Kòrsou ta riku na un Sentro di Resiklahe mas. E biaha aki ta Esperamos Supermarket na Jan Noorduynweg. Na e lokalidat nobo aki tur hende por depositá bòter di plèstik, baki, dòpi i bleki di aluminio grátis. Di e forma aki por resiklá esakinan i krea un produkto nobo.

E kònteiner pa kolektá dilanti porta di Esperamos Supermarket ta resultado di un kolaborashon entre Curaçao Beverage Bottling Company (Coca-Cola) i Esperamos Supermarket. E dos kompanianan aki a pone man huntu pa kontribuí na tene nos isla limpi i yuda krea konsientisashon serka e konsumidó ku por resiklá tur bòter di plèstik òf bleki di aluminio.
“Na Coca-Cola nos ta haña importante pa konsientisá tur hende di e importansia di resiklahe i kon un bòter bashí, bleki òf tapa tambe tin balor. Tur produkto ku nos ta produsí lokal ya kaba ta trahá di 50% di material resiklá. Resientemente nos a hasi nos tapanan mas chikí di moda ku nos ta usa 20% ménos plèstik i den su totalidat e bòter ta ménos pisá. Awor ta ora pa hasi resiklahe mas fásil pa konsumidó”, segun Myrthe George-Verhulst, Marketing & Sustainability Manager di Coca-Cola. Nos ta orguyoso di e kolaborashon ku Esperamos Supermarket i ta spera ku mas kompania tambe ta kontribuí na un medio ambiente mas limpi riba Kòrsou”.

“Esperamos tin mas ku 50 aña un pilá den Sta. Maria, pero apesar di su historia largu den e besindario aki, semper a fihá su bista inovativo riba futuro. Por ehèmpel den uso di energia bèrdè ku ta generá for di nos propio panel solar, e promé punto públiko di karga EV riba e isla (D-Point) i awor tambe e promé sentro di resiklahe na Sta. Maria”, segun e entusiasmá Marketing Manager di Esperamos, Marjolein Verlinden.
Den e sentro di resiklahe aki, meskos ku na e otro lokalidatnan na Kòrsou, konsumidónan por depositá bòter di plèstik di e tipo di plèstik number un (PET), bleki di aluminio i plèstik tipo number dos (HDPE). Di e tipo number dos (HDPE) ta traha dòpi di plèstik i tambe hopi biaha artíkulonan di limpiesa i paki di lechi di plèstik di e material aki.