kla, ounke ku nan no ta bise duru ku ningun momentu Nashonnan Uni no a bai di akuerdo pa kita Kòrsou for di e lista di pais ku no tin gobernashon propio.

E ta referi na e manifesto di Nashonnan Uni, kapitulo 11, artikulo 73, ku Sint Maarten i Fundashon Kòrsou na kaminda pa libertat, ta lucha pe masha dia.

En realidat a baha Kòrsou for dje lista inkorektamente pasobra a gana Nashonnan Uni ku nos ta un pais soberano. Hulanda a hasi esei dor di pidi nan ku e no tin mester di duna reportaje mas di su kolonia. Pasobra ta diferente obligashon bo tin, ora ku bo tin un kolonia.

Un di nan, ta raportá kon kos ta bai ku bo kolonia.’

Hulanda a pidi nan pa kita esei for di dje’. Mester drecha e asuntu aki tambe, asina Gibi Bacilio ta enfatisá.

 

 

Lokal

Kontraloria mester hasi investigashon…. Kuater trahadó mas a kita for di Kas di Kòrsou den krisis profundo

Published

on

By

WILLEMSTAD. For di 15 di febrüari 2022, frakshon di PAR a hasi e petishon pa un reunion di Komishon Sentral tokante e situashon di tenshon laboral na Kas di Kòrsou.
Den e 118 dianan ku a pasa, for di dia ku frakshon di PAR a pidi e reunion te ku awor aki, 4 trahadó di kas di Kòrsou a kita for di trabou i vários a bira malu i ta na kas pa e tenshonnan na Kas di Kòrsou.
Kas di Kòrsou no tin direktor i tur otro departamento falta personal pa hasi e trabou.
Frakshon di PAR ta haña ku a inaseptabel ku trahadónan di Pais Kòrsou ta sinti ku nan mester kita for di trabou pa skapa di sintimentu di abusu i ta mas lamentabel ku parlamentarionan ta pidi reunion pa haña klaridat pa e trahadónan i ta dura 118 dia pa e minister responsabel presentá.
Mirando e eskalashon di e situashon na Kas di Kòrsou i embergadura di e konsekuensia, frakshon di PAR ta pidi pa anulá petishon pe reunion di komishon sentral a pidi pa yama un reunion públiko di parlamento, den kual ta invitá promé minister sr. Pisas ku sentido di urgensia.
I alabes ta pidi promé minister sr. Pisas pa laga Ombudsman hasi un investigashon independiente riba e situashon laboral na Kas di Kòrsou.
Frakshon di PAR ta proponé Parlamento tambe, pa pidi Kontraloria General pa hasi un investigashon riba e legalidat i efisiensia di desishonnan ku keda tumá na Kas di Kòrsou riba tereno finansiero i di personal, durante e periodo di maneho di e minister plenipotensiario aktual.

 

Continue Reading

Lokal

Bati a bati Sandals ku kritika pero….. Sandals Royal ta dal bèk ku ‘album’ di foto di trahadonan selebrando

Published

on

By

WILLEMSTAD. Na momento ku Sindikato, politiko, trahadonan I hasta funshonarionan di gobiernu ta bashando èmber di kritika kontra e trato ku trahadonan lokal ta hañando serka miembronan Hamaiko dje Task Force ku nan a importá, e hotel a organisá un fiesta ku sentenares di trahadó i nan yunan gosando di a organisá ‘back to school’.
Mas o ménos 400 mucha i nan mayornan a disfrutá di un dia ku aktividatnan pa fomentá mas union nèt promé ku skol kuminsá.
Na mes momentu e muchanan a risibi tas pa skol ku durante di e promé feria di ‘back to school’ organisá pa Sandals Royal Curaçao.
Di akuerdo ku reportenan, muchanan kontento tabata partisipa na aktividatnan plasentero.
Empleadonan di Sandals i nan yunan a wòrdu malkriá ku alimento saludabel, snèk i sufisiente kos di bebe ku managernan di e resort mes a sirbi ne trahadónan.
E loke e Relashonista di Sandals a relata ta pinta un kuadro kompletamente diferente ku loke por a skucha ayera na emisoranan lokal kaminda representantenan di varios sektor sosial di pais tabata denunsia e trato di katibu ku ta apliká kontra nan. Denunsianan di intimidashon seksual, maniobranan pa atverti trahadonan ku nan a hasi kos robes, a denunsia ku ta kita nan oloshi for di nan pa nan no sa ora a keda ekspresá den e programanan di radio lokal.
Hasta e direktor interino di SOAW a splika ku si nan haña denunsia di maltrato di trahadó nan lo drenta e hotel pa papia ku gerensia sin importá ku ta tres siman promé mester traha sita ku gerentenan.
Kurioso tambe tabata ku ningun trahadó a ekspresá nan mes den e komentarionan na radio pero esei ta masha normal i ta pa evita represaya. E relato dje evento ku e Relashonista a divulgá a splika ku e trahadónan tabata kontentu.
Loke sí mester bisa ku tin trahadó ku a bisa ku e evento tabata un gesto sumamente bon di parti di Sandals.
Banda di e evento di back to school pa trahadónan ku tin yu, Sandals i Sandals Foundation a sera akuerdo ku fundashon Jireh pa entrega di tas pa skol ku kontenido na alrededor di 100 mucha den komunidat di Kòrsou.

 

 

Continue Reading

Lokal

Den e promé 7 lunanan…… Kòrsou a surpasá e kantidat di turista risibí aña pasá

Published

on

By

WILLEMSTAD- – Ofisina di Turismo di Kòrsou (CTB) ta raportá un kantidat di 275.799 turista di estadia den e promé 7 lunanan di aña 2022.
E kantidat di turista di estadia registrá ya a surpasá e kantidat risibí na 2021 na momentu ku un total di 265 mil turista di estadia a bishitá Kòrsou.
CTB ta mirando un kresementu ekselente den kantidat di turista di estadia, spesialmente for di e paisnan for di kua nos ta risibí mas tantu turista esta; Hulanda i Estádos Unídos.
Tur dos merkado ta mustrando un prestashon sólido den e promé 7 lunanan di 2022. Huntu e merkadonan menshoná ta responsabel pa 70% di e kantidat di turista di estadia risibí e último periodo.
Un total di 146.038 bishitante, esta 53% a keda risibí for di Hulanda miéntras for di Estádos Unídos un total di 47.544 esta 17% a bishitá nos pais entre yanüari pa yüli 2022.

Yüli 2022
Na luna di yüli un kantidat di 48.246 turista di estadia a keda risibí lokual ta 11 mil turista mas ku e kantidat risibí na yüli 2019 na momentu ku Kòrsou a risibí 37.249 turista di estadia. Ta e promé biaha ku CTB ta raportá 48 mil turista durante e luna di verano.

Total e bishitantenan aki a keda 501.382 anochi riba Kòrsou durante luna di yüli kual ta un averahe di 10.3 anochi pa bishitante.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login