E sensashonal pelotero hapones di Anaheim Angels Shohei Ohtani a djòin Babe Ruth ku un rekòrt úniko.
Shohei Ohtani ku su di 10 triunfo ayera komo pitcher ta bira apénas di dos pelotero pa gana 10 wega o konektá 10 o mas homerun den un temporada di baseball Grandes Ligas.
Babe Ruth a kumpli ku e hazaña aki na aña 1918.

Shohei Ohtani e temporada aki tin 25 homerun konektá.
E ta lider di su ekipo den bataso di kuater skina.

· Maske kuantu baseball bo a yega di mira, semper riba kualke dia por sosodé algu kubo no a mira.
Ayera den wega di Grandes Ligas un hungadó a slide, i su telefon selular a kai for di su saku di karson.
E rookie Rodolfo Castro di Piratas ku tabata kore na segunda/base den wega vs Arizona a bai tersera i den sliding ku kabes su telefon a kai.
E umpire na tersera/base mesora a pidi “Time” pa e hungado ku e selular.
Castro a duna su “coach” e telefon.
E hungadó a rekonosé ku loke a sosodé kuné ta horibel.
“No tabatin niun intenshon”, el a deklará.
Rodolfo Castro a kaba di subi pa Grandes Ligas for di triple A.
E pelotero a bisa ku e la hinka su “sliding-glove” den su saku patras i lubidá riba e telefon.
Manager di Piratas Derek Shelton a bisa ku ta inkreibel, ora bo kere kubo a mira tur kos den baseball, lugá tin kos kubo no a mira.
E pelotero a diskulpa pa loke a sosodé, i bisa ku e ta spera ku e por lusi pa kos positivo den baseball..

Inkreibel kon malechornan ta hasi daño na nos deporte. Ayera amigunan di Centro Barber a lanta i bin ripara ku nan a kòrta nan nètnan di gol i tambe “backstop” bai kuné.

Sin duda ta un sla pa nos amigunan di Barber ya ku e nètnan ta hopi karu.

Ta inkreibel kon malechornan ta abuzá di nos deporte ku regularidat.