“M’a práktika e deporte di softball den mi bida, pero no asina hopi!
Mi ‘Grandinan’ no tabata ke pa nos keda muchu lat riba kaya”.
“Un tempu ma hunga bala den veterano ku e tim di ‘Guante de Oro’ “.
Na palabra Sra. Fanny Bonifacia dirigente di baseball Little League di Buena Vista pa mas ku 35 aña.
…Fanny Ta Yega
Buena Vista…
Fanny ta konta ku su yu hòmber tabata train baseball serka Frank Curiel i sintá ta mira training, Sr. Freddy Isidora (dfm) a yega veld i a aserke.
Sr. Freddy tabatin 7 mucha di Buena Vista i e tabatin mester di 8 mucha pa por forma un tim di 15 hungadó. Fanny ta splika ku su yu hòmber no a haña chèns, paso Frank tabatin hopi mucha i asina e la bai ku un par di mucha pa sera ocho hungadó pa djòin e tim di Freddy di Buena Vista.
Esei a pone ku Fanny a yega tereno di Buena Vista kaminda el a topa tambe ku e dirigente dje bario: Wilson ‘Willy’ Pedro. Willy tabata train poko mucha futbòl.
Fanny a tuma e brio pa papia ku Willy pa mira ku e lo por haña algun mucha pa hunga baseball.
Willy a yama e muchanan i puntra nan ku nan ke hunga baseball, i ku si nan ta deseá, nan por train ámbos deporte. Tabata na aña 1986 ku Fanny e orei a kuminsá train muchanan di Buena Vista di edat di 6 pa 10 aña baseball.
Asinaki Buena Vista asina a start ku tim di Liga Vruminga.
…Promé Biaha
den Kampeonato…
Tabata na 1987 ku Fanny pa promé biaha a bai kampeonato di Liga Vruminga ku e Tim di Buena Vista, hungando bou di nòmber di: F.E.C.K. ku ta: Fondo Empresarial pa Komunidat.
Den e tim tabatin mucha muhé nan tambe.
Hungadónan femenino ku a start ku Fanny tabata: Emily Jonis, Solange, “Chola” Soleana, Sulay Curiel i Enigilda Valeriano.
Kosnan a sigui desaroya den Buena Vista i despues di a lanta Liga Vruminga, a sigui e otro kategorianan manera: Little-, Junior- i Senior-League. “Hopi mucha a pasa den Buena Vista”, Fanny ta rekordá.
E ta menshoná nòmbernan di: “Shai” Martis i ruman Rainer, tambe: Quincy Asencion ku a hunga te ku Little League, Jerseyval Cathlin, Shendell Ible (Yu di Chikí Martijn), Lisandro i Urvin Martina, Otis Wilson, Haibert i Reggie Antonia, Dioshenè Van Thijs i hopi mas.
Fanny a kuminsá ofisialmente na 1987 i pa 2021 ta 35 aña riba tereno ku muchanan di Buena Vista.
…Hopi kambio
den mucha…
E popular “coach” ta bisa ku durante aña nan e la eksperensia hopi kambio.
E muchanan su karakter a kambia.
“Ántes bo tabata rabia ku un mucha i mand’é kas, pero su siguiente training e ta e promé pa yega veld.
E rèspèt tabata tei.
E muchanan tabata rabia, pero bo por a papia ku nan. E muchanan di awendia a bira muchu mas difísil pa traha kune”, Fanny ta añadí.
…Buena Vista no
ta un bario Fásil…
Fanny ta rekonosé ku Buena Vista no ta un bario fásil, pero ku ta abo komo “coach” mester sa kon pa anda ku e muchanan.
Fanny ta biba na Juan Hato i mester a sali tur dia for di Juan Hato pa bai Buena Vista pa duna training. E ta kòrda ku tabatin momento ku outo tabata dañá kune i e tabata kana na pia for di Juan Hato pa Buena Vista ku bate i bala.
Tin biaha e tabata bai kas bèk na pia.
Fanny ta rekonosé ku no tabata fásil haña “coach” pa yuda na Buena Vista.
Tin tabatin bin, pero no tabata keda.
Otro ta yega i bisa ku e tim aki no ta sirbi, i tabata bai, e ta rekordá.
…Fanny ku Vários
Selekshon…
Komo “Coach” Fanny Bonifacia a bai afó ku vários selekshon di baseball di mucha.
Na 1992 el a bai Mexico ku e selekshon di Little League huntu ku Frank Curiel.
Ántes bo tabatin 1 Manager i 1 “Coach”. Den e selekshon di 1992 tabatin hungadónan manera: Shendel Ible, Diegomar Markwell, Gerswin Celestina, Yurendell de Caster, Rydell Isabella i Mirieldo Trinidad. Na 2003 Fanny a bai ku selekshon di Senior League Panamá kaminda nan a bira kampeon.
E Manager tabata “Payo” Faneyte.
Tambe Fanny a bai mundial di Senior League na e siudat di Bengor.
Na aña 2009 Fanny tabata Manager di e selekshon kategoria Little League ku a hunga aki na Kòrsou. Eldrid Estanista tabata su “Coach”.
E ta rekordá ku nan tabatin un pre/selekshon di 33 mucha, i mester a yega na 14 hungadó.
Pa Fanny loke hamas e ta lubidá ta dia nan a bira kampeon na Panamá. Hopi dushi !!.
E ta lamentá te ku dia di awe ku nan no a bira kampeon mundial na e siudat di Bengor, Estádos Unídos na 2003.
…Bai Kurso..
Fanny su rekomendashon na tur “Coach” ta pa ki ora ku tin kurso di “coaching” na Kòrsou pa nan bai. “Ora bo bai bo ta haña muchu mas konosementu.
M’a bai tur lès.
Nunka bo no ta stòp di siña”, e ta rekordá. Tambe e ta kòrda riba Sr. Robert Coffie (dfm).
Nos deporte mester di sikólogo i tambe trahadó sosial. Tin hopi trabou, Fanny ta rekonosé.
…Idea ta hopi “Leuk”…
Fanny ta haña e idea pa hasi algu p’e hopi “leuk”, sigur pasó e idea ta bin di su muchanan mes.
Natural m’a keda kontentu, bo ta sinti ku bo no a hasi tantu esfuerso pòrnada.
E ta kòrda ku e tabata kuminsá 3or di mèrdia den un igra di Solo, i ta kaba 8or di anochi.
Tin biaha mester a para warda pa nan bin buska mucha.
Tabatin dia ku outo a daña i no tabatin niun hende pa duna bo un “kabes di boto” hiba bo kas.
Entre e momentonan di mas grandi pa Fanny tambe tabatin triunfo vs Frank Curiel i otro vs e tim di “Shon-Ki” Nicasia (dfm), nan tabata bon semper i un triunfo kontra di Sta. Maria o Marchena tabata inmenso, e gran Fanny ta rekonosé.
…Homenahe pa
“Coach Fanny”…
Djasabra dia 24 di yüli na parke di Buena Vista lo bai tin un homenahe pa Sra. Fanny Bonifacia, o “Coach” Fanny.
Ta kuminsá for di mainta ku weganan di sòftbòl entre eks muchanan di Fanny.
I pa 2or pm lo tin e seremonia ofisial. Lo tin un MC pa animá i pa 8or di anochi lo klousura e aktividat.
Nòmber: Fania Bonifacia, alias “Fanny”
Kasá ku: Bernardino, “Jopi” Bonifacia.
Yu (nan): Istel i Nardino. 1 Ñeta.