Djadumingu tabata fiesta parokial di Misa di San Willebrordus. Nos Obispu no tabata na Kòrsou pa kual motibu e pastor di misa di San Willebrordus, Israel Gonzales a hasi e misa asistí pa dos diakono Sr. Richard Colastica i Sr. Richard Engelhardt.
Pastor Gonzales a dediká basta atenshon riba e figura di e santu ku ta karta nòmber di e misa. Un faseta hopi importante den bida di Willebrordus tabata ku e a bandoná tur kos pa dediká su mes na evangelisashon. Kada aña misa ta nombra dos baluarte i e aña aki no tabata otro.
E promé baluarte tabata Sr. Carlos Cayoochi Schoot kende ta hasiendo masha hopi pa misa di San Willebrordus i sigur sigur e meresé e konsiderashon pa ta baluarte. Den su palabranan di gradisimentu e a trese padilanti ku no ta e so a hasi tur trabou pero ta un team di hende tabata responsabel pa tur lokual a wòrdu hasi na e misa. Pastor Gonzales a entrega na Sr. Carlos Schoot un bunita opsekio na nòmber di Parokia di San Willebrordus.
E di dos persona ku a wòrdu pone atenshon na dje i tambe ta un baluarte di parokia ta Milangela Jonge kende ta dirigí e kor di Parokia ku ta Kor Hesus Debino Niño di San Willebrordus. E persona aki ta traha dia i anochi na formashon di e kor i tambe ta hasi su máksimo esfuerso pa Willebrordus tin un Kor ku sigur ta representativo. Milangela mes a kanta den diferente kor i ta dominá e arte di kantamentu hopi bon. Ta di apresiá ku e ta purba pasa su talento pa nos hubentut pa asina tin relevo. E tambe a haña un opsekio serka Pastor komo baluarte di San Willebrordus.
No por keda sin menshoná ku misa tabata masha bunita dòrna i esaki tabata den man di e hóben Clinton Gosepa.
Ta algu masha bunita pa mira kon parokianonan ta uni forsa pa hasi di nan misa algu bunita, apesar di e rekursonan skars di finansa ku ta eksistí.
Despues di misa tur presente a haña algu di kome i bebe i tur presente por a regresá kas kontentu ku nan a selebrá di un manera digno fiesta di nan patrono San Willebrordus.
Un felisitashon na un i tur ku a kooperá pa e Djadumingu a bira un éksito. Riba e potrètnan por mira kon e mainta a transkurí.

Skibi pa Anthony Haile