Connect with us

Katoliko

DI BINTITRES DJADUMINGU SIKLO B

Published

on

Promé Lektura : Isaias 35, 4-7
Salmo : Salmo 146, 7-10
Di dos Lektura : Hakobo 2, 1-5
Evangelio : Marko 7, 31-37

Poder kurativo di Dios

Dios, ku a krea universo “i a mia ku tur kos tabata bon”, ta sigui fiel na su proyekto di salú i salbashon, apesar di e falta di armonia ku malisia humano a trese pa nos historia.
Hopi di e maldatnan ta sosodé pa kulpa humano, pasobra tin be nos ta aktua kontra e plan di Dios. Naturalesa ta venga su mes, por ehemplo, di sierto abusunan di urbanisashon i di e trato konfuso di biennan natural (rikesa minero, kapa di ozon…). Edifisionan, brùgnan i tùnelnan tin be ta faya pasobra tabatin negligensia den nan konstrukshon. Diferensianan skandaloso rikunan i pobernan ta debí na e ambishon i inhustisia di hopi, ku no ke sa nada di e plan di distribushon rasonabel ku Dios a pensa pa e biennan material di e mundu akí.
Sea loke sea, Dios ta sigui keriendo bienestar i salú pa tur hende, apesr di nos fayonan. Manera Isaias a anunsiá, e salmo a ripitié i nos a mira ku e ta kumpli den Hesus, Dios ke pa e siegunan rekobrá e lus, e surdunan e oido, mudanan e papia, esnan koho: agilidat, esnan den desierto: awa. Ta sigui siendo bèrdat loke e profeta a bisa: “ No tene miedu, boso Dios ta biniendo; E mes ta bin libra boso.”. Dios ta orientá tur kos pa nos bon i ta saka bon inkluso di maldatnan i desgrasianan. Manera e deportashon di e pueblo di Israel, fruta den gran parti di e inkompetensia polítiko di su dirigentenan.
E poder kurativo aki di Dios ta ser manifestá plenamente na nos den Hesus. Kuantu be E ta aparesé a lo largu di e evangelio komo esun ku ta sana enfermonan, ta resusitá mortonan, ta dominá naturalesa i ta liberá e persona humano integralmente! Hesus ta kura e hende den su totalidat, no únikamente su enfermedat. En bèrdat, manera e hendenan den e episodio di Sidon ta bisa, “El a hasi tur kos bon”: ‘ E ta laga surdu tende i ta laga muda papia”, òf, manera resumí Pedro den su katisashi: “ E tabata pasa hasi bon obra tur kaminda i kura esnan ku tabata bou di yugo di diabel, pasobra Dios tabata kunÉ” (Ech 10,39).
Nos no sa na kontestá e pregunta di kon ta konsiliá maldat ku tin den mundu i e bondat di Dios. E ta un pregunta ku ya a ser hasí di forma vigoroso den e buki di Yob i ku te ainda ta relevante. Manera tambe a surgi den e “maldat” pa antónomasia, ku tabata e morto inhustu di Hesus, su Yu, riba krus. Einan tambe tabatin e pregunta: “dikon bo a bandoná mi?”. No tabatin kontesta rasoná. Tabatin resurekshon. Nos no sa na kontestá e problema. Pero Dios, sí.
Iglesia ta sigui kurando
Esun Resusitá awe ta sigui kurando humanidat atraves di su Iglesia. Durante dos mil aña, e komunidat di Hesus a dediká su mes, no únikamente na prediká e Palabra i pordoná pikánan, sino tambe na kura enfermonan, atendé esnan pober i marginá, lucha kontra tur opreshon i inhustisia, traha pa e liberashon integral di e persona.
E ta un tarea den kua nos tur mester sinti nos mes komprometé, no únikamente e ministronan ordená sino tur fiel, kada un riba su tereno di akshon.
Di un manera espesial Iglesia ta hasi e liberashon i poder kurativo atraves di sakramentunan. E gestonan sakramental, mashá paresido na esnan ku Hesus a utilisá -imposishon di mannan, kontakto ku e man, huntamentu ku olio i krisma, baño den awa- huntu ku e palabranan desisivo ku e ministro ta pronunsiá, den nòmber di Kristu i den virtut di e Spiritu, ta e signo efikas di kon Dios ta sigui aktuando den e mundu di awe.
E milager di awe ta kòrda nos riba Boutismo, pasobra un di e signonan komplementario ku kua te ekspresá e efekto spiritual di e sakramentu aki ta presisamente e rito di “effetá”, den kua e ministro ku e dede ta mishi ku orea i boka di esun ku ta ser batisá i ta bisa: “e Señor Hesus, ku a lga surdunan skucha i mudanan papia, ta konsedé abo i, na su tempu, pa skucha e Palabra i proklamá e fe, pa alabansa i gloria di Dios Tata”.
Un kristian mester tin e oreanan habri pa skucha e e boka pa papia. Pa skucha tantu Dios komo otronan, sin bira surdu ni na e Palabra di salbashon ni na e komunikashon ku e próhimo. Pa papa tantu na Dios komo na otronan, sin keda ketu den orashon ni den e diálogo ku e rumannan ni den e testimonio di nan fe.
Nos por apliká e tarea kurativo na nos mes. Promé ku tur kos, pa pensa si Hesus, òf Iglesia, lo mester kura nos mes di algun klase di ta surdu òf di ta muda boluntario. Tin be nos mester skucha e Palabra di Dios i nos ta hasié ku sufisiente atenshon. Tin be nos lo mester alabá Dios ku nos palabranan i kantikanan i tambe papia ku nos rumannan ku palabranan oportuno i nos no ta hasié.
Ademas, nos lo mester puntra nos mes si nos ta ehersé e mishon di kura otronan. Sin nesesidat di hasi milagernan, Nos ta kapas na yuda esnan siegu, e personanan ku no ta mira òf no ke mira, p’asina ku nan sa kua ta e kamindanan di Dios? I esnan surdu, e personanan ku no ta skucha òf no ke skucha, p’asina ku nan ta skucha e mensahe di salbashon di Dios? Òf esnan muda, e personanan ku no por òf no ke papia, p’asina ku nan lenga ta los i na ta bolbe papia den momentonan oportuno?

Continue Reading

Katoliko

Papa Francisco: Futuro saserdotenan mester ser evaluá integralmente

Published

on

By

Papa Francisco a bisa djabièrnè ku ora un persona ta konsiderá e vokashon saserdotal, ta nesesario evalu’é integralmente pa por tin saserdotenan ku ta kapas pa komuniká e bondat di Dios.
Asina e Tata Santu a indiká dn e Palasio Apostóliko di Vatikano, den e oudiensia konsedé na e formadornan di e Seminario Arzobispado de Milán (Italia), na okashon di e di 150 aniversario di e revista “La Scuola Cattolica” (E Skol Katóliko).
“Ora ta diserní si un persona por inisiá òf konsiderá un rekorido vokashonal, ta nesesario investig’é i evalu’é di moda integral”, Papa Francisco a splika den su diskurso djabièrnè 17 di yüni.
Den e sentido akí, el a kontinuá, “mester tene kuenta ku nan moda di biba afektonan, relashonnan, espasionan, ròlnan, responsabilidatnan, asina manera debilidatnan, temornan i desekilibrionan”.
“Henter e trayekto mester aktivá prosesonan ku ta buska na forma saserdotenan i esnan konsagrá madurá, ekspertonan den humanidat i serkania, i no funshonarionan di lo santu”, Papa Francisco a enfatisá.
Pa esaki, e Tata Santu a resaltá, “superiornan i formadornan di e seminario, esnan ku ta kompañá nan i e personanan den formashon ta yamá na krese diariamente na e plenitut di Kristu p’asina ku, atraves di e testimonio di kada un, e karidat di Kristu ta manifestá su mes mas klaramente”.
Papa Francisco tambe a bisa e formadornan ku “e seminaristanan i hóbennan den formashon mester por siña mas di boso bida ku di boso palabranan, nan mester por siña e bondat di boso obedensia, e trabou di boso dedikashon, e generosidat ku esnan pober di boso sobriedat i disponibilidat, paternidat di boso afekto kasto i no posesivo”.
“Nos ta konsagrá pa sirbi e Pueblo di Dios, pa atendé ku e heridanan di tur hende, kuminsando ku esnan mas pober”, Papa a enfatisá.
Mundu, Papa Francisco a kontinuá, “mester di saserdotenan kapas pa komuniká e bondat di Señor na esun ku ta eksperimentá piká i frakaso, saserdotenan eksperto den humanidat, pastornan dispuesto na kompartí alegria i sufrimentu di e rumannan, hòmbernan ku sa na skucha e gritu di esnan ku ta sufri”.
Renobashon i kuido di vokashonnan
E Tata Santu tambe a dediká un momento di su reflekshon na renobashon di vokashonnan saserdotal.
“Renobashon i futuro di vokashonnan ta posibel únikamente si tin saserdotenan, diákononan, esnan konsagrá i laikonan bon formá”, Papa Francisco a enfatisá.
“Kada vokashon partikular ta nase, krese i ta desaroyá su mes den kurason di Iglesia, i esnan ‘yamá’ no ta manera padestul ku ta aparesé diripiente. E mannan di Señor, ku ta duna forma na e ‘barinan di klei’, ta operá atraves di e kuido ku pasenshi di formadornan i kompañantenan.
Na nan, Papa Francisco a sigurá, “ta konfia e servisio delikado, eksperto i kompetente pa kuida e nasementu, e kompañamentu i disernimentu di vokashonnan, den un proseso ku ta rekerí hopi bondat i konfiansa”.
Servisio di teologia
E Tata Santu tambe a papia di e importansia di teologia i di e nesesidat pa por tin personanan kapas pa splika esaki na e mundu di awe.
E komunidat “mester di trabou di esnan ku ta buska na interpretá fe, tradusié i bolbe tradusié, pa hasié komprensibel, pa eksponé ku palabranan nobo: un trabou ku lo mester bolbe hasié di nobo ku kada generashon”.
Ta pesei, “Iglesia ta enkurashá i ta sostené e esfuerso aki, e difikultat pa bolbe definí kontenido di e fe den kada époka, den e dinamismo di e tradishon”.
Den e sentido akí, Papa Francisco a kontinuá, “e lenguahe teológiko semper mester ta bibu, dinámiko, e no por hasi otro ku evolushoná i preokupá su mes pa hasi su mes komprendibel”.
Papa ademas a mustra riba e papel iluminador di teologia den e mundu aktual kaminda a pèrdè sentido di kosnan.
“Un di e problemanan mas grandi di nos tempu ta en efekto e pèrdida di sentido. Teologia, awe mas ku nunka, tin e gran responsabilidat pa stimulá i orientá e búskeda, pa iluminá e kaminda”.

Continue Reading

Katoliko

Historia di dia di Tata

Published

on

By

Irónikamente, kreashon di dia di Tata, finalmente, a keda inspirá de un predikashi riba dia di mama. Na 1909, Sonora Smart Dodd de Spokane, Washington, a skucha un predikashi i a duna kuenta di ku su tata a meresé homenahe similar. E tabata Henry Jackson Smart, kunukero i veterano di guera sivil, kende a kria Sonora i su sinku yunan chikí despues di ku su esposa lo a muri dor di komplikashonnan durante nasementu di su di seis yu.
Sonora tabata ke un dia spesial pa su tata lo a sa kantu e tabata apresiá su amor i apnegashon, asina manera e sakrifisionan ku el a realisá komo tata soltero. Dia 19 di yüni 1910, riba dia di kumpleaño di Henry, Sonora a festehá e dia di Tata pa di promé bia na Spokane. Na 1924, Presidente Calvin Coolidge a apoyá públikamente e dia Nashonal di Tata. Finalmente, na 1966, Presidente Lyndon Johnson a firma un resolushon pa kombertí Dia di Tata den dia festivo nashonal. Seis aña mas lat, presidente Richard Nixon ta kombertié den lei permanente pa festehá dia di Tata riba e di tres djadumingu di yüni.
Sin embargo, e selebrashon akí ta varia di fecha den diferente pais di mundu. Algun ta konservá e di tres djadumingu di yüni, manera ta mayoria di e paisnan latinoamerikano, miéntras ku otronan ta preferá hasié dia 19 di mart, dia di San Hosé, manera ta e ehèmpel di Bolivia, Spaña i Honduras

Continue Reading

Katoliko

Di Shete Djadumingu di Pasku di Resurekshon

Published

on

By

Promé Lektura : Hechonan di apòstelnan 7, 55-60
Salmo : Salmo 97, 1-2. 6-7. 9
Di dos Lektura : Revelashon 22, 12-14. 16-17. 20
Evangelio : Huan 17, 20-26

E evangelio di awe ta ofresé nos un bunita okashon pa meditá den unidat. E ta bin ta ripití den e último añanan akí ku mundu ke logra integrashon kada be mas grandi entre pueblo i individuonan.Pa medio di FE nos sa ku moveshon di historia ta bai kondusiendo nos na realisashon di e soño asina largu sperá, e union den un solo famia. Nos tur ta anhelá un edat den kua no tin divishon i ku riba tera ta kuminsá un era di pas i di hermandat. Kristu den e ora mas solèm di su bida a resa pa unidat di hende: “Pa tur hende sea un.”
Uni hende ku otro i ku Dios ta e ideal i trabou di Iglesia. Pa e ideal akí si ta bal la pena inbertí tur nos energia. Pero promé laga nos mes un pregunta: Kiko ta unidat? Biba den unidat no ta nifiká pensa igual, sinti mesun kos, ku ta uni tur ser humano den un uniformidat laf i steril. Dos esposo sa ku ta uní no ta nifiká ku kada un mester pèrdè su personalidat. Unidat no ke men renunsiá na nos manera di pensa. Tampoko e ta nifiká semper keda ketu o keda sin defendé konvikshonnan propio.. Kiko e ora ei ta unidat ? Lo splik’é ku un frase hopi ripití, pero berdadero. Unidat ta e armonia kreá di diversidatnan. San Pablo ta splika e konsepto akí ku e imágen di e kurpa humano. “Ta un hecho ku e kurpa, siendo un, tin hopi parti , pero e partinan maske ku nan ta hopi, ta forma entre tur un solo kurpa”. Nos kurpa ta papiando ku nos di un maravioso unidat konstruí a base di diversidat. Ta logra e armonia akí pasobra tur parti di e kurpa ta traha, ta move, ta aktua den funshon di e konhunto.
Sosiedat ta konsistí di un variedat riku di hende. Tin múltiple rasa, lenga i kultura. Kada un ta poseé su propio rikesa.
Pa biba den unidat laga nos kuminsá na aseptá e diversidat ku ta eksistí den mundu. Nos no ta pretendé di biba den un paraiso irealístiko kaminda tur hende ta pensa igual i ta kana riba e mesun kaminda. Laga nos aseptá e desafio pa biba e unidat den e diversidat, pa logra armonia atraves di rèspèt pa variedat. Laga nos ta outéntiko den nos manera di pensa i di aktua i laga nos respetá e forma personal di pensa i di aktua di kada persona, semper i kuando esaki no afektá e bon komun.
Ta logra armonia ora kada hende kontribuí na e bon komun. E dos palabranan aki: bon komun, ta esnan ku mester inspirá nos akshonnan. Ora e interes personal i egoista ta pone su mes dilanti di e bon komun, e ora ei unidat i konkordansha ta kibra.
Kristu, ora e ta resa pa unidat, no ta pensando únikamente den un unidat horizontal, ke men di hende entre un ku otro. “Ku nan tambe ta ku nos”, Hesus a pidi den su orashon na Tata. En bèrdat, no por tin union duradero entre hende si Dios no ta e laso ku ta uni nos.

Sinembargo, kon difísil ainda ta e unidat entre kristiannan. No ta nesesario mira pafó i haña un mundu den guera konstante pa konkluí kon difísil ta di biba den unidat. Ta sufisiente pa nos mira un poko paden di nos mes pa deskubrí den nos propio sentimentu e rais di un divishon profundo. E rais akí ta nos egoismo.
Nos sa ku egoismo ta un forsa ku nos tur ta dirigí t’e na nos propio satisfakshon. Nos por bisa ku komo ser humano nos ta lèn den direkshon di egoismo, pero komo kristian nos mester obra ku amor. Stima ta nifiká sali di nos mes pa proyektá nos mes den direkshon di otro. Ora nos logra konvensé nos mes di e forsa konstruktivo ku amor ta enserá, únikamente e ora ei nos lo kuminsá traha riba e bon komun.
Den eukaristia kada djadumingu, nos ta selebrá e unidat di e famia kristian. Un solo Señor, un solo fe, un solo boutismo, un solo Dios I Tata. Tur loke tin den misa ta papia ku nos di unidat: altá ta e mesa di famia, kaminda komo ruman nos ta sinta pa kome di e mesun pan i pa bebe di e mesun biña. Ku ora nos sali di e tèmpel akí nos bai na praktiká e unidat i komunion ku nos a bin pa selebrá bibando den rèspèt mutuo i den amor, promoviendo e bon komun.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login