Connect with us

Katoliko

DI BINTIKUATER DJADUMINGU SIKLO B

Published

on

Promé Lektura : Isaias 50, 5-9a
Salmo : Salmo 116, 1-6, 8-9
Di dos Lektura : Hakobo 2, 14-18
Evangelio : Marko 8, 27-35

Ken Hesus ta pa nos?

E pregunta tabata kontinuamente presente den e kapítulonan anterior di e evangelio: ken esaki ta? Esaki no ta e karpinté? Ken esaki ta pa pordoná pikánan? Ta ki sorto di hende e hòmber akí ta. Asta bientu i laman ta tende di djE? Awor e pregunta ta mas eksplísito i Hesus mes ta hasié: “ken e hendenan ta bisa ku Mi ta?”. I, mes ora, mas direktamente: “i boso mes, ken boso mes t bis ku Mi ta ?”.
Nos a bai ta lesando den e kapítulonan anterior algun reakshon masha varia dilanti e persona, e doktrina i aktuashon di Hesus: for di e insensibilidat, e atmirashon i alabansa te na e persekushon i e desishon di elimin’é. Awor, den Pedro, e reakshon aki ta yega na e akto di fe, na e profeshon di ku E ta e Mesias, Esun untá di Dios, esun sperá, por tantu, durante tantu siglo. E ta tambe un pregunta klave awe: ken Hesus ta pa e hendenan? Ken E ta pa nos, p’ami ? Fe den Kristu ta eksigí un opshon personal.
Tambe awe nos pos konstatá ku tin henter un abanico di postura i interpretashonnan di e figura di Hesus. Huntu ku esnan ku ta rechas’É òf no ta kere den djE òf simplemente ta ignor’É, tin esnan ku ta atmir’é komo un gran hòmber, un profeta atmirabel òf un modelo di entrega pa otronan. Pa nos seguramente E ta algu mas: E ta e Mesias, Esun untá di Dios, mas ainda, e Yu di Dios, e hòmber den kua ta biba e plenitut di divinidat. Ta pesei nos ta kere den djE, no ta stim’é, nos ta purba na siguié, pasobra E ta duna sentido na nos eksistensia.
Nos por mira den e apòstel ei ku a bira portabos di e otronan, Pedro, ku te ainda no a madurá, i ku den e Pashon di Hesus lo tin momentonan inkluso di traishon i nengashon. Pero e lo bai ta madurando, prinsipalmente dor di Pasku di Resurekshon i binida di e Spiritu, i komprondiendo Hesus mas den profundidat i lo terminá dor di entrega su propio bida pé.
Kon Hesus a komprondé su mishon di Mesias Pero tin otro paso. Nos por puntra nos mes ku sinseridat si di bèrdat nos ta aseptá Hesus den henter su profundidat, òf ku un selekshon di aspektonan segun nos smak, manera Pedro a hasié tin be. Klaru ku “nos sa” ku Hesus ta e Mesias i Yu di Dios. Pero un kos ta sa i otro, aseptá su persona huntu ku su doktrina i su estilo di bida, inkluí e krus i e entrega pa otronan.
A pasa ku Pedro, manera sigur tambe ku e otro apòstelnan, ku tabatin di e Mesias un konsepshon mas polítiko ku religioso, mas di liberashon nashonalista, kontra e romano, ku di e Reino tal manera Hesus a komprond’é. Loke a trese pa Pedro algun di e palabranan mas duru ku nos ta lesa den e evangelio: “Bai for di mi bista, Satanas! Bo ta pensa manera hende, no manera Dios!”. Ser manera Satanas ta nifiká ku Pedro, sin tabata ke esaki, tabata tentando Hesus pa E no aseptá e plan di Dios, sino ku E ta sigui e anhelonan humano ku ta buska éksito i viktoria.
Nan no a komprondé e misterio di e personalidat di Kristu. Prinsipalmente nan no a komprondé òf no tabata ke komprondé ku e kaminda di e Reino tabata e krus. Ta kla ku nan tambe, i no únikamente “e hendenan”, tabatin mester di e “sekreto mesiániko”, pasobra nan tampoko tabata madurá pa komprondé sin konfushon e anunsio di Hesus. Nan “mentalidat” (“abo ta pensa”) te ainda no a madurá. Maske e tabata uni na e anunsio di resurekshon: pero nan no a fiha den esaki, pasobra no por a drenta den nan kabes ku nan Maestro, e Mesias, por frakasá.
E no ta masokismo: doló dor di doló. Sino pasobra Dios tabata ke salba humanidat entregando su propio Yu den solidaridat ku tur hende, ku ta esnan ku lo a meresé kastigu pa nan piká. Hesus tampoko tabata gusta sufrimentu, i tabatin temor dilanti morto, i a supliká su Tata, “ku gritu i lágrima”, manera e karta na Hebreonan ta bisa, ku lo libr’é di dje. Pero El a aseptá e plan di salbashon di Dios pa solidaridat apsoluto ku humanidat. No únikamente nos mester asept’é komo Mesias, sino tambe komo e Sirbidó ku ta entrega su mes pa otronan, ku no ta bek pa esnan ku tabata dal’É òf tabata ranka su barba òf tabata ofend’é òf tabata skupi riba dje, manera nos a skucha den Isaias i nos sa, prinsipalmente, di e relatonan evangéliko impreshonante evangéliko di e Pashon.
Tuma bo krus i sigui Mi
Pedro tabata gusta loke a pasa riba e seru di Tabor i e gloria di transfigurashon, i einan e tabata ke a traha tres tènt. Pero e no tabata gusta e seru di Kalvario ku su krus. Nos ta hasi un selekshon semehante? nos tambe lo a meresé e reproche di ku “nos ta pensa manera hendenan no manera Dios”? Awe Hesus ta splika nos, p’asina ku ningun hende lo ser engañá, kiko ta nifiká siguié komo disípulo, i su palabranan no ta masha optimista: “si un hende ke sigui Mi, a) e mester lubidá su mes, b) hisa su krus c) i sigui Mi”. Ku e agregashon di ku d) “esun ku ke salba su ida, lo pèrd’é, i e) pero esun ku pèrdè su biba pa Mi i pa e Evangelio lo salba”. E ta un opshon radikal loke ta pidi e disípulo di Hesus. Kere den djE ta algu mas ku sa kosnan òf resa. E ta siguiÉ eksistensialmente. E no ta primintí éksito ni seguridatnan i ta atvertí nos ku su Reino ta eksigí un estilo di bida difísil, ku renunsia, ku krus. Mesun kos ku E no a buska prestigio sosial òf rikesanan òf e propio smak, sino e bon di tur hende, ku lo hib’é na e krus. Ya Hesus a avisá ku e kamindanan di e disípulo no por ta distinto di esun di nan Maestro.
Nos tur ta gusta mas e aspektonan di e evangelio ku ta resultá os di konsuelo, fásil pa inkorporá na nos mentalidat. Sigui Hesus ta profundamente gososo i e ta e ideal mas noble ku nos por brasa. Pero e ta eksigente. Sigur nos no ta siguié ku kálkulonan humano i komersial: “esun ku ke salba su bida…” lo ser desepshoná. Pasobra e balornan ku E ta ofresé nos ta manera e tesoro skondí, pa kua ta bale la pena bende tur pa hañ’é. E ta pidi su disípulo pa nenga su mes, hisa e propio krus i siguié riba su kaminda. Tampoko aki e ta doló dor di doló, òf e renunsia pa masokísmo; sino pa amor, pa koherensia, pa solidaridat kuné i ku humanidat ku nos tambe ke yuda na salba. E ta manera amistat i amor, ku pa ta berdadero, ta eksigí sakrifisio i renunsia.
Tur esaki tambe ta suponé den nos un gran konfiansa den Dios, manera loke e Sirbidó ta mustra kantá pa Isaías, òf e salmista den e salmo di awe i Hesus mes den e momento krusial di su entrega: “ Señor ta yuda mi, ken por deklará mi kulpabel?”, “Señor ta klemente i hustu, den berans el a salba mi”, “El a libra mi di morto”, “den Bo man, Señor, Mi ta entrega mi spiritu”.

Continue Reading

Katoliko

Papa Francisco: Futuro saserdotenan mester ser evaluá integralmente

Published

on

By

Papa Francisco a bisa djabièrnè ku ora un persona ta konsiderá e vokashon saserdotal, ta nesesario evalu’é integralmente pa por tin saserdotenan ku ta kapas pa komuniká e bondat di Dios.
Asina e Tata Santu a indiká dn e Palasio Apostóliko di Vatikano, den e oudiensia konsedé na e formadornan di e Seminario Arzobispado de Milán (Italia), na okashon di e di 150 aniversario di e revista “La Scuola Cattolica” (E Skol Katóliko).
“Ora ta diserní si un persona por inisiá òf konsiderá un rekorido vokashonal, ta nesesario investig’é i evalu’é di moda integral”, Papa Francisco a splika den su diskurso djabièrnè 17 di yüni.
Den e sentido akí, el a kontinuá, “mester tene kuenta ku nan moda di biba afektonan, relashonnan, espasionan, ròlnan, responsabilidatnan, asina manera debilidatnan, temornan i desekilibrionan”.
“Henter e trayekto mester aktivá prosesonan ku ta buska na forma saserdotenan i esnan konsagrá madurá, ekspertonan den humanidat i serkania, i no funshonarionan di lo santu”, Papa Francisco a enfatisá.
Pa esaki, e Tata Santu a resaltá, “superiornan i formadornan di e seminario, esnan ku ta kompañá nan i e personanan den formashon ta yamá na krese diariamente na e plenitut di Kristu p’asina ku, atraves di e testimonio di kada un, e karidat di Kristu ta manifestá su mes mas klaramente”.
Papa Francisco tambe a bisa e formadornan ku “e seminaristanan i hóbennan den formashon mester por siña mas di boso bida ku di boso palabranan, nan mester por siña e bondat di boso obedensia, e trabou di boso dedikashon, e generosidat ku esnan pober di boso sobriedat i disponibilidat, paternidat di boso afekto kasto i no posesivo”.
“Nos ta konsagrá pa sirbi e Pueblo di Dios, pa atendé ku e heridanan di tur hende, kuminsando ku esnan mas pober”, Papa a enfatisá.
Mundu, Papa Francisco a kontinuá, “mester di saserdotenan kapas pa komuniká e bondat di Señor na esun ku ta eksperimentá piká i frakaso, saserdotenan eksperto den humanidat, pastornan dispuesto na kompartí alegria i sufrimentu di e rumannan, hòmbernan ku sa na skucha e gritu di esnan ku ta sufri”.
Renobashon i kuido di vokashonnan
E Tata Santu tambe a dediká un momento di su reflekshon na renobashon di vokashonnan saserdotal.
“Renobashon i futuro di vokashonnan ta posibel únikamente si tin saserdotenan, diákononan, esnan konsagrá i laikonan bon formá”, Papa Francisco a enfatisá.
“Kada vokashon partikular ta nase, krese i ta desaroyá su mes den kurason di Iglesia, i esnan ‘yamá’ no ta manera padestul ku ta aparesé diripiente. E mannan di Señor, ku ta duna forma na e ‘barinan di klei’, ta operá atraves di e kuido ku pasenshi di formadornan i kompañantenan.
Na nan, Papa Francisco a sigurá, “ta konfia e servisio delikado, eksperto i kompetente pa kuida e nasementu, e kompañamentu i disernimentu di vokashonnan, den un proseso ku ta rekerí hopi bondat i konfiansa”.
Servisio di teologia
E Tata Santu tambe a papia di e importansia di teologia i di e nesesidat pa por tin personanan kapas pa splika esaki na e mundu di awe.
E komunidat “mester di trabou di esnan ku ta buska na interpretá fe, tradusié i bolbe tradusié, pa hasié komprensibel, pa eksponé ku palabranan nobo: un trabou ku lo mester bolbe hasié di nobo ku kada generashon”.
Ta pesei, “Iglesia ta enkurashá i ta sostené e esfuerso aki, e difikultat pa bolbe definí kontenido di e fe den kada époka, den e dinamismo di e tradishon”.
Den e sentido akí, Papa Francisco a kontinuá, “e lenguahe teológiko semper mester ta bibu, dinámiko, e no por hasi otro ku evolushoná i preokupá su mes pa hasi su mes komprendibel”.
Papa ademas a mustra riba e papel iluminador di teologia den e mundu aktual kaminda a pèrdè sentido di kosnan.
“Un di e problemanan mas grandi di nos tempu ta en efekto e pèrdida di sentido. Teologia, awe mas ku nunka, tin e gran responsabilidat pa stimulá i orientá e búskeda, pa iluminá e kaminda”.

Continue Reading

Katoliko

Historia di dia di Tata

Published

on

By

Irónikamente, kreashon di dia di Tata, finalmente, a keda inspirá de un predikashi riba dia di mama. Na 1909, Sonora Smart Dodd de Spokane, Washington, a skucha un predikashi i a duna kuenta di ku su tata a meresé homenahe similar. E tabata Henry Jackson Smart, kunukero i veterano di guera sivil, kende a kria Sonora i su sinku yunan chikí despues di ku su esposa lo a muri dor di komplikashonnan durante nasementu di su di seis yu.
Sonora tabata ke un dia spesial pa su tata lo a sa kantu e tabata apresiá su amor i apnegashon, asina manera e sakrifisionan ku el a realisá komo tata soltero. Dia 19 di yüni 1910, riba dia di kumpleaño di Henry, Sonora a festehá e dia di Tata pa di promé bia na Spokane. Na 1924, Presidente Calvin Coolidge a apoyá públikamente e dia Nashonal di Tata. Finalmente, na 1966, Presidente Lyndon Johnson a firma un resolushon pa kombertí Dia di Tata den dia festivo nashonal. Seis aña mas lat, presidente Richard Nixon ta kombertié den lei permanente pa festehá dia di Tata riba e di tres djadumingu di yüni.
Sin embargo, e selebrashon akí ta varia di fecha den diferente pais di mundu. Algun ta konservá e di tres djadumingu di yüni, manera ta mayoria di e paisnan latinoamerikano, miéntras ku otronan ta preferá hasié dia 19 di mart, dia di San Hosé, manera ta e ehèmpel di Bolivia, Spaña i Honduras

Continue Reading

Katoliko

Di Shete Djadumingu di Pasku di Resurekshon

Published

on

By

Promé Lektura : Hechonan di apòstelnan 7, 55-60
Salmo : Salmo 97, 1-2. 6-7. 9
Di dos Lektura : Revelashon 22, 12-14. 16-17. 20
Evangelio : Huan 17, 20-26

E evangelio di awe ta ofresé nos un bunita okashon pa meditá den unidat. E ta bin ta ripití den e último añanan akí ku mundu ke logra integrashon kada be mas grandi entre pueblo i individuonan.Pa medio di FE nos sa ku moveshon di historia ta bai kondusiendo nos na realisashon di e soño asina largu sperá, e union den un solo famia. Nos tur ta anhelá un edat den kua no tin divishon i ku riba tera ta kuminsá un era di pas i di hermandat. Kristu den e ora mas solèm di su bida a resa pa unidat di hende: “Pa tur hende sea un.”
Uni hende ku otro i ku Dios ta e ideal i trabou di Iglesia. Pa e ideal akí si ta bal la pena inbertí tur nos energia. Pero promé laga nos mes un pregunta: Kiko ta unidat? Biba den unidat no ta nifiká pensa igual, sinti mesun kos, ku ta uni tur ser humano den un uniformidat laf i steril. Dos esposo sa ku ta uní no ta nifiká ku kada un mester pèrdè su personalidat. Unidat no ke men renunsiá na nos manera di pensa. Tampoko e ta nifiká semper keda ketu o keda sin defendé konvikshonnan propio.. Kiko e ora ei ta unidat ? Lo splik’é ku un frase hopi ripití, pero berdadero. Unidat ta e armonia kreá di diversidatnan. San Pablo ta splika e konsepto akí ku e imágen di e kurpa humano. “Ta un hecho ku e kurpa, siendo un, tin hopi parti , pero e partinan maske ku nan ta hopi, ta forma entre tur un solo kurpa”. Nos kurpa ta papiando ku nos di un maravioso unidat konstruí a base di diversidat. Ta logra e armonia akí pasobra tur parti di e kurpa ta traha, ta move, ta aktua den funshon di e konhunto.
Sosiedat ta konsistí di un variedat riku di hende. Tin múltiple rasa, lenga i kultura. Kada un ta poseé su propio rikesa.
Pa biba den unidat laga nos kuminsá na aseptá e diversidat ku ta eksistí den mundu. Nos no ta pretendé di biba den un paraiso irealístiko kaminda tur hende ta pensa igual i ta kana riba e mesun kaminda. Laga nos aseptá e desafio pa biba e unidat den e diversidat, pa logra armonia atraves di rèspèt pa variedat. Laga nos ta outéntiko den nos manera di pensa i di aktua i laga nos respetá e forma personal di pensa i di aktua di kada persona, semper i kuando esaki no afektá e bon komun.
Ta logra armonia ora kada hende kontribuí na e bon komun. E dos palabranan aki: bon komun, ta esnan ku mester inspirá nos akshonnan. Ora e interes personal i egoista ta pone su mes dilanti di e bon komun, e ora ei unidat i konkordansha ta kibra.
Kristu, ora e ta resa pa unidat, no ta pensando únikamente den un unidat horizontal, ke men di hende entre un ku otro. “Ku nan tambe ta ku nos”, Hesus a pidi den su orashon na Tata. En bèrdat, no por tin union duradero entre hende si Dios no ta e laso ku ta uni nos.

Sinembargo, kon difísil ainda ta e unidat entre kristiannan. No ta nesesario mira pafó i haña un mundu den guera konstante pa konkluí kon difísil ta di biba den unidat. Ta sufisiente pa nos mira un poko paden di nos mes pa deskubrí den nos propio sentimentu e rais di un divishon profundo. E rais akí ta nos egoismo.
Nos sa ku egoismo ta un forsa ku nos tur ta dirigí t’e na nos propio satisfakshon. Nos por bisa ku komo ser humano nos ta lèn den direkshon di egoismo, pero komo kristian nos mester obra ku amor. Stima ta nifiká sali di nos mes pa proyektá nos mes den direkshon di otro. Ora nos logra konvensé nos mes di e forsa konstruktivo ku amor ta enserá, únikamente e ora ei nos lo kuminsá traha riba e bon komun.
Den eukaristia kada djadumingu, nos ta selebrá e unidat di e famia kristian. Un solo Señor, un solo fe, un solo boutismo, un solo Dios I Tata. Tur loke tin den misa ta papia ku nos di unidat: altá ta e mesa di famia, kaminda komo ruman nos ta sinta pa kome di e mesun pan i pa bebe di e mesun biña. Ku ora nos sali di e tèmpel akí nos bai na praktiká e unidat i komunion ku nos a bin pa selebrá bibando den rèspèt mutuo i den amor, promoviendo e bon komun.

Continue Reading

Trending

This shows content of element who has id="data"

Subscribe to Nobo Online

Unique insights and analysis on the stories that matter to the world

Subscribe

I'm already a member, take me to login