Willemstad – Awe 12 di mei ta marka e fecha di nasementu di fundadó di Enfermeria moderno, Florence Nightingale. Ta p’esei, rònt mundu, awe ta para ketu riba e fecha aki ku mundu di Enfermeria ta selebrá. Aki na Kòrsou no ta diferente, pasobra nos tambe ta para ketu i reflekshoná un biaha mas riba e trabou ku Enfermeronan ta hasi, sigur den e pandemia aktual. Tur aña di nobo tin konferenshanan internashonal, kaminda ta selebrá Dia Internashonal di Enfermeria i ta enfoká riba e kontribushon ku nan ta duna na salubridat i komunidatnan rònt mundu den e tempu difísil aki.

E fecha di awe tin un signifikashon fuerte, ya ku ta e fecha di nasementu di talbes un dje Enfermeronan di mas famoso na mundu, esta Florence Nightingale. E dia internashonal aki ta keda uzá pa selebrá, pero mas ainda, pa gradisí tur Enfermero na mundu ku ta yuda pashèntnan ku ta sufriendo di diferente malesa i en partikular COVID-19. Mas ku un aña nos Enfermeronan ta dunando tur ku tin pa yuda e tantisimo pashèntnan di COVID-19 i hopi biaha eksponiendo nan mes i nan famia. Durante e programa di bakunashon, henter Kòrsou por a mira tambe e dedikashon ku tantisimo Enfermero tabata hasi nan trabou. Tur esaki ku e meta pa yuda hende i yuda pais Kòrsou enfrentá e pandemia ku tin henter mundu den su gara.

Awe dia 12 di mei 2021, por bisa ku na Kòrsou tambe nos tin masha hopi Florence Nighingale, pasobra nos sa ku e atenshon, e dedikashon i e amor ku kada un Enfermero di Kòrsou ta duna, ta un aporte sigur pa yuda e pashènt i su pais. Ministerio di Salú, Medio Ambiente i Naturalesa awe ta uni su mes pa manda un palabra di felisitashon pa tur ku ta laborá den Enfermeria awe riba nan dia. Huntu nos mester traha pa sigui mehorá kuido aki na Kòrsou. Durante e pandemia aki Kòrsou su Enfermeronan a demostrá ku nan ta di un kalidat haltu i a demostrá ku nos no ta baha kabes pa ningun otro pais. Pabien na tur ku ta laborá den Enfermeria, riba Dia Internashonal di Enfermeria 2021.