Lokal
Despues di reunion awe mainta: Tur nanishi ta den mesun direkshon pa habri refineria

WILLEMSTAD – Tur nanishi ta den mesun direkshon relashona ku preparashon pa reapertura di Refineria.
Asina Minister Charles Cooper a bisa NOBO awe mainta na final di e reunion ku sindikato i stakeholdersnan enkuanto e trayekto pa habri Refineria bek.
Tabata trata di un reunion ku gobièrnu a yama atraves di minister Sithree van Heydoorn, kende ta remplasá Prome Minister Gilmar Pisas.
Minister van Heydoorn na e reunion tabata kompaña pa minister Cooper, gerensia di RdK i abogado Carrega ku ta na kabes di e tim negoshadó di gobièrnu i tambe koleganan di Asuntunan General i GMN.
Ademas dje sindikatonan tambe tabata presente representante di VBC i kontratistanan.
Durante dje reunion gobiernu a duna bon kla, e ruta ku gobièrnu ta kana i kon leu gobièrnu ta den e proseso.
Cooper: “ Tabata un reunion hopi informative kaminda ku e partisipantenan a hasi pregunta i ekspresa nan preokupashonnan.
Pero nos mira bek ku nos a pone tur nanishi den mesun direkshon.
‘’ Esaki ta algu ku gobièrnu ta konsidera hopi importante, pasobra ela bisa ku e ta goberna huntu ku pueblo.
Minister Cooper a bisa ku gobièrnu no tabatin nada di skonde, pero ku ela duna e informashon.
Tin algun reto hopi importante, ku ta e lei di medio ambiente ku gobiernu ku gobiernu ta prepara pa un lei ku mester bai Parlamento, pa e pasa. ‘ Esei ta e parti di mas pisa ku nos tin nos dilanti’. Awe mainta gobièrnu a bisa ku e ta kasi kla ku e heads of agreement, entre e CPR ku gobièrnu, ku ta konserni e parti di gobièrnu i CPR.
Minister Charles Cooper ta verwagt ku pa mas tardá e prome siman di September, ta firma e Heads of agreement entre gobièrnu i Curacao Petroleum Refinery i esun entre RDK i Curacao Petroleum Refinery.
MAS TANTU TEMPU
Minister Cooper a menshona tambe ku ta e lei di medio ambiente ta esun ku ta tuma mas tantu, pasobra un lei mester pasa diferente kanal.
Ora ku kaba di diskuti e proposishon di lei ku steakholdersnan, despues ku e ekspertonan formula e proposishon di lei di medio ambiente mas konkreto, e lei mester bai Raad van Advies.
Tambe e mester bai SER, despues Parlamento.
Na final gobièrnu ta aproba e lei aki pa medio dje outoridat di parlamento.
TRANKIL
Minister Cooper a bisa NOBO, ku despues dje reunion e sindikatonan tabata trankil.
‘’E sindikatonan tambe ta yuda konsientisa komunidat pa mustra ku e importansia di refineria relashona ku ekonomia i tambe pa Korsou.
Esaki ta nesesario segun mandatario, pa Korsou por sigi progresa i pa nos divisanan por keda wanta nos florin na un balor altu. ‘’
Lokal
Wowo di mundu ta dirigí riba Karnaval di Kòrsou

WILLEMSTAD – Tin hopi interes di bishitantenan di eksterior pa karnaval di Kòrsou.Tin hopi turista ta riba nos isla i representantenan turistiko i tambe prensa internashonal ta na kantidat grandi pa kubri nos karnaval. Muryad de Bruin, direktor di Ofisina di Turismo a bisa ku CTB ta hopi kontentu pa tin karnaval bèk den su gloria kompleto manera e tabata semper. Prinsipalmente for di den region, entre otro Surnam, tin hopi turista na Kòrsou pa gosa di karnaval.
Pa motibu di Covid-19, ultimo dos aña, no por a organisa karnaval na di Kòrsou,. fisina di Turismo a prepara hopi bon pa e regreso di e fiesta grandi aki. Henter e siman aki, media internashonal ta di bishita na Kòrsou pa kubri e paradanan di karnaval, prinsipalmente esun grandi ku tuma luga mañan. Di e manera aki i ta mustra mundu tambe kon bunita nos karnaval ta.
De Bruin a bisa ku di tur e merkadonan di Korsou, tin representante turistiko e siman akin a Korsou. Ta trata di entre otro Hulanda, Colombia, Ecuador, Surnam, Merka i Republika Dominikana, ‘Nan ta kubri nos karnaval i dun’e e atenshon den publisidat internashonalmente’.
Henter e siman aki personal di e departamentu di produkto di CTB i ‘destination services’ ta riba kaya, pa host huntu ku ‘influencersnan’, i medionan di komunikashon. CTB ta guia i perkura pa e miho parti di Korsou ta bisto riba nan publikashonnan.
KONSIENTISA
Tambe komo ofisina di Turismo ta dedika atenshon na konsientisashon lokal. E direktor di CTB a a menshona ku durante di temporada di karnaval, ta konsientisa pa tene nos isla limpi. Esaki ta ta un kampaña ku ta tuma luga hopi luna kaba. E konsientisashon ta ku mester tene Kòrsou dushi i limpi. Den temporada di Karnaval, Ofisina di Turismo ta keda pone atenshon riba e asuntu aki, pa logra ku nos komo País, ta un país limpi pa nos mes pero tambe pa e bishitantenan.
CHATA tambe ta hopi kontentu ku karnaval ta bek, pasobra esaki ta hopi positivo pa e okupashon di e hotelnan i otro negoshinan ku ta relata na turismo.
Hans Slier, presidente di CHATA a bisa ku e okupashon dje hotelnan den e temporada aki ta hopi bon. Ademas, asina Slier ta bisa, eventonan manera karnaval ta no solamente ta hopi bon pa turismo pero tambe pa Kòrsou mes. Karnaval i otro festivalnan manera Jazz i Blues Fesitval, ta pone Korsou riba mapa internashonal loke ta hopi bon.
Lokal
Análisis di krímennan di impakto haltu

WILLEMSTAD – Den e periodo di 23 yanüari 2023 pa 30 yanüari 2023, polis a registrá i a analisá e siguiente aktividatnan kriminal.
Atrako
Kantidat: 5
Orario: entre 02.51’or. – 06.51’or. / 11.26’or. – 23.13’or. Sitio: Jan Noorduynweg, Dein, Pietermaai, Kanga, Mahuma.
Ladronisia di
vehíkulo
Kantidat: 4
Orario: entre 23.00’or. – 05.00’or.
Sitio: Marie Pampoen (2x), Pietermaai, Otrobanda.
Kiebro den kas
Kantidat: 8
Orario: entre 11.00’or. – 15.00’or.
Sitio: Pannekoek, Hoendenberg, Mahuma (2x), Rooi Catootje, Koraal Partier, Suffisantdorp, Julianadorp.
Partikularidat: Dor di kibra porta dilanti (mayoria).
Kiebro den negoshi
Kantidat: 3
Orario: entre di 00.00’or. – 05.00’or.
Sitio: Fokkerweg, Caracasbaaiweg, Souax West. Partikularidat: Dor di kibra dak i kandal (mayoria).
Kiebro den /na outo
Kantidat: 11
Orario: alrededor di 11.00’or. – 14.00’or / 23.00’or. – 05.00’or
Sitio: Caracasbaai, Noordkust, Otrobanda, Sabana bij Wespunt (3x), St. Wilibrordus, Habaai, Vredenberg Bij Kenchan(2x), Wespunt.
Partikularidat: Dor di kibra glas patras i bai ku piesa di outo(mayoria).
Violensia relashonal
Kantidat: 15
Orario: entre 00.00’or. – 03.00’or
Sitio: Otrobanda, Sucasa, Bonam, Oude Water, Marie Pampoen, Koraal Specht, Buena Vista, Monchi, Vredeberg bij Sta. Maria, Punda, Sta. Cruz, Jonisberg, West Groot St. Joris, Zuid Abrahamsz, Noord Zapateer.
Lokal
JCI Dutch Caribbean a elegí i instalá su direktiva nobo

WILLEMSTAD – JCI Dutch Caribbean lo kier informa ku a elegí i instalá su direktiva nobo pa e aña 2023. Sigun e presidente nobo di JCI Dutch Caribbean durante di e aña 2023 e organisashon lo proveé oportunidatnan pa desaroyo di liderzgo i empodera miembronan pa krea impaktonan positive den nos komunidat. Pues, pa e motibu aki e lema prinsipal di 2023 ta ‘Step Up’.
Junior Chamber International (JCI) su filosofia di ‘one year to lead’ tin e enfoke pa duna hendenan entre 18 pa 40 aña oportunidat di haña eksperensia den posishonnan di liderazgo.
JCI Dutch Caribbean su direktiva pa aña 2023 ta konsistí di e di 62 Presidente Shakira Sedney – Albertoe, ku asistensha di Sekretaria Jacqueline Candelaria, Tesorero Alasha Tejeda, Vise Presidente Ehekutivo Aldimir Vrutaal, Vise Presidente Sulmahine Penza – Kwidama, Vise Presidente Richards Martina, Asesor Legal General Vanessa Overman i Presidente Saliente Sulin S.F. Passial.
JCI ta un organisashon global di lidernan entre 18 pa 40 aña ku ta transformá hóbennan pashoná den lidernan kapabel pa medio di training, proyektonan, eventonan i programanan. JCI Dutch Caribbean ta konsistí di 5 organisashon lokal. Na Kòrsou, JCI Creative Leaders in Curaçao (CLIC), JCI Involvement Of Banda Ariba Curaçao (IOBA Curaçao) i JCI Willemstad. Na Aruba: JCI Young Active Leaders Aruba (YALA). Na Sint Maarten: JCI SXM A.C.T.I.O.N (Aspiring Change To Impact Our Nation).
Si bo ta interesá di desaroyá bo abilidatnan di liderazgo miéntras bo ta krea impaktonan positivo den bo komunidat, tuma kontakto ku JCI Dutch Caribbean libramente na dutchcaribbean@jci.cc.
Pa mas informashon di JCI general bishita www.juniorchamber.international.
Sigui nos riba Facebook, Instagram, LinkedIn @jcidutchcaribbean pa e último informashonnan di JCI Dutch Caribbean su aktividatnan.